రోడ్డు ప్రమాదం.. ఇద్దరు పిల్లలు సహా దంపతుల మృతి

ఉత్తర ప్రదేశ్‌లోని ప్రయాగ్‌రాజ్‌లో జరుగుతున్న మహా కుంభమేళాలో పూజల అనంతరం ఇంటికి తిరిగి వస్తుండగా.. రోడ్డు ప్రమాదానికి గురయ్యారు. ఈక్రమంలోనే ఇద్దరు భార్యాభర్తలు సహా పిల్లలు ఇద్దరూ ప్రాణాలు కోల్పోయారు. ఆ పూర్తి వివరాలు మీకోసం. ఢిల్లీలోని ఉత్తమ్ నగర్‌కు చెందిన ఓం ప్రకాష్ సింగ్‌కు 42 సంవత్సరాలు. ఆయన ప్రస్తుతం ఢిల్లీలోని హైకోర్టులో న్యాయవాదిగా పని చేస్తున్నారు. ఈయనకు 34 ఏళ్ల భార్య పూర్ణిమతో పాటు 12 ఏళ్ల కుమార్తె అహానా, 4 సంవత్సరాల వయసు గల కుమారుడు వినాయక్ ఉన్నారు. అయితే వీరందరూ కలిసి ఇటీవలే ఉత్తర ప్రదేశ్‌లోని ప్రయాగ్‌రాజ్‌లో జరుగుతున్న మహా కుంభమేళాకు వెళ్లారు.

మనసారా దేవుడిని ప్రార్థిస్తూ.. గంగ, యమున, సరస్వతీ నదులు సంగమంలో పుణ్య స్నానం ఆచరించారు. ఆపై అక్కడే ఉన్న పలు ఆలయాలను సందర్శించుకుని పూజలు కూడా చేశారు. ఇక దర్శనం పూర్తి కావడంతో.. డిసెంబర్ 27వ తేదీ సోమవారం రోజు కారులో ఢిల్లీకి తిరుగు ప్రయాణం అయ్యారు. అయితే అర్ధరాత్రి 12.30 గంటలకు యూపీలోని ఆగ్రా జిల్లాలోని ఫతేబాద్ పరిధి ప్రాంతానికి రాగానే వీరి కారు ప్రమాదానికి గురైంది.

ముఖ్యంగా వీరి కారు నేరుగా వెళ్లి ఓ డివైడర్‌ను ఢీకొట్టి ఎదురుగా ఉన్న రోడ్డుపై బోల్తా పడింది. ఈక్రమంలోనే అటువైపు నుంచి వస్తున్న మినీ లారీ వీరి కారును ఢీకొట్టగా.. కారులో ఉన్న ఓం ప్రకాష్ సింగ్ సహా భార్య, ఇద్దరు పిల్లలు అక్కడికక్కడే ప్రాణాలు కోల్పోయారు. విషయం గుర్తించిన స్థానికులు వెంటనే పోలీసులకు సమాచారం అందించగా.. హుటాహుటిన రంగంలోకి దిగారు. కేసు నమోదు చేసుకుని దర్యాప్తు చేపట్టారు. ఈక్రమంలోనే వారి మృతదేహాలను పోస్టుమార్టం నిమిత్తం స్థానిక ప్రభుత్వాసుపత్రికి తరలించారు.

ఈ ప్రమాదం గురించి ఆగ్రా ఏసీపీ అమర్ దీప్ మాట్లాడుతూ.. కుంభమేళా నుంచి తిరిగి వస్తుండగా వీరి కారు ప్రమాదానికి గురై.. అందులో ఉన్న నలుగురు చనిపోయినట్లు తెలిపారు. డ్రైవర్ నిద్ర మత్తులో ఉండడం వల్లే ఈ ప్రమాధం సంభవించినట్లు ప్రాథమిక దర్యాప్తులో వెల్లడైందని చెప్పారు. అలాగే ఈ ప్రమాదం గురించి వారి కుటుంబ సభ్యులకు సమాచారం అందించినట్లు స్పష్టం చేశారు.