పుష్పాలంకరణ వివాదంపై టీటీడీ క్లారిటీ.. అందుకే విగ్రహాలు తీసేయమన్నామని ప్రకటన

తిరుమల పుష్పాలంకరణ వివాదంపై టీటీడీ క్లారిటీ ఇచ్చింది. వైకుంఠ ఏకాదశి సందర్భంగా కోటి రూపాయలకు పైగా ఖర్చు చేసి తాము ఏర్పాటు చేసిన అలంకరణ, విగ్రహాలను టీటీడీ సిబ్బంది కనీసం సమాచారం ఇవ్వకుండా తీసేశారంటూ బెంగళూరు దాత సునీత గౌడ్ శనివారం ఆరోపించిన సంగతి తెలిసిందే. తిరుమల శ్రీవారి ఆలయం వద్ద టీటీడీ సిబ్బందిపై ఈ విషయమై ఆమె వాదనకు దిగారు. అనంతరం మీడియా ఎదుట టీటీడీ సిబ్బంది తీరుపై మండిపడ్డారు. ఈ నేపథ్యంలో ఈ వ్యవహారంపై తిరుమల తిరుపతి దేవస్థానం బోర్డు స్పందించింది. ఈ మేరకు ప్రకటన విడుదల చేసింది.

వైకుంఠ ఏకాదశి పర్వదినాన్ని పురస్కరించుకుని తిరుమలలో కల్పించే వైకుంఠ ద్వార దర్శనం సందర్భంగా శ్రీవారి ఆలయంలో దాతల సహకారంతో పుష్పాలంకరణ చేయడం ఆనవాయితీగా వస్తోందని టీటీడీ తెలిపింది. అయితే ఓ దాత శనివారం అద్దాల మండపం సమీపంలో స్వామి, దేవేరుల నమూనా విగ్రహాలను ఉంచి అలంకరణ చేశారని టీటీడీ తెలిపింది. ఈ విషయాన్ని అర్చకులు గమనించి.. ఆలయం లోపలి ప్రాంగణంలోకి నమూనా విగ్రహాలను తెచ్చి అలంకరణ చేయడం సంప్రదాయం కాదని దాతకు వివరించారని టీటీడీ పేర్కొంది.

అర్చకుల సూచన మేరకు ఆ దాత మిగతా పుష్పాలంకరణ పూర్తి చేశారని.. అలాగే నమూనా విగ్రహాలను బయటకు తీసుకెళ్లిపోయారని టీటీడీ వివరించింది. తిరుమల తిరుపతి దేవస్థానం సూచించిన ప్రాంతంలో తప్ప మిగతా ఎక్కడా కూడా బయటి నుంచి విగ్రహాలను తీసుకువచ్చి అలంకరణ చేయకూడదని.. ఈ విషయాన్ని భక్తులు, దాతలు గమనించాలని టీటీడీ సూచించింది. మరోవైపు శ్రీవారి ఆలయం వెలుపల దాత సునీత గౌడ్ మాట్లాడిన మాటలపై టీటీడీ క్లారిటీ ఇచ్చింది. లోపల జరిగిన విషయాన్ని ఆవేశంతో చెప్పానని, ఆ విషయాన్ని తప్పుగా భావించవద్దని దాత ఆలయ అధికారులను కోరినట్లు టీటీడీ ప్రకటనలో పేర్కొంది.

మరోవైపు వైకుంఠ ద్వార దర్శనాల సందర్భంగా దాతల సహకారంతో తిరుమల శ్రీవారి ఆలయంలో అలంకరణ చేయించారు. ఈ క్రమంలోనే బెంగళూరు దాత సునీత గౌడ్ కోటి రూపాయలకు పైగా ఖర్చు చేసి విదేశాల నుంచి తెప్పించిన పుష్పాలు, విగ్రహాలతో అలంకరణ ఏర్పాట్లు చేశారు. అయితే టీటీడీ సిబ్బంది ఎలాంటి ముందస్తు సమాచారం లేకుండా వీటిని తొలగించారని శనివారం సునీతా గౌడ్ ఆరోపించారు. మూడు నెలల ముందు నుంచే అన్ని అనుమతులు తీసుకుని అలంకరణ చేయిస్తే.. ఇలా తొలగించడం బాగోలేదంటూ అసంతృప్తి వ్యక్తం చేశారు. అయితే శ్రీవారి ఆలయంలో నమూనా విగ్రహాలు ఏర్పాటు చేయడం సంప్రదాయం కాదని టీటీడీ తీసివేయించినట్లు క్లారిటీ ఇచ్చింది.