ఎస్‌బీఐ కీలక ప్రకటన.. లోన్లపై కొత్త వడ్డీ రేట్లు.. ఇవాళ్టి నుంచే అమల్లోకి.. ఏ టెన్యూర్లపై ఎంతంటే

 ప్రభుత్వ రంగానికి చెందిన అతిపెద్ద బ్యాంక్.. స్టేట్ బ్యాంక్ ఆఫ్ ఇండియా కీలక ప్రకటన చేసింది. మార్జినల్ కాస్ట్ ఆఫ్ ఫండ్స్ బేస్డ్ లెండింగ్ రేట్లను సవరించింది. ఇప్పుడు జనవరి 15 నుంచి కొత్త వడ్డీ రేట్లు అమల్లోకి రానున్నట్లు వెల్లడించింది. ఇది 2025 ఫిబ్రవరి 15 వరకు కొనసాగుతాయని తాజాగా బ్యాంక్ తన అధికారిక వెబ్‌సైట్లో వెల్లడించింది. ఎంసీఎల్ఆర్ మారితే బ్యాంకులో ఇతర అన్ని రకాల లోన్లపై ప్రభావం పడుతుందని చెప్పొచ్చు. ఇందులో హోం లోన్లు, పర్సనల్ లోన్లు, కార్ లోన్లు వంటివి ఉన్నాయి. అయితే ఫైనల్ రుణ రేట్లు అనేది రుణ గ్రహీత ఆదాయం, జీతం, సిబిల్ స్కోరు ఇతర అంశాల ఆధారంగా మారుతుంటాయని చెప్పొచ్చు. ఎంసీఎల్ఆర్ అనేది బ్యాంకులు దాదాపు ప్రతి నెలా ప్రకటిస్తూనే ఉంటాయి. ఇవి పెరగొచ్చు లేదా తగ్గొచ్చు లేదా స్థిరంగా ఉండొచ్చు.

ఎంసీఎల్ఆర్ అనేది రుణ ఆధారిత వడ్డీ రేటు. బ్యాంకులు లోన్లపై వసూలు చేసే కనీస వడ్డీ రేటు అన్నమాట. దీని కంటే తక్కువ వడ్డీకి బ్యాంకులు లోన్లు ఇచ్చేందుకు వీలుండదు. రిజర్వ్ బ్యాంక్ ఆఫ్ ఇండియా రెపో రేట్లను బట్టి ఇది మారుతుంటుంది. రెపో రేటు పెరిగితే బ్యాంకులు ఎంసీఎల్ఆర్ పెంచుతుంటాయి. అక్కడ తగ్గిస్తే.. ఇక్కడ కూడా ఎంసీఎల్ఆర్ తగ్గుతుందని చెప్పొచ్చు. ఇక ఎంసీఎల్ఆర్ పెరిగితే లోన్ వడ్డీ రేట్లు పెరుగుతాయి. అప్పుడు ఎక్కువ ఈఎంఐ కట్టాల్సి వస్తుంది.

2025 జనవరికి సంబంధించి ఎస్బీఐ లేటెస్ట్ ఎంసీఎల్ఆర్ రేట్ల విషయానికి వస్తే.. ఓవర్‌నైట్ ఎంసీఎల్ఆర్ 8.20 శాతం వద్ద ఉంది. 3 నెలల ఎంసీఎల్ఆర్ 8.55 శాతంగా ఉంది. 6 నెలల టెన్యూర్‌కు ఎంసీఎల్ఆర్ 8.90 శాతంగా ఉంది. ఎక్కువగా ఆటో లోన్లకు లింక్ అయి ఉండే ఏడాది టెన్యూర్ ఎంసీఎల్ఆర్ 9 శాతంగా ఉండగా.. రెండేళ్లు, మూడేళ్ల ఎంసీఎల్ఆర్ 9.05 శాతం, 9.10 శాతంగా ఉన్నాయి. పర్సనల్ లోన్లు.. రెండేళ్ల టెన్యూర్‌కు ముడిపడి ఉంటాయి. అంటే 9.05 శాతం ఎంసీఎల్ఆర్ కాగా.. దీని కంటే కాస్త ఎక్కువ శాతంతో వడ్డీ రేట్లు ప్రారంభమవుతుంటాయి.

ఇక ఎస్బీఐ బేస్ రేటు 10.40 శాతంగా ఉంది. బెంచ్‌మార్క్ ప్రైమ్ లెండింగ్ రేటు వార్షిక ప్రాతిపదికన చూస్తే 15.15 శాతంగా ఉంది. ఎస్బీఐ హోం లోన్ ఎక్స్‌టర్నల్ బెంచ్‌మార్క్ లెండింగ్ రేటు 9.15 శాతంగా ఉంది. కొత్త లోన్లపై హోం లోన్ వడ్డీ రేట్లు ప్రస్తుతం 8.50 శాతంగా ఉంది. ఇతర బ్యాంకుల విషయానికి వస్తే బ్యాంక్ ఆఫ్ బరోడా, కెనరా బ్యాంకు, ఐడీబీఐ బ్యాంకు ఎంసీఎల్ఆర్ రేట్లను సవరించలేదు. హెచ్‌డీఎఫ్‌సీ బ్యాంకు మాత్రం ఎంపిక చేసిన టెన్యూ్ర్లపై 5 బేసిస్ పాయింట్ల మేర తగ్గించింది.