లక్షకు రూ. 2 లక్షలు.. 5 లక్షలకు 10 లక్షలు

 చాలా మంది సంపాదిస్తున్నప్పటికీ.. దానిని సరైన విధంగా పొదుపు చేయలేక.. మదుపు చేయలేక.. మంచి రాబడిని కోల్పోతుంటారు. కొందరికి పెట్టుబడి పెట్టాలన్న ఆసక్తి ఉన్నప్పటికీ.. ఎక్కడ ఇన్వెస్ట్ చేయాలో తెలియక ఇబ్బందులు పడుతుంటారు. ఇంకొందరు పెట్టుబడి పెడితే ఎక్కడ ఆ డబ్బులు రావో.. పోతాయో అన్న కంగారులో ఉంటారు. ఇలాంటి వారి కోసం ఎలాంటి రిస్క్ లేని పథకాలు కూడా మనకు చాలానే ఉన్నాయి. స్టాక్ మార్కెట్లు, మ్యూచువల్ ఫండ్లు వంటి వాటిల్లో పెట్టుబడులు అంటే రిస్క్‌తో కూడుకున్నవి ఉంటాయి. కానీ.. కేంద్ర ప్రభుత్వం అందించే పోస్టాఫీస్ పథకాలు బెస్ట్ అని చెప్పొచ్చు. వీటినే చిన్న మొత్తాల పొదుపు పథకాలు అంటారు. ఇక్కడ ఎలాంటి రిస్క్ ఉండదు.

ఈ పోస్టాఫీస్ పథకాల్లో నిర్దిష్ట వడ్డీ రేటు ప్రకారం.. నిర్ణీత కాల వ్యవధిలో రిటర్న్స్ వస్తాయి. వీటిల్లో ఒక పథకం కిసాన్ వికాస్ పత్ర. ఇక్కడ కచ్చితంగా మీ పెట్టుబడి డబుల్ అవుతుంది. ఎలాంటి రిస్కూ అవసరం లేదు. దీంట్లో మీరు కనీసం రూ. 1000 నుంచి ఇన్వెస్ట్ చేయొచ్చు. గరిష్టంగా ఎలాంటి పరిమితి లేదు. అంటే ఎంతైనా మీ స్థోమతను బట్టి ఇన్వెస్ట్ చేసే అవకాశం ఉంటుంది. దీంట్లో ప్రస్తుతం 7.50 శాతం వడ్డీ రేటు ఉంది.

ఇక దీని ప్రకారం.. సరిగ్గా 115 నెలల్లో మీరు పెట్టిన పెట్టుబడి డబుల్ అవుతుంది. అంటే 9 సంవత్సరాల 7 నెలలు పడుతుంది. ఇక్కడ ఎంతైనా అంటే ఉదాహరణకు మీరు లక్ష ఇన్వెస్ట్ చేస్తే.. 115 నెలలకు రూ. 2 లక్షలు వస్తాయి. ఇలాగే రూ. 5 లక్షలు పెడితే రూ. 10 లక్షలు వస్తాయి. రూ. 20 లక్షలు జమ చేస్తే.. 115 నెలల్లో అది రూ. 40 లక్షలు అవుతుంది. అందుకే ఈ పథకానికి మంచి డిమాండ్ ఉంది.

పోస్టాఫీస్ లేదా గుర్తింపు పొందిన బ్యాంకుల్లో.. సింగిల్ అకౌంట్ తెరవొచ్చు. లేదా గరిష్టంగా ముగ్గురు కలిసి జాయింట్ అకౌంట్ తెరవొచ్చు. మైనర్ పేరిట గార్డియెన్ అకౌంట్ తెరవొచ్చు. ఈ స్కీమ్ కింద ఎన్ని అకౌంట్లయినా తెరిచే వీలుంటుంది. కొన్ని ప్రత్యేక పరిస్థితుల్లో అకౌంట్ తెరిచిన రెండేళ్ల 6 నెలల తర్వాత ఎప్పుడైనా ముందస్తు ఉపసంహరణకు అవకాశం ఉంటుంది. ఇక పోస్టాఫీస్ పథకాల్లో వడ్డీ రేట్లను కేంద్రం ప్రతి 3 నెలలకు ఓసారి సవరిస్తుంటుంది. ఇక్కడ వడ్డీ రేట్లు పెరగొచ్చు లేదా తగ్గొచ్చు లేదా స్థిరంగా ఉండొచ్చు. వడ్డీ రేట్లు పెరిగితే రాబడి ఇంకాస్త ఎక్కువగా ఉంటుందని గుర్తించాలి.