నుమాయిష్‌లో మహిళ పట్ల అసభ్య ప్రవర్తన.. 247 మంది పోకిరీలు అరెస్ట్

నాంపల్లి ఎగ్జిబిషన్ (నుమాయిష్-2025) సమయంలో మహిళల పట్ల అసభ్యంగా ప్రవర్తించిన పోకిరీల ఆటకట్టించారు పోలీసులు. మొత్తం 247 మంది ఆకతాయిలను ‘షీ టీమ్స్’ అదుపులోకి తీసుకున్నాయని మహిళల భద్రత డీసీపీ వెల్లడించారు. జనవరి 3 నుంచి ఫిబ్రవరి 17 వరకు 45 రోజుల పాటు కొనసాగిన ఎగ్జిబిషన్‌లో పలు కేసులు నమోదయ్యాయి. మొత్తంగా 37 కేసుల్లో చట్టపరమైన చర్యలు తీసుకున్నట్టు ఆయన తెలిపారు. వీరిలో ఇద్దరు నిందితులకు 2 రోజుల జైలు శిక్ష, 33 మందికి రూ.1,050 చొప్పున జరిమానా విధించినట్లు డీసీపీ పేర్కొన్నారు. మరో 190 మంది నిందితులను హెచ్చరికతో వదిలిపెట్టామని ఆయన చెప్పారు.

ప్రస్తుతం మరో 20 కేసులు విచారణ దశ ఉన్నాయని అన్నారు. పట్టుబడ్డ 247 మందిలో 24 మంది మైనర్లు ఉన్నారని, మిగతా 223 మంది మేజర్లని ఈ మేరకు పోలీసు శాఖ ఓ ప్రకటన విడుదల చేసింది. మఫ్టీలో షీ టీమ్స్‌ను అందుబాటులో ఉంచి ఆకతాయిలను ఆటకట్టించారు. ఎగ్జిబిషన్ సందర్శనకు వేలల్లో వస్తున్న జనాల్లో కలిసిపోతూ మహిళలు, యువతులను వేధింపులకు గురిచేసే పోకిరీలను గుర్తించేందుకు ఎగ్జిబిషన్ గ్రౌండ్‌లో సీసీ కెమెరాలు ఏర్పాటు చేశారు. వీటి ఆధారంగా వెకిలి చేష్టలకు పాల్పడుతున్న వారిని అదుపులోకి తీసుకుని కోర్టు ముందు ప్రవేశపెట్టారు.

ఫిబ్రవరి మొదటి వారంలో బోరబండకు చెందిన ఇద్దరు విద్యార్థులు నుమాయిష్‌లో రెచ్చిపోయారు. మహిళలను తాకేందుకు ప్రయత్నిస్తూ, వెకిలి చేష్టలకు పాల్పడుతూ హల్‌చల్‌ చేశారు. వారిని షీటీమ్స్‌ అదుపులోకి తీసుకుని కౌన్సెలింగ్‌ ఇచ్చి తల్లిదండ్రులకు అప్పగించారు. గతంతో పోల్చితే ఈసారి ఇలాంటి ఘటనలకు పాల్పడిన నిందితులను పెద్ద సంఖ్యలో గుర్తించారు. టెక్నాలజీ సాయంతో వెకలి వేషాలు వేస్తోన్నవారిని గుర్తించి వారి ఆగడాలకు షీటీమ్స్ చెక్ పెట్టాయి.

కాగా, మహిళలపై వేధింపులను నివారించడానికి హైదరాబాద్ షీ టీమ్స్ బహిరంగ ప్రదేశాలల్ో నిరంతం పర్యవేక్షిస్తూనే ఉన్నాయి. పౌరులు అప్రమత్తంగా ఉండాలని, ఏవైనా సంఘటనల గురించి 100 సేవలు, సోషల్ మీడియా ద్వారా లేదా సమీపంలోని షీ టీమ్స్ కార్యాలయాన్ని సంప్రదించి ఫిర్యాదు చేయాలని సూచిస్తున్నారు.