ల్యాండ్ అవుతూ అదుపుతప్పి బోల్తాపడిన విమానం

విమానాశ్రయంలో ల్యాండ్ అయిన తర్వాత విమానం అదుపుతప్పి బోల్తాపడిన ఘటన కెనడాలోని టొరంటోలో చోటుచేసుకుంది. టొరంటో పియర్‌సన్ అంతర్జాతీయ విమానాశ్రయంలో స్థానిక కాలమానం ప్రకారం సోమవారం మధ్యాహ్నం 3.30 గంటలకు జరిగిన ఈ ఘటనలో కనీసం 15 మందికిపైగా గాయపడ్డారు. వారిలో ముగ్గురి పరిస్థితి విషమంగా ఉన్నట్లు విమానాశ్రయ వర్గాలు వెల్లడించాయి. డెల్టా ఎయిర్‌లైన్స్‌కు చెందిన విమానం అమెరికాలోని మినియాపొలిస్‌ నుంచి వచ్చినట్టు పేర్కొన్నాయి. ఘటన జరిగిన వెంటనే భద్రత సిబ్బంది అప్రమత్తం కావడంతో ప్రాణనష్టం తప్పింది. క్షతగాత్రులను చికిత్స కోసం సమీపంలోని ఆసుపత్రికి తరలించారు. వారిలో ఓ చిన్నారి సహా మహిళ, పురుషుడి పరిస్థితి విషమంగా ఉంది. మిగతావారు స్వల్పంగా గాయపడినట్టు చెప్పారు.

ప్రమాదం జరిగిన విమానంలో 76 మంది ప్రయాణికలు, నలుగురు సిబ్బంది సహా 80 మంది ఉన్నట్టు తెలిపారు. ఈ ఘటనకు సంబంధించిన ఫోటోలు, వీడియోలు సోషల్ మీడియాలో వైరల్ అవుతున్నాయి. విమానం అదుపుతప్పి బోల్తాపడిన అనంతరం దట్టమైన పొగలు వెలువడ్డాయి. దీంతో ఫైర్ సేఫ్టీ సిబ్బంది హుటాహుటిన అక్కడకు చేరుకుని.. ఫైర్ ఇంజిన్ల సాయంతో వాటిని అదుపుచేశారు. విమానంలోని ఓ మహిళా ప్రయాణికులు సోషల్ మీడియాలో వీడియోను పోస్ట్ చేస్తూ.. తాను ఎక్కిన విమానం అదుపుతప్పి బోల్తాపడిందని, తల్లకిందులైందని అన్నారు. కొందరికి గాయాలయ్యాయని, మిగతావారు అంతా క్షేమంగా ఉన్నారని తెలిపారు. ఈ ఘటనలో ఎటువంటి ప్రాణనష్టం జరగలేదని డెల్టా ఎయిర్‌లైన్స్ సైతం తన అధికారిక ఎక్స్ (ట్విట్టర్)లో వెల్లడించింది.

మరోవైపు, ఆదివారం తూర్పు కెనడాను భారీ మంచు తుఫాను తాకింది. తుఫాను కారణంగా బలమైన శీతల గాలులు, ఎముకలు కొరికే చలితో జనం విలవిలాడుతున్నారు. ఈ తుఫాను కారణంగా పలు విమానాలు రద్దయ్యాయి. సోమవారానికి పరిస్థితి కొంత మెరుగుపడినా కనిష్ట ఉష్ణోగ్రతలు, బలమైన గాలులు ఉంటాయని వాతావారణ విభాగం అధికారులు ముందే హెచ్చరించారు. ప్రతికూల వాతావరణం కారణంగానే ఈ ఘటన జరిగినట్టు భావిస్తున్నారు. అయితే, దీనికి గల కారణాలను తెలుసుకోడానికి కెనడా పౌర విమానయాన విభాగం విచారణకు ఆదేశించింది.