ఆ ఒక్క వాక్యం తొలగింపు.. చైనా, అమెరికా మధ్య చిచ్చు

తైవాన్‌ విషయంలో అమెరికా తీసుకున్న ఓ నిర్ణయంపై చైనా తీవ్రంగా మండిపడింది. ‘‘తైవాన్‌ స్వాతంత్య్రానికి మేము మద్దతు ఇవ్వం’’ అని తమ విదేశాంగ శాఖ వెబ్‌సైట్‌లో ఉన్న ప్రకటనను తాజాగా అమెరికా తొలగించింది. ఇదే డ్రాగన్‌ కంట్రీ ఆగ్రహానికి కారణమైంది. దీనిపై చైనా విదేశాంగ శాఖ స్పందిస్తూ..‘‘తైవాన్‌ వేర్పాటు వాదానికి మద్దతిచ్చేవారికి ఇది తప్పుడు సంకేతాలు పంపుతుంది.. వెంటనే దీనిని సరిచేసుకోవాలి’ అని చైనా విదేశాంగశాఖ పేర్కొంది. తైవాన్‌కు సంబంధించిన విషయాల్లో అమెరికా వైఖరి తీవ్రమైందని మండిపడ్డింది. ‘ఇది చాలా సాహసోపేతమైన చర్య.. కానీ ట్రంప్ యంత్రాంగం తైవాన్ స్వాతంత్ర్యం లేదా అటువంటి విధాన మార్పునకు అమెరికా మద్దతు ఇస్తుందని మేము భావించడం లేదు’ అని చైనా విదేశాంగ శాఖ ప్రతినిధి యాంగ్ అన్నారు

యూఎస్ విదేశాంగ శాఖ తైవాన్‌-అమెరికా సంబంధాల ఫ్యాక్ట్‌షీట్‌లో గతంలో ‘‘మేము తైవాన్‌ స్వాతంత్య్రాన్ని సమర్థించం’’ అని ఉండేది. కానీ, ఈ వాక్యాన్ని గత వారం తొలగించిన అగ్రరాజ్యం... రొటీన్‌ అప్‌డేట్‌గా అభివర్ణించింది. అంతర్జాతీయ సంస్థలలో తైవాన్ చేరిక గురించి ‘దేశ హోదా అవసరం లేని చోట" అనే సూచనలను తొలగించింది.. ‘తైవాన్ వివాదాన్ని ఎటువంటి బలవంతపు చర్యలు ద్వారా కాకుండా ప్రజలకు ఆమోదయోగ్యమైన రీతిలో’ పరిష్కరించాలని పేర్కొంది. అంతేకాదు, తైవాన్ జాతీయ సైన్స్ అండ్ టెక్నాలజీ కౌన్సిల్‌కు పెంటగాన్ సహకారం అందుతుందని జతచేసింది. అయితే, తాము వన్‌ చైనా విధానానికి కట్టుబడి ఉన్నామని అమెరికా విదేశాంగశాఖ ప్రతినిధి వెల్లడించారు.

ఇక, తైవాన్‌లోని అమెరికా రాయబార కార్యాలయాన్ని దీనిపై సంప్రదించే ప్రయత్నం చేయగా అధికారులు అండుబాటులో లేదు ఎందుకంటే అమెరికాలో అధ్యక్షుల దినోత్సవం నేపథ్యంలో ఎంబసీని మూసివేశారు. అలాగే, అంతర్జాతీయ మీడియా దీనిపై ప్రశ్నించగా.. యుఎస్ స్టేట్ డిపార్ట్‌మెంట్ తక్షణమే స్పందించలేదు. మరోవైపు, తైవాన్‌ విషయంలో చైనా మళ్లీ కవ్వింపులకు దిగింది. ఆ ద్వీపం దిశగా భారీ స్థాయిలో యుద్ధనౌకలు, విమానాలను పంపింది. మొత్తం 41 యుద్ధ విమానాలు, 9 నౌకలను పంపినట్టు తైవాన్‌ రక్షణశాఖ ఓ ప్రకటనలో వెల్లడించింది. అటు, కెనడాకు చెందిన ఓ యుద్ధ నౌక తైవాన్‌ జలసంధి మీదుగా ప్రయాణించడంపై చైనా అభ్యంతరం తెలిపింది. హెచ్‌ఎంసీఎస్‌ ఒట్టావా శనివారం దక్షిణం నుంచి ఉత్తర ప్రాంతానికి ప్రయాణించడంపై ఆగ్రహం వ్యక్తం చేసింది.