భర్త షికారుకు తీసుకెళ్లలేదని భార్య ఆత్మహత్య

అమ్మ తిట్టిందని, నాన్న కొట్టాడని.. ఇలా ప్రతి విషయానికీ ఎమోషనల్ అయ్యే రోజులివి. సెల్ ఫోన్ కొనివ్వలేదనే కోపంతో యువకుడు, ఆన్‌లైన్‌లో గేమ్స్ ఆడనివ్వలేదనే కోపంతో చిన్నారి.. బలవన్మరణానికి పాల్పడ్డారనే వార్తలు నిత్యం చూస్తున్నాం, వింటున్నాం. అలాంటి ఘటనే అనకాపల్లి జిల్లాలో చోటుచేసుకుంది. భర్త షికారుకు తీసుకెళ్లలేదనే మనస్తాపంతో ఓ భార్య ఉరివేసుకుని ఆత్మహత్య చేసుకుంది. ఈ దంపతులకు ఏడు నెలల చిన్నారి. క్షణికావేశంలో తల్లి తీసుకున్న తప్పుడు నిర్ణయంతో ఇప్పుడా చిన్నారి అమ్మ ప్రేమకు దూరమైంది.

పోలీసులు, మృతురాలి కుటుంబసభ్యులు చెప్తున్న వివరాల ప్రకారం.. అనకాపల్లి పట్టణంలోని సాగిసుబ్బరాజు వీధికి జ్యోతి అనే యువతి రెండేళ్ల కిందట ప్రేమ వివాహం చేసుకుంది. అబ్దుల్ గనీ అనే యువకుణ్ని ప్రేమించి 2023లో ప్రేమ వివాహం చేసుకుంది. వీరికి ఏడు నెలల బాబు కూడా ఉన్నాడు. అయిత ప్రసవం కోసం పుట్టింటికి వచ్చిన జ్యోతి అప్పటి నుంచి తల్లి దగ్గరే ఉంటోంది. ఫిబ్రవరి 18వ తేదీన భార్య, కొడుకును చూడటానికి అని అబ్దుల్ గనీ అత్తగారింటికి వచ్చారు. అయితే భర్త ఇంటికి రాగానే జ్యోతి తనను షికారుకు తీసుకెళ్లమని అబ్దుల్ గనీని కోరింది. అక్కడే ఉన్న జ్యోతి తల్లి కుమారి.. ఇది విని ఆమెను మందలించింది. ఈ సమయంలో బయట తిరగడం మంచిది కాదంటూ కోప్పడింది.

తల్లి మందలించటంతో కోపగించుకున్న జ్యోతి.. ఆవేశంతో మేడ మీదకు వెళ్లింది. క్షణికావేశంలో ఉరివేసుకుంది. జ్యోతి ఉరి వేసుకోవటం గమనించిన కుటుంబసభ్యులు వెంటనే ఆమెను కిందకు దించి.. చికిత్స కోసం కేజీహెచ్‌కు తరలించారు. అప్పటి నుంచి కేజీహెచ్ ఆస్పత్రిలో చికిత్స పొందుతున్న జ్యోతి.. గురువారం రాత్రి చనిపోయినట్లు పోలీసులు తెలిపారు. ఈ ఘటనపై కేసు నమోదు చేసుకుని దర్యాప్తు ప్రారంభించారు. అయితే భర్త షికారుకు తీసుకెళ్లలేదనే కోపంతో భార్య ఆత్మహత్య చేసుకోవటంతో వారి ఏడు నెలల బాబు.. ఇప్పుడు అమ్మ ప్రేమకు దూరమయ్యాడు. క్షణికావేశంలో యువతి చేసిన తప్పునకు.. ఓ చిన్నారి తల్లి ప్రేమకు దూరం కావాల్సి వచ్చిందని ఈ విషయం తెలిసిన వారు ఆవేదన వ్యక్తం చేస్తున్నారు.