రేపటి నుంచి శ్రీలంక-ఆస్ట్రేలియా తొలి టెస్టు,,,ఓపెనర్‌గా బరిలోకి ట్రావిస్ హెడ్‌
sports | Suryaa Desk | Published : Tue, Jan 28, 2025, 10:55 PM
ఇటీవల భారత్‌తో జరిగిన బోర్డర్ గవాస్కర్ ట్రోఫీలో విజేతగా నిలిచిన ఆస్ట్రేలియా.. ప్రపంచ టెస్టు ఛాంపియన్ షిప్‌ ఫైనల్‌కు ముందు మరో సిరీస్‌కు సిద్ధమైంది. ఈ మేరకు శ్రీలంకతో ఆ జట్టు రెండు మ్యాచ్‌ల టెస్టు సిరీస్ ఆడనుంది. ఇందుకోసం ఇప్పటికే శ్రీలంక గడ్డపైకి అడుగుపెట్టిన ఆస్ట్రేలియా ముమ్మరంగా సాధన చేస్తోంది. ఈ నేపథ్యంలో తొలి టెస్టుకు ముందు ఏర్పాటు చేసిన మీడియా సమావేశంలో ఆసీస్ కెప్టెన్ స్టీవ్ స్మిత్ మాట్లాడాడు.
డేవిడ్ వార్నర్ రిటైర్మెంట్ తర్వాత.. ఆస్ట్రేలియాకు టెస్టుల్లో ఓపెనర్ అవసరం ఏర్పడింది. బోర్డర్ గవాస్కర్ ట్రోఫీలో తొలి మూడు మ్యాచ్‌లలో ఖవాజాతో పాటు.. నాథన్ మెక్‌స్వీని, ఆ తర్వాత రెండు మ్యాచ్‌లలో సామ్ కొన్‌స్టాస్‌లు ఓపెనర్‌లుగా వచ్చారు. కానీ శ్రీలంకతో సిరీస్‌కు వీరిద్దరినీ పక్కన పెట్టింది ఆస్ట్రేలియా. స్టార్ ప్లేయర్ ట్రావిస్ హెడ్‌ను ఓపెనర్‌గా ప్రమోట్ చేసింది. పరిమిత ఓవర్ల క్రికెట్‌లో ఆసీస్ తరఫున ఓపెనర్‌గా రాణిస్తున్న అతడిని.. టెస్టు సిరీస్‌కు సైతం అదే స్థానంలో బరిలోకి దింపాలని డిసైడ్ అయింది. ఈ విషయాన్ని కెప్టెన్ స్టీవ్ స్మిత్ వెల్లడించాడు. దీంతో ఉస్మాన్ ఖవాజాతో పాటు ట్రావిస్ హెడ్‌.. ఓపెనర్‌గా రానున్నాడు.
కాగా కొన్స్టాస్ భారత్‌తో జరిగిన టెస్టు సిరీస్‌లో రాణించాడు. నాలుగో టెస్టు ద్వారా అరంగేట్రం చేసిన ఈ ప్లేయర్.. మెరుగైన ప్రదర్శన చేశాడు. దీంతో అతడినే టెస్టుల్లో ఓపెనర్‌గా బరిలోకి దింపుతారని అంతా భావించారు. కానీ ఆస్ట్రేలియా క్రికెట్ జట్టు ట్రావిస్ హెడ్‌ను బరిలోకి దింపుతోంది. 2023లో భారత్‌లో పర్యటన సందర్భంగా హెడ్‌ రాణించాడని.. కొత్త బంతిని సమర్థవంతంగా ఎదుర్కొని పరుగులు రాబట్టాడని స్టీవ్ స్మిత్ వ్యాఖ్యానించాడు. అందుకే అతడినే మళ్లీ ఓపెనర్‌గా బరిలోకి దింపాలని డిసైడ్ అయినట్లు చెప్పుకొచ్చాడు.
దీంతో మిడిల్ ఆర్డర్‌లో ప్లేసు కోసం కొన్స్టాస్ పోటీ పడుతున్నాడు. అయితే తుది జట్టులో చోటు దక్కినా.. దక్కకపోయినా.. ఈ పర్యటన అతడికి ఎంతో ఉపయోగపడుతుందని స్మిత్ విశ్వాసం వ్యక్తం చేశాడు. శ్రీలంకతో పర్యటనలో భాగంగా ఈనెల 29 నుంచి గాలె వేదికగా తొలి టెస్టు ప్రారంభం కానుంది. ఈ రెండు మ్యాచ్‌ల సిరీస్ తర్వాత ఛాంపియన్స్‌ ట్రోఫీ ప్రారంభం కానుంది. కాగా రెగ్యులర్ కెప్టెన్ ప్యాట్ కమిన్స్‌ గైర్హాజరీలో స్టీవ్ స్మిత్ ఈ పర్యటనకు కెప్టెన్‌గా వ్యవహరించనున్నాడు.
శ్రీలంకతో టెస్టు సిరీస్‌కు ఆస్ట్రేలియా జట్టు:
ఉస్మాన్ ఖవాజా, సామ్ కొన్స్టాస్, మార్నస్ లబుషేన్, స్టీవ్ స్మిత్ (కెప్టెన్), ట్రావిస్ హెడ్‌, బ్యూ వెబ్‌స్టర్‌, అలెక్స్ కేరీ, సీన్ అబాట్, మిచెల్ స్టార్క్, నాథన్ లైయాన్, స్కాట్ బోలాండ్, జోష్ ఇంగ్లిస్, మాథ్యూ కుహ్నెమాన్, నాథన్ మెక్‌స్వీనీ, టాడ్ మర్ఫీ, కూపర్ కన్నోలీ
|
|