సీబీఐ ఆఫీసులో,, తలుపులు, కిటికీలు, ఫర్నిచర్ సహా అన్నీ లూటీ
national | Suryaa Desk | Published : Fri, Feb 14, 2025, 09:02 PM
త్రిపుర రాజధాని అగర్తలాలోని శ్యామలీ బజార్ క్వార్టర్ కాంప్లెక్సులోని సెంట్రల్ బ్యూరో ఆఫ్ ఇన్వెస్టిగేషన్ క్యాంప్ ఆఫీసు గత ఐదు నెలలుగా మూసి ఉంది. అయితే విషయం గుర్తించిన ఎవరో.. దీంట్లో దొంగతనానికి పాల్పడ్డారు. ముఖ్యంగా తలుపులు, కిటికీలు, కబోర్డులు సహా ఫర్నిచర్ మొత్తాన్ని చోరీ చేశారు. కేవలం భవనం గోడలను మాత్రమే మిగల్చారు. కార్యాలయం మూసి ఉండడంతో ఈ విషయం వెలుగులోకి రాలేదు. కానీ ఫిబ్రవరి 11వ తేదీన సీబీఐ అధికారులు పని నిమిత్తం ఈ కార్యాలయానికి వెళ్లారు.
అత్యంత భద్రత కల్గిన ఈ ఆఫీసులోకి వెళ్లగానే షాక్ అయి అలాగే నిల్చుండిపోయారు. ముఖ్యంగా అక్కడ గోడలు తప్ప మరేమీ లేవని గుర్తించి ఆశ్చర్యపోయారు. ఆపై అందులో దొంగలు పడ్డట్లు గుర్తించి వెంటనే పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేపట్టారు. ఈక్రమంలోనే శ్యామలీ బజార్, ఖేజుర్ బగన్ ప్రాంతాలకు చెందిన ఆరుగురిని అదుపులోకి తీసుకున్నారు. వీరి వద్ద నుంచి కొన్ని వస్తువులను కూడా స్వాధీనం చేసుకున్నారు.
ముఖ్యంగా నిందితుల వద్ద నుంచి ఎనిమిది స్టీలు బీరువాలు, ఏడు చెక్క కుర్చీలు, నాలుగు ప్లాస్టిక్ కుర్చీలు, నాలుగు కిటికీలు, ఒక గీజర్ వంటి స్వాధీనం చేసుకున్నారు. అయితే తలుపులు వంటివి కూడా చోరీకి గురి కావడంతో.. వాటని గుర్తించే పనిలో పడ్డారు. అయితే సీబీఐ ఆఫీసులో దొంగతనం వెనుక మరేదైనా కారణం ఉందా అనే కోణంలో కూడా పోలీసులు విచారణ జరుపుతున్నారు.
|
|