ఉద్యోగులకు వారానికి .. 47.5 గంటలు చాలు: క్యాప్‌జెమినీ సీఈఓ

దేశంలో ఉద్యోగుల పని గంటలపై కొన్ని నెలల క్రితం ఇన్ఫోసిస్ ఫౌండర్ నారాయణ మూర్తి చేసిన వ్యాఖ్యలు దేశవ్యాప్తంగా తీవ్ర చర్చనీయాంశంగా మారిన సంగతి తెలిసిందే. నారాయణమూర్తి చేసిన వ్యాఖ్యలను కొందరు సమర్థించగా.. మరికొందరు తీవ్రంగా వ్యతిరేకించారు. ప్రపంచ దేశాలతో భారత్ పోటీ పడాలంటే.. మన దేశంలోని యువత వారానికి 70 గంటలు తప్పనిసరిగా పని చేయాలని నారాయణమూర్తి పేర్కొన్నారు. ఇక ఎల్ అండ్ టీ ఛైర్మన్ ఎస్ఎస్ సుబ్రహ్మణ్యన్ అయితే.. మరొక అడుగు ముందుకేసి వారానికి 90 గంటలు పనిచేయాలని చెప్పడం తీవ్ర విమర్శలకు తావిచ్చింది. ఈ నేపథ్యంలోనే క్యాప్‌జెమినీ సీఈఓ అశ్విన్ యార్ది.. ఉద్యోగుల పని గంటలపై తన అభిప్రాయాన్ని వ్యక్తం చేశారు.

రోజుకు 9.30 గంటల చొప్పున వారానికి 5 రోజులు పనిచేస్తే చాలని క్యాప్‌జెమినీ ఇండియా సీఈఓ అశ్విన్‌ యార్ది వెల్లడించారు. తాజాగా నేషనల్ అసోసియేషన్ ఆఫ్ సాఫ్ట్‌వేర్ అండ్ సర్వీస్ కంపెనీస్-నాస్కామ్ టెక్నాలజీ అండ్‌ లీడర్‌షిప్‌ ఫోరంలో ఆయన పాల్గొన్నారు. అందులో ఒక ఉద్యోగి వారానికి ఎన్ని గంటలు పనిచేయాలని మీరు కోరుకుంటున్నారు అనే ప్రశ్న అశ్విన్ యార్దిని అడిగారు. దానికి సమాధానం ఇచ్చిన అశ్విన్ యార్ది.. వారానికి ఒక ఉద్యోగి 47.5 గంటలు పనిచేస్తే సరిపోతుందని పేర్కొన్నారు. అందుకోసం రోజుకు 9.30 గంటల పని చొప్పున వారానికి కేవలం 5 రోజులు మాత్రమే పనిచేస్తే చాలని క్యాప్‌జెమినీ ఇండియా సీఈఓ వెల్లడించారు.

అంతేకాకుండా ఉద్యోగులకు వీకెండ్స్‌లలో ఈ- మెయిల్స్‌ పంపొద్దని కంపెనీలకు అశ్వినీ యార్ది హితవు పలికారు. గత 4 ఏళ్లుగా తాను ఇదే సూత్రం పాటిస్తున్నట్లు వివరించారు. అయితే తాను కొన్నిసార్లు వారాంతాల్లో కూడా పనిచేస్తానని అంగీకరించిన అశ్వినీ యార్ది.. కానీ ఆ సమయంలో తమ ఉద్యోగులకు మాత్రం ఎలాంటి ఈ-మెయిల్స్ పంపించనని తేల్చి చెప్పారు.

ఇక ఇదే నాస్కామ్ టెక్నాలజీ అండ్ లీడర్‌షిప్ ఫోరంలో పాల్గొన్న నాస్కామ్ ఛైర్‌పర్సన్‌ సింధు గంగాధరన్‌ కూడా దాదాపుగా ఇలాంటి అభిప్రాయాన్నే వ్యక్తం చేశారు. ఉద్యోగుల పనివేళల కంటే పని ఉత్పాదకతే చాలా ముఖ్యమని వెల్లడించారు. ఉద్యోగుల పనిగంటలపై ఇప్పటికే నారాయణ మూర్తి, ఎస్‌ఎన్‌ సుబ్రహ్మణ్యన్‌ చేసిన వ్యాఖ్యలు నెట్టింట తీవ్ర చర్చకు దారితీయగా.. అలాంటి సమయంలో క్యాప్‌జెమినీ సీఈఓ అశ్వినీ యార్ది చేసిన వ్యాఖ్యలు ప్రాధాన్యం సంతరించుకున్నాయి.