అమెరికాలో గల్లంతైన విమానం.. సముద్రంలో కూలి ప్రయాణికులంతా మృతి

ప్రపంచ వ్యాప్తంగా వివిధ దేశాల్లో ఇటీవల జరిగిన విమాన ప్రమాదాలు తీవ్ర భయాందోళనకు గురి చేస్తున్నాయి. ఇక అమెరికాలో ఇటీవల వరుస విమాన ప్రమాదాలు చోటు చేసుకోవడం మరింత భయాన్ని కలిగిస్తున్నాయి. 3 రోజుల క్రితం అలస్కాలో ఓ విమానం టేకాఫ్ అయిన కొద్దిసేపటికే రాడార్ సిగ్నల్ నుంచి తప్పిపోయిన విషయం తెలిసిందే. అయితే ఆ విమానం ఆచూకీ కోసం గాలింపు చేపట్టిన అధికారులకు ఓ విషాదకరమైన వార్త తెలిసింది. ఆ విమానం సముద్రంలో పడిపోయిట్లు వెల్లడించారు. అందులో 10 మంది ప్రయాణికులు ఉండగా.. వారంతా చనిపోయినట్లు అధికారులు ప్రకటించారు. ఈ నేపథ్యంలోనే అసలు విమానం ఎందుకు ప్రమాదానికి గురైంది. అది సముద్రంలో కూలిపోవడానికి గల కారణాలపై అధికారులు దర్యాప్తు మొదలుపెట్టారు.

10 మంది ప్రయాణికులతో యునలక్లీట్ నుంచి అలస్కా మీదుగా నోమ్ వెళ్తున్న ఆ విమానం.. టేకాఫ్ అయిన గంట సేపటి తర్వాత.. ఏటీసీతో సంబంధాలు తెగిపోయాయి. పశ్చిమ అలాస్కాలోని నోమ్‌ కమ్యూనిటీకి వెళ్తున్న విమానం కూలిపోయినట్లు యూఎస్‌ కోస్ట్‌ గార్డ్‌ ప్రతినిధి మైక్‌ సలెర్నో వెల్లడించారు. ఈ ఘటనలో 9 మంది ప్రయాణికులు, ఒక పైలట్ సహా మొత్తం 10 మంది దుర్మరణం పాలైనట్లు తెలిపారు. ఆ విమానం శిథిలాలను సముద్రంలో గుర్తించినట్లు పేర్కొన్నారు. అలస్కా డిపార్ట్‌మెంట్ ఆఫ్ పబ్లిక్ సేఫ్టీ ప్రకారం.. బెరింగ్ ఎయిర్ అనే విమానయాన సంస్థకు చెందిన సింగిల్-ఇంజిన్ టర్బోప్రాప్.. విమానం గురువారం మధ్యాహ్నం 2.37 గంటలకు ఉనల్కలేట్ నుంచి బయలుదేరగా.. ఆచూకీ గల్లంతైంది.

నేషనల్ వెదర్ సర్వీస్ ప్రకారం.. అక్కడ తేలికపాటి హిమపాతం, పొగమంచు ఉన్నాయి. ఉష్ణోగ్రతలు భారీగా పడిపోయినట్లు తెలుస్తోంది. అయితే ఆ విమానానికి ఏం జరిగిందో తాను ఊహించలేనని.. కోస్ట్ గార్డ్ లెఫ్టినెంట్ కమాండర్ బెంజమిన్ మెక్‌ఇంటైర్ కోబుల్ తెలిపారు. విమానం నుంచి ఎలాంటి సిగ్నల్స్ తనకు రాలేదని వెల్లడించారు. విమానాల్లో అత్యవసర లొకేటింగ్ ట్రాన్స్‌మిటర్ ఉంటుందని.. ఏదైనా ప్రమాదం సంభవించినపుడు అది శాటిలైట్‌కు సమాచారం అందిస్తుందని పేర్కొన్నారు. ఆ శాటిలైట్ నుంచి కోస్ట్‌గార్డ్‌కు సమాచారం వస్తుందని.. కానీ ఈ ఘటనలో మాత్రం కోస్ట్‌గార్డ్‌కు ఎలాంటి సమాచారం అందలేదని తెలిపారు.

బెరింగ్ ఎయిర్ అనే విమానయాన సంస్థ పశ్చిమ అలాస్కాలోని 32 గ్రామాలకు నోమ్, కోట్జెబ్యూ, ఉనల్కలేట్‌ హబ్‌ల నుంచి సర్వీసులు అందిస్తోంది. ఇక అమెరికాలో ఇటీవలి కాలంలో పలు ప్రమాదాలు చోటు చేసుకున్నాయి. జనవరి 29వ తేదీన అమెరికాలోని వాషింగ్టన్ సమీపంలో అమెరికన్ ఎయిర్‌లైన్స్ జెట్, ఆర్మీ హెలికాప్టర్ ఢీకొనడంతో 67 మంది ప్రయాణికులు గాల్లోనే ప్రాణాలు కోల్పోయిన విషయం తెలిసిందే. ఆ తర్వాత రెండు రోజులకే అంటే జనవరి 31వ తేదీన ఫిలడెల్ఫియాలో రవాణా విమానం కూలగా.. ఆరుగురు ప్రాణాలు కోల్పోయారు. తాజాగా జరిగిన అలస్కా విమాన ప్రమాదంలో 10 మంది మరణించారు. దీంతో అమెరికాలో గత 8 రోజుల్లో జరిగిన 3 విమాన ప్రమాదాల్లో దాదాపు 84 మంది చనిపోయారు.