హెచ్ 1బీ వీసాలపై అమెరికా అలర్ట్.. భారతీయులకు లబ్ధి, మార్చి 7న ప్రారంభం

అమెరికా వెళ్లి ఉద్యోగం చేయాలనుకునేవారికి అమెరికా తాజాగ గుడ్‌న్యూస్ చెప్పింది. 2025-2026 ఏడాదికి సంబంధించి.. హెచ్ 1బీ వీసా రిజిస్ట్రేషన్ ప్రక్రియ త్వరలోనే ప్రారంభించనున్నట్లు వెల్లడించింది. ఈ హెచ్ 1బీ వీసాల ద్వారా ఏటా 65 వేల మంది భారతీయులు అమెరికాలో అడుగుపెడుతున్నారు. ఈ నేపథ్యంలోనే వచ్చే ఆర్థిక సంవత్సరానికి సంబంధించి హెచ్‌-1బీ వీసా క్యాప్ రిజిస్ట్రేషన్‌ ప్రక్రియ మార్చి 7వ తేదీన ప్రారంభమై మార్చి 24వ తేదీన ముగియనున్నట్లు యునైటెడ్ స్టేట్స్ సిటిజన్‌షిప్‌ ఇమ్మిగ్రేషన్ సర్వీసెస్‌ విభాగం తాజాగా అధికారికంగా వెల్లడించింది.

ఈ ఏడాది హెచ్ 1బీ వీసా రిజిస్ట్రేషన్ ప్రక్రియ మార్చి 7వ తేదీన ఉదయం 10.30 గంటలకు ప్రారంభమై.. మార్చి 24వ తేదీన రాత్రి 10.30 గంటలతో ముగుస్తుందని యూఎస్‌సీఐఎస్ తెలిపింది. భారత్, చైనా సహా పలు దేశాలకు చెందిన నైపుణ్యం గల ఉద్యోగులకు నియమించుకునేందుకు అమెరికన్ టెక్ కంపెనీలు.. ఈ హెచ్ 1బీ వీసాల ద్వారా ఉద్యోగాలు కల్పిస్తాయి. ఇక ఈ హెచ్ 1బీ వీసా రిజిస్ట్రేషన్ ఫీజు ఈసారి భారీగా పెంచారు. గతంలో కేవలం 10 డాలర్లు ఉన్న ఈ హెచ్ 1బీ వీసా రిజిస్ట్రేషన్ ఫీజును ఈసారి అమాంతం 125 డాలర్లకు పెంచేశారు.

ఇక ఈ హెచ్ 1బీ వీసా రిజిస్ట్రేషన్ సమయంలో ఎంపిక కోసం ప్రతి దరఖాస్తుదారుడిని ఎలక్ట్రానిక్ పద్ధతిలో నమోదు చేస్తారు. రిజిస్ట్రేషన్ ఫీజును చెల్లించడానికి పిటిషనర్లు, చట్టపరమైన ప్రతినిధులు తప్పనిసరిగా యూఎస్‌సీఐఎస్ ఆన్‌లైన్ అకౌంట్‌ ఉపయోగించాలని అమెరికా ఎంబసీ అధికారులు తెలిపారు. అమెరికాలో ఆర్థిక సంవత్సరం ప్రారంభమయ్యే అక్టోబర్ 1వ తేదీ నాటికి ఈ హెచ్ 1బీ వీసా ఎంపిక ప్రక్రియను పూర్తి చేసేందుకు యూఎస్‌సీఐఎస్ చర్యలు తీసుకుంటోంది.

మరోవైపు.. గత ఆర్థిక సంవత్సరంలో జో బైడెన్ హయాంలో ప్రారంభించిన బెనిఫిషియరీ సెంట్రిక్ సెలక్షన్ ప్రాసెస్‌‌ విధానాన్ని ఈ ఏడాది కొనసాగిస్తామని యూఎస్‌సీఐఎస్ పేర్కొంది. ఈ బెనిఫిషియరీ సెంట్రిక్‌ సిస్టమ్‌లో ఒక హెచ్ 1బీ వీసా దరఖాస్తుదారుడు.. ఎన్ని రిజిస్ట్రేషన్లు చేసినప్పటికీ లాటరీలో కేవలం ఒకసారి మాత్రమే ప్రవేశించే అవకాశం ఉంటుంది. ఇందుకు బెనిఫిషియరీ పాస్‌పోర్ట్‌ నంబర్‌ను ఉపయోగిస్తారు. అదే ప్రత్యేక గుర్తింపుగా ఉండటంతో ఎన్నిసార్లు లాటరీలో ప్రవేశించారో అందులో తెలిసిపోతుంది.

అమెరికాలో ఉద్యోగాలు చేసేందుకు.. విదేశీ నిపుణులు, నైపుణ్యం కలిగిన ఉద్యోగులకు అమెరికా ప్రభుత్వం ప్రతీ సంవత్సరం ఈ హెచ్ 1బీ వీసాలు జారీ చేస్తుంది. ఇందులో అత్యధికంగా భారత్, చైనాకు చెందిన వారే వీసాలు దక్కించుకుంటారు. భారత్ నుంచి ఏటా లక్షలాది మంది హెచ్ 1బీ వీసాల కోసం దరఖాస్తు చేసుకున్నా.. కేవలం 65 వేల మందికి మాత్రమే వీసాలు లభిస్తాయి. అయితే ఈ సంఖ్యను పెంచాలని ఎప్పటి నుంచో అమెరికాకు భారత్ విజ్ఞప్తి చేస్తూ వస్తోంది.

లక్షల సంఖ్యలో వచ్చిన ఈ హెచ్‌ 1బీ వీసా దరఖాస్తులను కంప్యూటర్‌ ఆధారిత లాటరీ పద్ధతి ద్వారా 65 వేల మందిని ఎంపిక చేసి వీసాలు జారీ చేస్తారు. వీటితో పాటు సైన్స్‌, టెక్నాలజీ, ఇంజినీరింగ్‌, మ్యాథమెటిక్స్‌ విభాగాల్లో అమెరికాలోని వివిధ యూనివర్శిటీల్లో ఉన్నత విద్య పూర్తి చేసిన విదేశీ విద్యార్థులకు మరో 20 వేల హెచ్ 1బీ వీసాలను ఇస్తారు. దీంతో మొత్తం భారతీయులకు ఏటా 85 వేల హెచ్ 1బీ వీసాలు అమెరికా అందిస్తోంది.