సౌతాఫ్రికా టీ20 లీగ్‌ ఫైనల్స్‌లో సన్‌రైజర్స్.. వరుసగా మూడోసారి

సౌతాఫ్రికా టీ20 లీగ్‌లో సన్‌రైజర్స్ ఈస్ట్రన్ కేప్ జట్టు వరుసగా మూడోసారి ఫైనల్స్‌లో అడుగుపెట్టింది. సెంచూరియన్ వేదికగా పార్ల్ రాయల్స్‌తో గురువారం జరిగిన క్వాలిఫయర్-2 మ్యాచ్‌లో ఘన విజయం సాధించి ఫైనల్స్‌లో అడుగుపెట్టింది. SA20 హిస్టరీలో మూడు సీజన్లలోనూ సన్‌రైజర్స్ ఫైనల్స్ బరిలో నిలవడం విశేషం.

సన్‌రైజర్స్ ఈస్ట్రన్ కేప్-పార్ల్ రాయల్స్ మధ్య జరిగిన ఎలిమినేటర్స్ మ్యాచ్‌లో తొలుత బ్యాటింగ్ చేసిన రాయల్స్ జట్టు 20 ఓవర్లలో నాలుగు వికెట్ల నష్టానికి 175 పరుగులు చేసింది. ఆ జట్టు ఓపెనర్ లువాన్-డ్రే ప్రిటోరియస్ 41 బంతుల్లో 8 ఫోర్లు, ఒక సిక్సర్‌తో 59 పరుగులు చేయగా, రూబిన్ హెర్మాన్ కేవలం 53 బంతుల్లో 8 ఫోర్లు, మూడు సిక్సర్లతో 81 పరుగులతో నాటౌట్‌గా నిలిచాడు. కెప్టెన్ డేవిడ్ మిల్లర్ (6), దినేష్ కార్తిక్ (2) తక్కువ పరుగులకే పెవిలియన్ బాట పట్టారు.

పార్ల్ రాయల్స్ అందించిన 176 పరుగుల లక్ష్యాన్ని సన్‌రైజర్స్ జట్టు కేవలం రెండు వికెట్లు మాత్రమే కోల్పోయి సునాయాసంగా ఛేదించింది. ఓపెనర్ టోనీ డి జోర్జి బౌండరీలతో పార్ల్ రాయల్స్ బౌలర్లకు చుక్కలు చూయించాడు. టోనీ 49 బంతుల్లో 11 ఫోర్లు, రెండు సిక్సర్లతో 78 పరుగులు చేసి అవుటయ్యాడు. టోనీతో పాటు జోర్డాన్ హెర్మాన్ 48 బంతుల్లో నాలుగు ఫోర్లు, నాలుగు సిక్సర్లతో 69 పరుగులు బాదాడు. దాంతో సన్‌రైజర్స్ ఈస్ట్రన్ కేప్ జట్టు 19.2 ఓవర్లలో రెండు వికెట్ల నష్టానికి 177 పరుగులు చేసి ఫైనల్స్‌లో అడుగుపెట్టింది.

సౌతాఫ్రికా టీ20 లీగ్ 2023లో ప్రారంభం కాగా వరుసగా మూడు సీజన్లలోనూ సన్‌రైజర్స్ ఈస్ట్రన్ కేప్ ఫైనల్స్‌లో నిలిచింది. 2023లో ప్రిటోరియా క్యాపిటల్స్‌పై, 2024లో డర్బన్ సూపర్ జెయింట్స్‌పై విజయం సాధించి వరుసగా రెండుసార్లు టైటిల్ విజేతగా నిలిచింది. ఫిబ్రవరి 8న ఎంఐ కేప్‌టౌన్‌తో సన్‌రైజర్స్ 2025 ఫైనల్ పోరులో తలపడనుంది. ఈ మ్యాచ్‌లోనూ గెలిచి మూడోసారి టైటిల్‌ను ముద్దాడాలని సన్‌రైజర్స్ ఉవ్విళ్లూరుతోంది.