అనుమానాస్పదంగా విద్యార్థి ఆత్మహత్య
Andhra Pradesh Telugu | Suryaa Desk | Published : Tue, Feb 18, 2025, 12:13 PM
అనంతపురం జిల్లాలోని ఆలమూరు రోడ్డులోని ఎస్ఆర్ జూనియర్ కళాశాలలో ఇంటర్ విద్యార్థి అనుమానాస్పద మృతి తీవ్ర కలకలం రేపుతోంది. శ్రీకాంత్ అనే విద్యార్థి కళాశాల వెనుక వైపు చెట్టుకు ఉరివేసుకుని మృతి చెందాడు. రాత్రి సమయంలో హాస్టల్ నుంచి బయటకు వెళ్లిన శ్రీకాంత్ చెట్టుకు వేలాడుతూ విగతజీవిగా కనిపించాడు. విషయం తెలిసిన వెంటనే తల్లిదండ్రులు అక్కడకు చేరుకుని.. వేలాడుతున్న మృతదేహాన్ని చూసి కన్నీరు మున్నీరుగా విలపిస్తున్నారు.
విద్యార్థి శ్రీకాంత్ స్వస్థలం ధర్మవరం మండలం మల్కాపురం గ్రామం. అయితే ఎస్ఆర్ కళాశాల యాజమాన్యం తీరుపై విద్యార్థి సంఘాలు ఆగ్రహం వ్యక్తం చేస్తున్నారు.సమాచారం అందిన వెంటనే పోలీసులు అక్కడకు చేరుకుని వివరాలు సేకరిస్తున్నారు. కేసు నమోదు చేసి దర్యాప్తు చేపట్టారు. అయితే ఫీజుల పేరుతో వేధించడంతోనే విద్యార్థి ఆత్మహత్య చేసుకున్నాడని కుటుంబసభ్యులు ఆరోపిస్తున్నారు. విద్యార్థి కుటుంబ సభ్యులను కళాశాలలోకి అనుమతించేందుకు పోలీసులు నిరాకరించారు. మరోవైపు ఇంత జరుగుతున్నప్పటికీ ఎస్ఆర్ కళాశాల సిబ్బంది అడ్రస్ లేకుండా పోయారు.
|
|