సైఫ్‌పై దాడిచేసిన అసలైన నిందితుడు అరెస్ట్.. వెలుగులోకి సంచలన విషయాలు

బాలీవుడ్ నటుడు సైఫ్‌ అలీఖాన్‌‌పై హత్యాయత్నం కేసులో కీలక పరిణామం చోటుచేసుకుంది. ఆయన దాడికి పాల్పడిన ప్రధాన నిందితుడ్ని ముంబయి పోలీసులు శనివారం రాత్రి అరెస్ట్‌ చేశారు. మహారాష్ట్రలోని థానే జిల్లాలో అదుపులోకి తీసుకున్నారు. సైఫ్‌పై దాడికి పాల్పడిన నిందితుడ్ని బంగ్లాదేశీయుడిగా గుర్తించినట్టు పోలీసులు తెలిపారు. ఈ కేసును ఛాలెంజ్‌గా తీసుకున్న పోలీసులు.. ఆపరేషన్‌లో భాగంగా పలు బృందాలుగా విడిపోయి దర్యాప్తు చేపట్టారు. ఈ క్రమంలో థానే జిల్లా హీరానందని వద్ద జరుగుతున్న మెట్రో నిర్మాణ సమీపంలో ఉన్న ఒక లేబర్ క్యాంప్‌లో నిందితుడు ఆశ్రయం పొందినట్టు గుర్తించారు.

ఈ విషయాన్ని గుర్తించిన పోలీసులు అతడ్ని అరెస్ట్ చేశారు. నిందితుడ్ని మహ్మద్ షరీఫుల్ షెహజాద్‌గా గుర్తించామన్నారు. అతడు ముంబయికి వచ్చి వర్లీ కోలివాడ సమీపంలో ఉంటున్నాడని చెప్పారు. సైఫ్-కరీనా ఇంటికి సమీపంలో ఉండే ఒక పబ్‌లో హౌస్ కీపింగ్ సిబ్బందిగా పనిచేశాడని చెప్పారు. అక్కడి పరిసర ప్రాంతాల్లో పనిచేయడం వల్ల సులువుగా ఆ ఇంట్లోకి వెళ్లే మార్గాలను తెలుకున్నట్లు సీనియర్‌ అధికారి ఒకరు పేర్కొన్నారు. అరెస్టు తర్వాత తదుపరి విచారణ కోసం దాస్‌ను ముంబయికి తరలించారు.

అంధేరీ వెస్ట్ స్టేషన్ వెలుపల లభ్యమైన సీసీటీవీ ఫుటేజీ సహాయంతో నిందితుడ్ని చేరుకోగలిగామని క్రైమ్ బ్రాంచ్ వర్గాలు పేర్కొన్నాయి. ఆ ఫుటేజీ సహాయంతో తమకు మొదటి క్లూ దొరికిందన్నారు. స్నేహితుడిని తీసుకెళ్లడానికి స్టేషన్ బయటకు వచ్చిన దాస్ బైక్ నంబర్ సాయంతో వాహనాన్ని కనిపెట్టారు. దీంతో అతడ్ని విచారించిన తర్వాత.. దాస్‌ను పట్టుకునేందుకు కాసర్వదలి పోలీసులు ముంబయి టీమ్‌కు సహకరించారు.

తక్కువ వ్యవధిలోనే తొందరగా డబ్బు సంపాదించాలనే ఉద్దేశంతో ఇలాంటి చర్యుకు పాల్పడినట్టు ప్రాథమిక విచారణలో నిందితుడు వెల్లడించాడు. సైఫ్‌పై దాడి వల్ల అరెస్టు భయంతో ఇటీవలే థానే హీరానందానీకి పారిపోయాడు. సీనియర్ ఐపీఎస్ దయా నాయక్ నేతృత్వంలోని క్రైమ్ బ్రాంచ్ టీమ్ యూనిట్ -9 నిందితుడిని కనిపెట్టింది. సైఫ్ కేసులో విచారణ జరుపుతోన్న డీసీపీ దీక్షిత్ వివరాలను వెల్లడించారు. నిందితుడు బంగ్లాదేశీయుడిగా అనుమానిస్తున్నామని తెలిపారు. అతడు భారతీయుడు అనడానికి ఎలాంటి ఆధారాల్లేవని చెప్పారు. చోరీ కోసమే అతడు ఇంటిలోకి ప్రవేశించినట్టు పేర్కొన్నారు. నిందితుడ్ని కోర్టులో ప్రవేశపెట్టి కస్టడీకి కోరుతామని డీసీపీ అన్నారు. బంగ్లాదేశ్ నుంచి దేశంలోకి అక్రమంగా చొరబడినట్టు తెలిపారు. భారత్‌లోకి వచ్చిన తర్వాత తన పేరును విజయ్ దాస్‌గా మార్చుకున్నాడని ఆయన చెప్పారు.