తియ్యగా పలకరింపు.. రాత్రికి కథ వేరే

అమ్మో ఈ కేటుగాళ్ల రూటే సపరేటు.. బావగారు లేరా అండి, అన్నయ్య గారు లేరా అండీ అంటూ వస్తారు. మెల్లిగా మాటలు కలుపుతాడు. పగలు అలా నటిస్తారు.. రాత్రికి వచ్చి పని ముగించుకునివెళతారు. ఓ కేసులో పోలీసులకు అడ్డంగా దొరికిపోయాడు.. పశ్చిమ గోదావరి జిల్లా భీమవరంలో ఈ దొంగ చోరీలు చేసే స్టైల్ గురించి తెలిసి అందరూ అవాక్కయ్యారు. మనోడు చోరీ చేసే ప్లాన్ కూడా కాస్త గమ్మత్తుగా ఉంటుంది.

భీమవరం మెంటేవారితోటలో నివాసం ఉంటున్న ఆర్‌ ఆంజనేయస్వామి ఇంటికి తాళం వేసి.. కొద్దిరోజుల క్రితం కుటుంబ సభ్యులతో కలిసి బంధువుల ఇంటికి వెళ్లారు. తణుకు అజ్జరం రోడ్డు ఇందిరమ్మ కాలనీకి చెందిన నగరపు ఈశ్వరరావు, తణుకు మండలం పాతూరుకు చెందిన తండాసి కామేశ్వరరావు రంగంలోకి దిగారు. ఇంటికి తాళాలు వేసి ఉండటాన్ని గమనించి వెళ్లారు.. ఆ చుట్టుపక్కల ఇళ్లలో వాళ్లు ఎక్కడికి వెళ్లారో వివారాలు ఆరా తీశారు. ఆ కుటుంబం బంధువుల ఇంటికెళ్లినట్లుగా నిర్ధారించుకున్నారు.

పగటి సమయంలో వాకబు చేసి రాత్రి ప్లాన్ అమలు చేశారు.

ఈ ఇద్దరు అర్ధరాత్రి వేళ ఇంట్లోకి చొరబడి రూ.1.10 లక్షలు విలువైన బంగారం ఎత్తుకెళ్లారు. బాధితుడు ఆంజనేయస్వామి ఫిర్యాదుతో పోలీసులు కేసు నమోదు చేశారు. ఈ చోరీ వ్యవహారంలో బృందాలుగా ఏర్పడి గాలించారు.. చివరికి దొంగలను పట్టుకున్నారు. భీమవరంలో అనుమానాస్పదంగా తిరుగుతున్న ఈశ్వరరావు, కామేశ్వరరావులను అరెస్టు చేశారు. వారిని పోలీసులు ప్రశ్నించగా.. తాడేపల్లిగూడెం టౌన్ పోలీస్‌స్టేషన్‌ పరిధిలోని ఓ ఇంట్లోనూ రూ.1.80 లక్షలు విలువైన ఆభరణాలు ఎత్తుకెళ్లినట్లు తేలింది. వీరిపై ఇతర జిల్లాల్లోనూ కేసులున్నాయని.. నిందితులను చాకచక్యంగా పట్టుకున్న సిబ్బంది పోలీస్ ఉన్నతాధికారులు అభినందించారు. వీరు పగటి వేళలో తాళాలు వేసిన ఇళ్లను చూసుకుని.. ఆ పక్క ఇళ్లలో ఉండేవాళ్ల దగ్గరకు వెళతారు.. బావగారు, అన్నయ్యగారు లేరా అండీ, లేకపోతే ఎప్పుడొస్తారండి అంటూ ఏదో బంధుత్వం ఉన్నట్లు నటిస్తారు. వాళ్లు ఊళ్లో లేరని తెలియగానే రాత్రికి ఇళ్లలో చొరబడి చోరీలు చేస్తున్నారు.