ఏకంగా బోర్డు మీదే సమాధానాలు రాసి,,,, పరీక్షల్లో విద్యార్థులకు టీచరమ్మ సాయం

ఏవైనా పరీక్షలు పెడుతున్నప్పుడు కొందరు టీచర్లు చాలా కఠినంగా వ్యవహరిస్తూ.. ఏమాత్రం కాపీయింగ్ జరగకుండా చూస్తారు. ఒకరి దాంట్లో మరొకరు చూసి రాసినా, చీటీలు పెట్టినా వారిపై కఠిన చర్యలు తీసుకుంటారు. మరికొందరు చూసీ చూడనట్లుగా వ్యవహరిస్తూ వదిలేస్తుంటారు. కానీ మనం ఇప్పుడు చూడబోయే ఈ టీచరమ్మ మాత్రం.. పిల్లలు పదే పదే అడుగుతున్నారని బోర్డు పరీక్షల్లోనే సాయం చేసింది. నేరుగా బోర్డు మీదే సమాధానాలు రాస్తూ పిల్లలందరినీ రాసుకోమని చెప్పింది. ప్రస్తుతం ఇందుకు సంబంధించిన వీడియో నెట్టింట వైరల్ అవుతుండగా అంతా షాక్ అవుతున్నారు. ఆ పూర్తి వివరాలు మీకోసం.

మధ్య ప్రదేశ్‌లోని బేతుల్ జిల్లాలో 5వ తరగతి బోర్డు పరీక్షలు నిర్వహించారు. ఫిబ్రవరి 25వ తేదీన గణితం పరీక్ష ఉండగా.. ప్రాథమిక పాఠశాలలో ఉపాధ్యాయురాలిగా పని చేస్తున్న సంగీతా విశ్వకర్మ అనే టీచర్ ఇన్విజిలేటర్‌గా వెళ్లింది. అయితే ఆ సమయంలో తరగతి గదిలో పరీక్ష రాస్తున్న విద్యార్థులు ప్రశ్నాపత్రం చూడగానే బిత్తర పోయారు. తమకు సమాధానాలు తెలియవంటూ.. పదే పదే టీచర్‌ను సాయం చేయమని కోరారు. చాలా సేపు అది తప్పని చెప్పినా విద్యార్థులు బతిమాలడం చూసి సాయం చేసేందుకు సిద్ధమైంది.

ముఖ్యంగా ప్రశ్నాపత్రాన్ని తీసుకుని బోర్డు వద్దకు వెళ్లి స్వయంగా ఆమే సమాధానాలు రాసింది. వాటిని పిల్లలు అందరూ ఎక్కించుకోవాలని చెప్పగా.. విద్యార్థులంతా చకచకా రాసేసుకున్నారు. అయితే ఈ విషయం గుర్తించిన వారు ఎవరో.. కిటికీలోంచి దీన్ని వీడియోగా తీశారు. ఆపై సెల్‌ఫోన్ ద్వారానే అందరికీ పంపారు. ఇలా ఈ వీడియో కాస్త నెట్టింట వైరల్‌గా మారింది. ఆనోటా ఈనోటా పాకి బేతుల్ జిల్లా కలెక్టర్ నరేంద్ర కుమార్ సూర్యవంశీ వద్దకు వెళ్లగా.. ఉపాధ్యాయురాలు సంగీతా విశ్వకర్మను విధుల నుంచి బహిష్కరించారు.

అయితే ప్రస్తుతం ఈ ఘటనపై విచారణ జరుపుతున్నామని.. ఆమె తప్పు చేసినట్లు రుజువు అయితే కఠిన చర్యలు తీసుకుంటామని కలెక్టర్ నరేంద్ర కుమార్ సూర్యవంశీ పేర్కొన్నారు. ఈ కేసులో పరీక్షా కేంద్రం ఇంఛార్జీ, ఇతర అధికారులపై కూడా చర్యలు తీసుకుంటున్నట్లు వివరించారు. మరోవైపు ఈ విషయం బయటకు రావడంతో విద్యాశాఖ కూడా ఉపాధ్యాయులు అందరికీ హెచ్చరికలు జారీ చేసింది. పరీక్షల సమయంలో మాయి కాపీయింగ్‌కు సాయం చేస్తే కఠిన చర్యలు తీసుకుంటామని పేర్కొంది. ఇలాంటి ఘటనలు పునరావృతం కాకుండా ఉండేందుకు తీసుకోవాల్సిన జాగ్రత్తలు అన్నీ తీసుకుంటామని వివరించింది.