19 ఏళ్ల తెలుగమ్మాయి రికార్డ్.. 53 బంతుల్లోనే సెంచరీతో సరికొత్త చరిత్ర
sports | Suryaa Desk | Published : Tue, Jan 28, 2025, 10:56 PM
మలేషియా వేదికగా మహిళల అండర్ 19 ప్రపంచకప్ జరుగుతున్న విషయం తెలిసిందే. ఈ టోర్నీలో వరుసగా నాలుగు మ్యాచ్‌లు గెలిచిన భారత్.. ఇవాళ స్కాంట్లాండ్‌తో తలపడుతోంది. ఈ మ్యాచ్‌లో తెలుగమ్మాయి గొంగడి త్రిష చరిత్ర సృష్టించింది. అండర్ 19 మహిళల టీ20 ప్రపంచకప్ చరిత్రలో తొలి సెంచరీ సాధించింది. ఈ టోర్నీలో విశేషంగా రాణిస్తున్న తెలుగమ్మాయి.. సూపర్‌-6లో భాగంగా స్కాట్లాండ్‌తో పోరులోనూ అదే పునరావృతం చేసింది. స్కాట్లాండ్‌తో మ్యాచ్‌లో ఓపెనర్‌గా బరిలోకి దిగిన భారత్‌కు ఓపెనర్లు శుభారంభం అందించారు. ముఖ్యంగా గొంగడి త్రిష ఆకాశమే హద్దుగా చెలరేగిపోయింది. ఏకంగా 53 బంతుల్లో సెంచరీ కొట్టింది. ఇన్నింగ్స్‌ ఆసాంతం బ్యాటింగ్ చేసిన ఈ ప్లేయర్.. నాటౌట్‌గా నిలిచింది. జట్టు స్కోరును 200 పరుగుల మార్కును దాటించింది. ఈ ఇన్నింగ్స్‌తో మహిళల అండర్-19 టీ20ల్లో తొలి సెంచరీ నమోదు చేసిన బ్యాటర్‌గా త్రిష రికార్డు సృష్టించింది.
ఈ మ్యాచ్‌లో మొత్తంగా 59 బంతులు ఆడిన ఈ ప్లేయర్.. 110 రన్స్‌తో నాటౌట్‌గా నిలిచింది. అందులో 4 సిక్స్‌లు, 13 ఫోర్లు ఉన్నాయి. ఓపెనర్ కమలిని (51)తో కలిసి.. త్రిష 147 పరుగుల భారీ భాగస్వామ్యాన్ని నెలకొల్పింది. ఆ తర్వాత సానికా చల్కే (29*) కూడా విలువైన ఇన్నింగ్స్‌ ఆడింది. గొంగడి త్రిష ఆటతో ఈ మ్యాచ్‌లో భారత అమ్మాయిలు.. నిర్ణీత 20 ఓవర్లలో వికెట్ నష్టానికి 208 పరుగులు స్కోరు చేసింది. స్కాట్లాండ్ బౌలర్లలో మైసీ మసీరా ఓ వికెట్ తీసింది.
కాగా భద్రాద్రి కొత్తగూడెం జిల్లాకి చెందిన త్రిష ఈ టోర్నీలో విశేషంగా రాణిస్తోంది. మహిళల టీ20 ప్రపంచకప్ 2025లో అత్యధిక పరుగులు చేసిన ప్లేయర్‌గా కొనసాగుతోంది. ఐసీసీ అండర్-19 మహిళల టీ20 ప్రపంచకప్ ప్రస్తుత సీజన్‌లో స్కాట్లాండ్‌తో మ్యాచ్ ముగిసే సరికి.. త్రిష 230 పరుగులు చేసింది.
అనంతరం భారీ లక్ష్యంతో బరిలోకి దిగిన స్కాట్లాండ్.. భారత బౌలింగ్‌కు తలొగ్గింది. కనీసం 20 ఓవర్లు కూడా బ్యాటింగ్ చేయకుండానే చేతులెత్తేసింది. బ్యాటింగ్‌లో అదరగొట్టిన త్రిష.. బౌలింగ్‌లోనూ సత్తాచాటింది. 2 ఓవర్లు వేసి మూడు వికెట్లు తీసింది. దీంతో స్కాట్లాండ్ 58 పరుగులకు ఆలౌట్‌ అయింది. ఈ టోర్నీలో భారత్ వరుసగా ఐదు మ్యాచ్‌లు గెలిచింది.
|
|