దొంగతనాలు చేసి ప్రియురాళ్లను కుంభమేళా తీసుకెళ్లిన యువకులు

మధ్య ప్రదేశ్‌లోని ఇండోర్‌కు చెందిన అజయ్ శుక్లా, సంతోష్ కోరిలు స్నేహితులు. అయితే వీరిద్దరూ చెరో అమ్మాయిని ప్రేమిస్తున్నారు. ఈక్రమంలోనే నలుగురూ కలిసి తిరుగుతూ ఫుల్లుగా ఎంజాయ్ చేస్తున్నారు. ఇటీవలే కుంభమేళా ప్రారంభం కాగా.. ఈ రెండు జంటలు కలిసి అక్కడకు వెళ్లాలనుకున్నాయి. అయితే అజయ్, సంతోష్‌ల వద్ద ప్రియురాళ్లను తీసుకుని కుంభమేళా వెళ్లేందుకు డబ్బులు లేవు. ఎలాగైనా సరే డబ్బులు జమ చేసి వారితో కలిసి ప్రయాగ్‌రాజ్‌లో వెళ్లాలని నిర్ణయించుకున్నారు. ప్రియురాళ్లకు కూడా తీసుకెళ్తామని మాటిచ్చారు.

ఈక్రమంలోనే అజయ్, సంతోష్‌లు ఇద్దరూ కలిసి డబ్బుల కోసం దొంగతనాలు చేయాలనుకున్నారు. ఎంత ఎక్కువ మొత్తంలో దోచేస్తే అంత బాగా ఎంజాయ్ చేయొచ్చని భావించారు. ఈక్రమంలోనే ద్వారకానగర్‌లోని అనేక ఇళ్లల్లో చోరీలకు పాల్పడ్డారు. బంగారు ఆభరణాలు సహా, దొరికినకాడికి నగదును దోచేశారు. ఆపై ప్రియురాళ్లను తీసుకుని ఉత్తర ప్రదేశ్‌లోని ప్రయాగ్‌రాజ్‌లో జరుగుతున్న మహా కుంభమేళా వెళ్లారు. అక్కడే పుణ్య స్నానాలు చేస్తూ.. ఫుల్లుగా ఎంజాయ్ చేస్తున్నారు.

అయితే తమ ఇళ్లల్లో చోరీలు జరిగిన బాధితులంతా పోలీసులను ఆశ్రయించారు. ఈక్రమంలోనే కేసు నమోదు చేసుకున్న పోలీసులు దర్యాప్తు చేశారు. చోరీ జరిగిన స్థలాల్లో నిందితుల వేల ముద్రలు గుర్తించారు. ఈక్రమంలోనే 15 చోట్ల చోరీలకు పాల్పడింది అజయ్, సంతోష్‌లేనని తేల్చారు. ఆపై వారి సెల్ ఫోన్ల సిగ్నల్ ఆధారంగా కుంభమేళా వెళ్లినట్లు గుర్తించారు. దీంతో వారిని పట్టుకునేందుకు పోలీసులు సైతం కుంభమేళా వెళ్లారు. కానీ అక్కడ భక్తుల రద్దీ ఎక్కువగా ఉండడంతో వారిని గుర్తించలేకపోయారు. తిరిగి మధ్య ప్రదేశ్ చేరుకున్నారు.

ఈక్రమంలోనే అజయ్, సంతోష్‌లు కుంభమేళాల నుంచి ప్రియురాళ్లను తీసుకుని తిరిగి ఇంటికి చేరుకున్నారు. ఈక్రమంలోనే పోలీసులు వీరిద్దరినీ అరెస్ట్ చేశారు. మొత్తంగా 4 లక్షల విలువైన నగదు, బంగారు ఆభరణాలను స్వాధీనం చేసుకున్నారు. ఆపై విచారణ జరపగా.. తామే ఈ దంగతనాలను పాల్పడ్డట్లు నిందితులు ఒప్పుకున్నారు. మొత్తంగా 15 చోట్ల చోరీలు చేయగా.. రూ.7 లక్షల విలువైన సొమ్మును కాజేసినట్లు చెప్పారు. అయితే ఇందులో ఎక్కువ మొత్తంలో డబ్బులు ఖర్చు చేసినట్లు కూడా స్పష్టం చేశారు.