కేవలం రోజూ నడిస్తే సరిపోదు, ఏ వయసు వారు ఎంత సేపు నడవాలో తెలుసా?

ఆరోగ్యమే మహాభాగ్యం అంటారు పెద్దలు. మంచి ఆరోగ్యమే జీవితానికి గొప్ప సంపద. ఈ విలువైన సంపదను కాపాడుకోవడం చాలా ముఖ్యం. ఇందుకోసం ఆహారం తీసుకోవడం, నీరు తాగడం ఎంత ముఖ్యమో వ్యాయామం కూడా అంతే ముఖ్యం. వ్యాయామం శారీరక, మానసిక ఆరోగ్యాన్ని మెరుగుపరుస్తుంది. కరోనా తర్వాత చాలా మందిలో వ్యాయామం మీద అవగాహన పెరిగింది. ఉదయాన్నే వాకింగ్, జాగింగ్, యోగా, జిమ్‌లో వర్కౌట్లు వంటివి చేస్తున్నారు. అయితే చాలా మంది సులువుగా చేయగలిగే వ్యాయామం వాకింగ్. నడక వల్ల ఆరోగ్యానికి ఎంతో మేలు జరుగుతుంది.

వాకింగ్ చేయడం చాలా ఈజీ. రోజూ వాకింగ్ చేయడం వల్ల ఎన్నో లాభాలు ఉంటాయి. దీర్ఘకాలంలో ఎంతో మేలు జరుగుతుంది. బరువు తగ్గేందుకు కూడా వాకింగ్ బెస్ట్ ఆప్షన్. డయాబెటిస్, బీపీ తగ్గించడంలో కూడా వాకింగ్ ప్రభావవంతంగా పనిచేస్తుంది. అయితే, వాకింగ్ చేసేటప్పుడు కొన్ని రూల్స్ పాటించాల్సి ఉంటుంది. ఏదో నడిచాంలే అనుకుంటే పొరపాటు. వయసుకు తగ్గట్టుకు వాకింగ్ చేయాల్సిన అవసరం ఉందని నిపుణులు చెబుతున్నారు. ఏ వయసు వారు ఎంత దూరంగా నడవాలో ఇక్కడ తెలుసుకుందాం.

18-30 ఏళ్ల వయసు

ఈ వయసులో ఉన్నవారు యువకులు. సాధారణంగా చాలా యాక్టి‌వ్‌గా ఉంటారు. యువకుల్లో కండరాలు బలంగా ఉంటాయి. కాబట్టి ఈ వయసు ఉన్నవారు గంట పాటు వేగంగా నడవచ్చని నిపుణులు అభిప్రాయపడుతున్నారు. 30 నిమిషాల కొంచెం నెమ్మదిగా నడిచినా.. మరో ముప్పై నిమిషాలు వేగంగా నడిస్తే సరిపోతుందంటున్నారు. ఇలా నడవడం వల్ల బరువు అదుపులో ఉంటుందంటున్నారు. ఒత్తిడి తగ్గి.. మానసిక ఆరోగ్యం మెరుగవుతుందని అంటున్నారు. దీంతో.. గుండె జబ్బులు వచ్చే అవకాశం తగ్గుతుంది. ముఖ్యంగా ఆఫీసులో ఎక్కువ సేపు కూర్చునేవారు వాకింగ్ చేయడం మంచిదంటున్నారు.

31-50 ఏళ్ల వయసు

ఈ వయసు వారు మధ్య వయస్కులు. యువకులతో పోలీస్తే వీరు అంత యాక్టివ్‌గా ఉండరు. ఈ వయసు వారు రోజుకి 30 నుంచి 45 నిమిషాల పాటు నడవాలని నిపుణులు అభిప్రాయపడుతున్నారు. ఇలా నడవడం వల్ల కండరాలు బలంగా మారుతాయని చెబుతున్నారు. దీంతో.. దీర్ఘకాలిక వ్యాధుల ముప్పు తగ్గుతుందని చెబుతున్నారు. ఈ వయసు వారు చాలా మంది ఒత్తిడితో బాధపడుతున్నారు. అలాంటి వారికి వాకింగ్ బెస్ట్ ఆప్షన్. రోజుకి 30-45 నిమిషాల పాటు నడవడం వల్ల ఒత్తిడి దూరం అవుతుందని, మానసికంగా ఆరోగ్యంగా ఉండవచ్చని చెబుతున్నారు ఎక్స్‌పర్ట్స్.

51-65 ఏళ్ల వయసు

ఈ వయసు వారు అంత యాక్టివ్‌గా ఉండకపోవచ్చు. వీరు రోజుకి 30 నుంచి 40 నిమిషాలు నడిస్తే సరిపోతుందని నిపుణులు చెబుతున్నారు. ఈ వయసు వారి శరీరంలో మార్పులు, కండరాలు బలహీనపడటం , జీర్ణవ్యవస్థ మందగించడం వంటి మార్పులు జరుగుతాయి. అందుకే ఈ వయసు వారు వాకింగ్ వ్యాయామాన్ని చేయాలంటున్నారు ఎక్స్‌పర్ట్స్. వీళ్లు వాకింగ్ చేయడం వల్ల ఎముకలు, కీళ్లు దృఢంగా మారతాయి. వాకింగ్ ముందు వార్మప్, వాకింగ్ తర్వాత కూల్ డౌన్ వ్యాయామాలు చేయాలని చెబుతున్నారు.

66-75 ఏళ్ల వయసు

ఈ వయసు వారిలో ఆటో‌మేటిక్‌గా బలం తగ్గిపోతుంది. కండరాలు చాలా బలహీనంగా ఉంటాయి. ఇలాంటి వారికి వ్యాధుల ముప్పు ఎక్కువగా ఉంటుంది. అందుకే ఈ వయసు వారు రోజూ 20 నుంచి 30 నిమిషాల పాటు నడిస్తే అనేక ప్రయోజనాలు ఉంటాయని నిపుణులు చెబుతున్నారు. గుండె జబ్బులు వచ్చే ముప్పును తగ్గించుకోవచ్చని చెబుతున్నారు. ఈ వయసు వారిలో మతిమరుపు ఉండే అవకాశాలు ఉన్నాయి. వాకింగ్ వల్ల మతిమరుపు తగ్గి జ్ఞాపకశక్తి పెరుగుతుందని నిపుణులు చెబుతున్నారు. అయితే, కీళ్ల నొప్పులు, ఇతర వ్యాధులతో బాధపడేవారు మార్నింగ్ 15 నిమిషాలు, సాయంత్రం 15 నిమిషాలు నడిస్తే మంచిదంటున్నారు.

75 ఏళ్ల పైబడిన వారు

ఈ వయసు వారికి రోగనిరోధక శక్తి చాలా బలహీనంగా ఉంటుంది. దీంతో రకరకాల వ్యాధుల ముప్పున పడుతుంటారి. అయితే, ఈ వయసు వారు నిదానంగా అయినా సరే రోజుకి 15 నుంచి 20 నిమిషాల పాటు నడిస్తే కీళ్లు, కండరాలు ఆరోగ్యంగా ఉంటాయని నిపుణులు చెబుతున్నారు. ఇలా నడవడం వల్ల గుండె వ్యాధుల ముప్పు కూడా తగ్గుతుంది. ఏదైనా వ్యాధులతో బాధపడుతుంటే వైద్యుణ్ని సలహా మేరకు వాకింగ్ చేయడం బెస్ట్ అంటున్నారు.

ఈ జాగ్రత్తలు ముఖ్యం

* మీరు ఎప్పుడు వ్యాయామం చేయకపోతే.. మొదటి సారి వాకింగ్ వెళ్తుంటే నెమ్మదిగా నడక ప్రారంభించండి. రోజులు గడిచే కొద్దీ నడక వేగంతో పాటు సమయాన్ని కూడా పెంచుకోండి.

* వాకింగ్ కోసం సరైన షూస్ ఎంపిక చేసుకోండి. సరైన బూట్లు లేకపోతే వాకింగ్‌లో ఇబ్బందులు ఉంటాయి.

* వాకింగ్ సమయంలో తగినంత నీరు తాగండి.

* స్నేహితుడితో, కుటుంబ సభ్యులతో వాకింగ్ చేయడం అలవాటు చేసుకోండి. దీంతో సమయం సరదాగా గడిచిపోతుంది.