ఛాంపియన్స్ ట్రోఫీలో ఇంగ్లాండ్ బ్యాటర్ల రికార్డులు బద్దలు

ఇటీవల భారత్‌తో వన్డే సిరీస్‌లో చిత్తుగా ఓడిపోయిన ఇంగ్లాండ్ జట్టు ఛాంపియన్స్ ట్రోఫీలో తన తొలి మ్యాచ్‌లో సత్తాచాటింది. ముఖ్యంగా ఆ జట్టు బ్యాటర్లు ఆస్ట్రేలియా బౌలర్లపై ఎదురుదాడికి దిగారు. కమిన్స్, స్టార్క్, హేజిల్‌వుల్ దూరం కావడంతో బలహీనంగా మారిన ఆస్ట్రేలియా బౌలింగ్‌ యూనిట్‌ను ఆట ఆడుకున్నారు. ఈ క్రమంలోనే ఛాంపియన్స్ ట్రోఫీ చరిత్రలోనే అత్యధిక స్కోరును నమోదు చేశారు. అంతేకాకుండా ఇంగ్లాండ్ ఓపెనర్ బెన్ డకెట్.. ఛాంపియన్స్ ట్రోఫీలో అత్యధిక వ్యక్తిగత స్కోరును సైతం తన పేరిట లిఖించుకున్నాడు.

ఈ మ్యాచ్‌లో టాస్ గెలిచిన ఆస్ట్రేలియా కెప్టెన్ స్టీవ్ స్మిత్ తొలుత బౌలింగ్ ఎంచుకున్నాడు. అయితే వేగంగా ఆడే క్రమంలో ఇంగ్లాండ్ జట్టు త్వరగా రెండు వికెట్లు కోల్పోయింది. దీంతో 43 పరుగులకు రెండు వికెట్లు కోల్పోయింది. ఈ దశలో ఓపెనర్ బెన్ డకెట్‌కు స్టార్ ప్లేయర్ జో రూట్ జతకలిశాడు. వీరిద్దరూ వేగంగా బ్యాటింగ్ చేస్తూ స్కోరు బోర్డును పరుగులు పెట్టించారు. ఈ క్రమంలోనే బెన్ డకెట్ సెంచరీ పూర్తి చేసుకున్నాడు. జో రూట్.. 78 బంతుల్లో 68 రన్స్ చేసి ఔట్ అయ్యాడు.

మిగతా బ్యాటర్ల నుంచి ఆశించిన మేర సహకారం లేకపోయినా డకెట్ మాత్రం దూకుడుగా బ్యాటింగ్ చేశాడు. ఈ క్రమంలోనే ఛాంపియన్స్ ట్రోఫీ చరిత్రలో ఇదే అత్యధిక స్కోరు నమోదు చేశాడు. ఈ మ్యాచ్‌లో అతడు 143 బంతుల్లో 165 రన్స్ స్కోరు చేశాడు. 48వ ఓవర్‌లో ఏడో వికెట్‌గా వెనుదిరిగాడు. చివర్లో జోఫ్రా ఆర్చర్ (10 బంతుల్లో 21 రన్స్‌) ధాటిగా బ్యాటింగ్ చేయడంతో ఇంగ్లాండ్ స్కోరు 350 పరుగుల మార్కును దాటింది.

బెన్ డకెట్ రికార్డు ఇన్నింగ్స్‌..

ఈ ఇన్నింగ్స్ ద్వారా బెన్ డకెట్‌ టోర్నీ చరిత్రలో అత్యధిక వ్యక్తిగత రన్స్ చేసిన ఆటగాడిగా నిలిచాడు. అంతకుముందు ఈ రికార్డు.. న్యూజిలాండ్‌కు చెందిన నాథన్ ఆస్ట్లే, జింబాబ్వేకు చెందిన ఆండీ ఫ్లవర్‌ పేరిట ఉంది. ఆస్ట్లే 2004లో అమెరికాతో మ్యాచ్‌లో 145* రన్స్ చేశాడు. ఆండీ ఫ్లవర్‌ 2002లో భారత్‌పై 145 రన్స్ చేశాడు. ఆ తర్వాత సౌరవ్ గంగూలీ (141), సచిన్ టెండూల్కర్‌ (141)లు ఈ జాబితాలో ఉన్నారు.

చరిత్ర సృష్టించిన ఇంగ్లాండ్..

ఈ మ్యాచ్ ద్వారా ఛాంపియన్స్ ట్రోఫీలో అత్యధిక స్కోరు నమోదు చేసిన జట్టుగా ఇంగ్లాండ్ అవతరించింది.

ఛాంపియన్స్ ట్రోఫీలో అత్యధిక స్కోరు చేసిన జట్లు..

351/8 ఇంగ్లాండ్ (ఆస్ట్రేలియాపై, 2025)

347/4 న్యూజిలాండ్ (అమెరికాపై, 2004)

338/4 పాకిస్థాన్ (భారత్‌పై, 2017)

331/7 భారత్ (దక్షిణాఫ్రికాపై, 2013)

323/8 ఇంగ్లాండ్‌ (దక్షిణాఫ్రికాపై, 2009)