చరిత్రలో తొలిసారి బారాముల్లా యువత సంబరాలు

ఛాంపియన్స్ ట్రోఫీలో చిరకాల ప్రత్యర్థి పాకిస్థాన్‌పై టీమిండియా గెలుపుతో కశ్మీర్ నుంచి కన్యాకుమారి వరకూ యావత్తు దేశం సంబరాలు చేసుకుంటోంది. ముఖ్యంగా యువత రోడ్లపైకి వచ్చి బాణాసంచా కాల్చుతూ మిఠాయిలు పంచుకున్నారు. ఒకప్పుడు పాకిస్థాన్ జిందాబాద్ అనే నినాదలు వినిపించిన ఉత్తర కశ్మీర్‌లోనూ భారత్ మాతాకీ జై అంటూ జాతీయ జెండాలతో యువతరం నినదించింది. ఉత్తర కశ్మీర్‌లోని బారాముల్లా పట్టణంలో యువత ఆదివారం రాత్రి వీధుల్లో భారీ ఎత్తున టపాసులు పేల్చుతూ.. కేరింతలు కొడుతూ ఉత్సాహభరిత వాతావరణంలో భారత జట్టు విజయాన్ని సెలబ్రేట్ చేసుకున్నారు

బారాముల్లాలోని వివిధ ప్రాంతాలలో స్థానికులు గుమిగూడి ఆనందోత్సాహాల్లో మునిగితేలారు. ఇది క్రికెట్ పట్ల అభిమానాన్ని హైలెట్ చేయడమే కాకుండా.. ప్రాంతీయ, సాంస్కృతిక అంతరాన్ని పక్కనబెట్టి ప్రజలను ఏకం చేయడంలో క్రీడలకు ఉండే శక్తిని తెలియజేసింది. ‘ఈ విజయాన్ని నా స్నేహితులు, తోటి అభిమానులతో జరుపుకోవడం చాలా బాగుంది’ అని ఒక యువకుడు.. ‘క్రికెట్ మాకు కేవలం ఆట కంటే ఎక్కువ.. ఇది మనందరినీ ఒకచోట చేర్చుతుంది’ అని మరొకరు అన్నారు. దీనికి సంబంధించిన వీడియోలు ప్రస్తుతం సోషల్ మీడియాలో తెగ వైరల్ అవుతున్నాయి.

జమ్మూ కశ్మీర్‌‌లోని బారాముల్లాలో ఇలా భారత్ విజయాన్ని అక్కడ స్థానికులు వేడుకగా జరుపుకోవడం ఇదే మొదటిసారి. కశ్మీర్‌కు ప్రత్యేక హోదా కల్పించే ఆర్టికల్ 370 రద్దు తర్వాత పరిస్థితుల్లో వచ్చిన మార్పునకు ఇదే నిదర్శనం. ఛాంపియన్స్ ట్రోఫీలో భాగంగా దుబాయ్‌లో భారత్, పాకిస్థాన్ జట్ల మధ్య జరిగిన మ్యాచ్‌లో టీమిండియా ఆరు వికెట్ల తేడాతో విజయం సాధించింది. టాస్ గెలిచిన పాకిస్థాన్ జట్టు.. ముందుగా బ్యాటింగ్ ఎంచుకుంది. భారత బౌలర్ల ధాటికి పాక్ బ్యాటింగ్ లైనప్ కుప్పకూలింది. ఆ జట్టు 49.4 ఓవర్లలో 241 పరుగులకు ఆలౌట్ అయింది. పాక్ జట్టులో సౌద్ షకీల్ అత్యధికంగా 66 పరుగులు చేశాడు. భారత్ బౌలర్ కుల్దీప్ యాదవ్ అత్యధికంగా 3 వికెట్లు పడగొట్టాడు. అనంతరం బ్యాటింగ్‌కు దిగిన రోహిత్ సేన మరో 7.3 ఓవర్లు మిగిలుండగానే లక్ష్యాన్ని చేధించింది. విరాట్ కోహ్లీ అజేయ సెంచరీతో 242 పరుగుల లక్ష్యాన్ని ఛేదించి 6 వికెట్ల తేడాతో మ్యాచ్‌ను గెలుచుకుంది. కోహ్లీ అంతర్జాతీయ కెరీర్‌లో 82వ సెంచరీ సాధించారు. విన్నింగ్ షాట్‌‌తోనే కోహ్లీ ఈ సెంచరీ చేయడం విశేషం