రూ.200 తేడా ఉందని.. రూ.93 కోట్ల బ్యాంకు అకౌంట్ ఫ్రీజ్

సైబర్‌ నేరాలపై దర్యాప్తులో భాగంగా నిందితులు, అనుమానితుల బ్యాంకు అకౌంట్‌లను ఫ్రీజ్ చేసే విషయంలో చాలా జాగ్రత్తగా వ్యవహరించాలని దర్యాప్తు సంస్థలకు ఢిల్లీ హైకోర్టు సూచించింది. హేతుబద్ధత లేకుండా ఖాతాలను నిలిపివేస్తే మనుషుల జీవితాలే తారుమారవుతాయని వ్యాఖ్యానించింది. ఖాతాల్లో కేవలం రూ.200 మేర తేడా ఉందన్న కారణంతో రూ.93 కోట్ల ఖాతాను పూర్తిగా స్తంభింపజేయడాన్ని తప్పుబట్టింది. ఈ కేసుకు సంబంధించి కీలక తీర్పును వెలువరించిన న్యాయమూర్తి జస్టిస్‌ మనోజ్‌ జైన్‌... ‘‘సరైన కారణాలు చూపకుండా, బ్యాంకు ఖాతాలను స్తంభింపజేయడమే పరిష్కారమార్గమని భావిస్తే.. అది సంబంధిత వ్యక్తుల ఆర్థిక స్థితిగతుల్లో ఉపద్రవం సృష్టిస్తుంది’’ అని హెచ్చరించారు.

అకౌంట్‌ను మొత్తంగా స్తంభింపజేయడానికి బదులు వివాదంలో ఉన్న మొత్తాన్ని డిపాజిట్ రూపంలో పక్కనపెడితే ఖాతాదార్లకు ఎటువంటి ఇబ్బంది ఉండదని న్యాయమూర్తి అభిప్రాయపడ్డారు. అలాగే, కేసుతో సంబంధం ఉన్న వ్యక్తులకు కూడా తమ ఖాతాలో సొమ్ము భద్రంగా ఉందన్న నమ్మకం కలుగుతుందని పేర్కొన్నారు. ఇలాంటి తరహా కేసులు పెద్ద సంఖ్యలో వస్తున్నందున బ్యాంకు అకౌంట్ల ఫ్రీజ్‌పై ఒకే రకమైన విధానాన్ని రూపొందించాలని కేంద్ర హోం శాఖను జస్టిస్ మనోజ్ జైన్ ఆదేశించారు. ఇందుకోసం రాష్ట్రాలు, కేంద్రపాలిత ప్రాంతాలు, ఇతర భాగస్వాములతో చర్చలు జరిపి... మార్గదర్శకాలు, ప్రామాణిక నిర్వహణ విధానాలను రూపొందించాలని ఆయన సూచించారు.

ప్రస్తుత కేసులో పిటిషనర్‌ ఎలాంటి సైబర్‌ కేసులో నిందితుడు లేదా అనుమానితుడు కాకపోయినా కానీ మొత్తం ఖాతాను స్తంభింపజేయడం సరైంది కాదని అన్నారు. నేరంతో ఎలాంటి సంబంధం లేకపోయినా, అనుకోకుండా లబ్ధి పొంది ఉండొచ్చని అభిప్రాయం వ్యక్తం చేశారు.

ఇటీవలి పవన్ కుమార్ రాయ్ వర్సెస్ యూనియన్ ఆఫ్ ఇండియా కేసులో కేవలం రూ.105 కోసం ఖాతాను స్తంభింపజేశారని, వెంటనే దీనిని తొలగించాలని ఆదేశించింది. ఈ సందర్భంగా దర్యాప్తు సంస్థల తీరును కోర్టు విమర్శించింది, ‘ఖాతాలను స్తంభింపజేయడానికి ఆదేశాలను జారీ చేసే అధికారం పోలీసులకు ఉన్నప్పటికీ, వారు వారి చర్యలకు ఆధారాలు చూపాలి.. కారణం లేకుండా ఖాతాలు ఫ్రీజ్ చేయడం ఖాతాదారుల ఆర్థిక స్థిరత్వంపై వినాశనం కలిగిస్తాయి... చిరు వ్యాపారి అయిన ఆయన జీవనోపాధిని ఇది దెబ్బతీస్తుంది’ అని అన్నారు.