ఛాంపియన్స్ ట్రోఫీ హిస్టరీలోనే తొలిసారిగా..దంచికొట్టిన ఇబ్రహీం జద్రాన్

ఐసీసీ ఛాంపియన్స్ ట్రోఫీలో భాగంగా లాహోర్ వేదికగా ఇంగ్లండ్‌తో జరుగుతున్న మ్యాచ్‌లో అఫ్గానిస్తాన్ బ్యాటర్ ఇబ్రహీం జద్రాన్ రికార్డుల మోత మోగించాడు. సంచలన ఇన్నింగ్స్‌తో అఫ్గానిస్తాన్‌కు భారీ స్కోరు అందించాడు. 146 బంతుల్లో 12 ఫోర్లు, 6 సిక్సర్ల సాయంతో 177 పరుగులు చేసిన ఇబ్రహీం జద్రాన్.. ఛాంపియన్స్ ట్రోఫీ చరిత్రలో అత్యధిక వ్యక్తిగత స్కోరు సాధించిన ప్లేయర్‌గా నిలిచాడు. ఇంగ్లండ్ ప్లేయర్ బెన్ డకెట్ 165 పరుగులతో ఇటీవలే ఈ రికార్డు నెలకొల్పాడు. ఆస్ట్రేలియాతో జరిగిన మ్యాచ్‌లో బెన్ డకెట్ 165 పరుగులతో ఈ రికార్డు నెలకొల్పగా.. 177 పరుగులతో ఇబ్రహీం జద్రాన్ ఆ రికార్డు బ్రేక్ చేశాడు. అలాగే ఛాంపియన్స్ ట్రోఫీలో 150కి పైగా పరుగుల స్కోరు చేసిన తొలి ఆసియా ప్లేయర్‌గానూ ఇబ్రహీం జద్రాన్ రికార్డు నెలకొల్పాడు. ప్రపంచకప్, ఛాంపియన్స్ ట్రోఫీలలో సెంచరీలు చేసిన తొలి అఫ్గానిస్తాన్ బ్యాటర్‌గానూ ఇబ్రహీం జద్రాన్ ఘనత సాధించాడు.

మరోవైపు ఇబ్రహీం జద్రాన్ మెరుపు ఇన్నింగ్స్ కారణంగా అఫ్గానిస్తాన్ నిర్ణీత 50 ఓవర్లలో 7 వికెట్ల నష్టానికి 325 పరుగులు చేసింది. ఛాంపియన్స్ ట్రోఫీలో సెమీస్ చేరాలంటే ఇంగ్లండ్, అఫ్గానిస్తాన్ జట్లకు ఈ మ్యాచ్‌లో గెలవడం తప్పనిసరి. ఇలాంటి పరిస్థితుల్లో టాస్ గెలిచిన అఫ్గానిస్తాన్ తొలుత బ్యాటింగ్ ఎంచుకుంది. అయితే ఇంగ్లండ్ పేసర్ జోఫ్రా ఆర్చర్ పేస్ దెబ్బకు ఆదిలోనే మూడు వికెట్లు కోల్పోయింది. మొదటి పవర్ ప్లేలోనే అఫ్గానిస్తాన్ మూడు కీలక వికెట్లు కోల్పోయింది. 37 పరుగులకే రహ్మనుల్లా గుర్భాజ్, అటల్, రహ్మత్ షా పెవిలియన్ చేరారు.

ఈ సమయంలో ఓపెనర్ ఇబ్రహీం జద్రాన్, కెప్టెన్ షాహిదితో కలిసి కీలక భాగస్వామ్యం నెలకొల్పారు. నాలుగో వికెట్‌కు 100 పరుగులకు పైగా భాగస్వామ్యం నెలకొల్పారు. కుదురుకున్న తర్వాత ఇబ్రహీం జద్రాన్ ఆకాశమే హద్దుగా చెలరేగిపోయాడు. ఫోర్లు, సిక్సర్లతో విరుచుకుపడ్డాడు. జద్రాన్‌కు జతగా కెప్టెన్ షాహిది( 40), ఒమర్జాయ్ (41), ఆఖర్లో మహ్మద్ నబీ ( 24 బంతుల్లో 40) సత్తా చాటడంతో అఫ్గానిస్తాన్ భారీ స్కోరు సాధించింది. ఓ దశలో 37 పరుగులకే 3 వికెట్లు కోల్పోయిన అఫ్గానిస్తాన్ చివరకు 7 వికెట్ల నష్టానికి 325 పరుగుల భారీ స్కోరు చేసింది. ఇంగ్లండ్ బౌలర్లలో ఆర్చర్‌కు 3, లివింగ్ స్టోన్‌కు 2 వికెట్లు దక్కాయి. మరోవైపు తొలి మ్యాచ్‌లో ఆస్ట్రేలియా చేతిలో ఓడిపోయిన ఇంగ్లండ్‌కు ఈ మ్యాచ్ చావోరేవోగా మారింది.