ఏపీలో అక్కడే మరో ఎయిర్‌పోర్టు.. .. 500 ఎకరాల భూమి అదనంగా

ఏపీలో మరో కొత్త ఎయిర్‌పోర్టు నిర్మాణం వేగంగా జరుగుతోంది. ఆంధ్రప్రదేశ్‌లో ప్రస్తుతం ఏడు విమానాశ్రయాల ద్వారా విమాన సర్వీసులు రాకపోకలు సాగిస్తున్నాయి. అయితే ఏపీలో మరిన్ని విమానాశ్రయాలు ఏర్పాటు చేయాలని కేంద్రం భావిస్తోంది. రాష్ట్ర ప్రభుత్వం నుంచి కూడా ఐదు కొత్త విమానాశ్రయాలు ఏర్పాటు చేయాలని ప్రతిపాదనలు వెళ్లాయి. వీటికి తోడు విజయనగరం జిల్లా భోగాపురంలో గ్రీన్ ఫీల్డ్ ఎయిర్‌పోర్టును నిర్మిస్తున్న సంగతి తెలిసిందే. భోగాపురం ఎయిర్‌పోర్టుకు అల్లూరి సీతారామరాజు అంతర్జాతీయ విమానాశ్రయం అని నామకరణం కూడా చేశారు. ప్రస్తుతం ఈ ఎయిర్‌పోర్టు పనులు వేగంగా జరుగుతున్నాయి. 2026 నాటికల్లా భోగాపురం ఎయిర్‌పోర్టు పనులు పూర్తి చేయాలనే లక్ష్యంతో అధికారులు పనిచేస్తున్నారు.

మరోవైపు భోగాపురం ఎయిర్‌పోర్టుకు ఏపీ ప్రభుత్వం అదనంగా 500 ఎకరాల భూమిని కేటాయించనుంది. 2203 ఎకరాల్లో భోగాపురం విమానాశ్రయం పనులు జరుగుతున్నాయి. అయితే ఎయిర్‌పోర్టు కోసం అదనంగా మరో 500 ఎకరాల భూమిని కేటాయించాలని పనులు చేపడుతున్న జీఎంఆర్ యాజమాన్యం ప్రభుత్వాన్ని కోరింది. జీఎంఆర్ కంపెనీ ప్రతిపాదనలపై పరిశీలన చేసేందుకు ఏపీ ప్రభుత్వం మంత్రుల కమిటీని ఏర్పాటు చేసింది. సోమవారం అమరావతిలోని సచివాలయంలో భోగాపురం విమానాశ్రయంపై ఆర్థిక మంత్రి పయ్యావుల కేశవ్ సమావేశం నిర్వహించారు. ఈ సమావేశంలో రోడ్లవలు, భవనాల శాఖ మంత్రి బీసీ జనార్ధన్ రెడ్డి, ఇతర ఉన్నతాధికారులు పాల్గొన్నారు. ఈ సందర్భంగా భోగాపురం విమానాశ్రయానికి అదనంగా 500 ఎకరాలు కేటాయించాలని మంత్రుల కమిటీ నిర్ణయించింది. అదనపు భూమి కేటాయింపు ద్వారా అభివృద్ధి, ఆదాయం రెండూ కలిసి వచ్చే అవకాశం ఉందని మంత్రుల కమిటీ భావిస్తోంది.

మరోవైపు భోగాపురం ఇంటర్నేషనల్ ఎయిర్‌పోర్టు పూర్తై అందుబాటులోకి వస్తే రాష్ట్ర అభివృద్ధికి ఉపయోగపడుతుందనే ఆలోచనలో ప్రభుత్వం ఉంది. ముఖ్యంగా ఉత్తరాంధ్ర ప్రాంత అభివృద్ధికి ఊతంగా భోగాపురం ఎయిర్‌పోర్టు నిలుస్తుంది. దేశీయ, విదేశీ ప్రయాణికుల రాకపోకలతో పాటుగా ఇంటర్నేషనల్, డొమెస్టిక్‌ కార్గో టెర్మినల్‌ అందుబాటులోకి వస్తే ఫార్మా, ఆక్వా ఉత్పత్తుల ఎగుమతులకు ఉపయోగపడుతుంది. అలాగే వాణిజ్య, పర్యాటక రంగాల అభివృద్ధి జరుగుతుందని అధికారులు చెప్తున్నారు. లక్ష్యంలోపు పనులు పూర్తిచేసేలా ఎయిర్ పోర్టు నిర్మాణ పనులు చేపడుతున్నారు.