బంగ్లాపై విజయంతో ఛాంపియన్స్ ట్రోఫీలో భారత్ బోణీ

గత కొన్ని రోజులుగా వన్డే క్రికెట్‌లో పరుగుల వరద పారిస్తున్న టీమిండియా వైస్ కెప్టెన్ శుభ్‌మన్ గిల్.. ఛాంపియన్స్ ట్రోఫీ తొలి మ్యాచ్‌లోనూ అదరగొట్టాడు. బంగ్లాదేశ్‌తో జరిగిన ఈ మ్యాచ్‌లో సెంచరీతో కదం తొక్కాడు. జట్టును ఒంటిచేత్తో గెలిపించాడు. తొలుత భారత బౌలర్లు రాణించడంతో బంగ్లాదేశ్.. 228 రన్స్‌కే ఆలౌట్ అయింది. శుభ్‌మ్ గిల్ సెంచరీతో భారత్.. 6 వికెట్ల తేడాతో ఘన విజయం సాధించింది. ఛాంపియన్స్ ట్రోఫీని విజయంతో ఆరంభించింది. శుభ్‌మన్ గిల్ ‘ప్లేయర్ ఆఫ్ మ్యాచ్’గా నిలిచాడు.

ఈ మ్యాచ్‌లో టాస్ గెలిచిన బంగ్లాదేశ్ తలుత బ్యాటింగ్ ఎంచుకుంది. అయితే భారత బౌలర్ల దెబ్బకు ఓ దశలో 35 పరుగులకే 5 వికెట్లు కోల్పోయి బంగ్లాదేశ్.. ఆ తర్వాత తౌహిద్ హ్రిదోయ్ (100), జాకిర్ అలీ (68) రాణించడంతో 49.4 ఓవర్లలో 228 రన్స్ చేసింది. భారత బౌలర్లలో మహమ్మద్ షమీ 5 వికెట్లతో సత్తా చాటాడు. హర్షిత్ రాణా 3, అక్షర్ పటేల్ 2 వికెట్లు తీాడు.

అనంతరం బ్యాటింగ్ ప్రారంభించిన భారత్‌కు ఓపెనర్లు శుభారంభం అందించారు. తొలి వికెట్‌కు 9.4 ఓవర్లలో 69 పరుగులు జోడించారు. ధాటిగా బ్యాటింగ్ చేస్తున్న రోహిత్ శర్మ 36 బంతుల్లో 41 రన్స్ చేసి తొలి వికెట్ రూపంలో వెనుదిరిగాడు. ఆ తర్వాత విరాట్ కోహ్లీ (22) కాసేపు నిలబడ్డా.. భారీ స్కోరు చేయలేకపోయాడు. శ్రేయస్ అయ్యర్ (15), అక్షర్ పటేల్ (8) కూడా త్వరగానే ఔట్ కావడంతో భారత్ ఓ దశలో 144 పరుగులకు 4 వికెట్లు కోల్పోయింది.

ఈ సమయంలో శుభ్‌మన్ గిల్‌కు జత కలిసిన కేఎల్ రాహుల్.. స్కోరు బోర్డును ముందుకు తీసుకెళ్లాడు. చేయాల్సిన స్కోరు తక్కువగానే ఉండటంతో ఈ జోడీ ఆచితూచి బ్యాటింగ్ చేసింది. ఈ క్రమంలోనే శుభ్‌మన్ గిల్ సెంచరీని కొట్టాడు. వన్డేల్లో 8వ సెంచరీ నమోదు చేశాడు. కాగా శుభ్‌మన్ గిల్‌కు ఇదే తొలి ఛాంపియన్స్ ట్రోఫీ కావడం గమనార్హం. ఈ టోర్నీలో ఆడిన తొలి మ్యాచ్‌లోనే అతడు మూడంకెల స్కోరు చేశాడు.

కేఎల్ రాహుల్ (47 బంతుల్లో 1రన్స్) కూడా రాణించడంతో భారత్.. 46.3 ఓవర్లలో 4 వికెట్లు కోల్పోయి లక్ష్యాన్ని ఛేదించింది. రాహుల్‌తో పాటు శుభ్‌మన్ గిల్ (101 నాటౌట్) కూడా అజేయంగా నిలిచాడు. బంగ్లాదేశ్ బౌలర్లలో రిషద్ హుసేన్ 2, తస్కిన్ అహ్మద్ 1, ముస్తాఫిజుర్ రెహ్మాన్ 1 వికెట్ తీశారు.

కాగా ఛాంపియన్స్ ట్రోఫీలో ఆడిన తొలి మ్యాచ్‌లోనే గెలిచి.. పాయింట్ల ఖాతాను తెరిచింది. గ్రూప్-ఏ పాయింట్ల పట్టికలో న్యూజిలాండ్ +1.200 నెట్ రన్ రేట్‌తో తొలి స్థానంలో ఉంది. నెట్ రన్ రేట్ తక్కువగా ఉన్నందున భారత్ రెండోస్థానంలో నిలిచింది. ఈ టోర్నీలో తన తర్వాతి మ్యాచులో టీమిండియా ఈనెల 23న పాకిస్థాన్‌తో తలపడనుంది.