ఇప్పటివరకు బెస్ట్ బౌలర్‌గా షమీ.. మోస్ట్ వికెట్స్‌లో అప్ఘన్ బౌలర్

పాకిస్తాన్ వేదికగా హైబ్రిడ్ మోడల్‌లో ప్రారంభమైన ఛాంపియన్స్ ట్రోఫీ-2025లో బౌలర్లు పెద్దగా ప్రభావం చూపలేకపోయారు. పాక్ పిచ్‌లన్నీ బ్యాటింగ్‌కి అనుకూలిస్తుండగా భారీ స్కోర్‌లు నమోదవుతున్నాయి. టీమిండియా మ్యాచ్‌లు దుబాయ్‌లో జరుగుతుండటం అక్కడి పిచ్‌లు కూడా అలానే ఉండటంతో బౌలర్లకి ఈ టోర్నీ కత్తిమీద సాములా మారింది. బ్యాటింగ్‌కి అనుకూలిస్తున్న ఈ పిచ్‌లపై కూడా కొందరు బౌలర్లు రాణిస్తున్నారు. ఈ ట్రోఫీలో ఇప్పటివరకు ఉన్న బెస్ట్ బౌలర్, మోస్ట్ వికెట్ టేకర్లను ఓసారి చూద్దాం.

ఛాంపియన్స్ ట్రోఫీ గ్రూప్-ఏ, గ్రూప్-బీలో అన్నీ జట్లు తలో రెండు మ్యాచ్‌లు ఆడాయి. వర్షం కారణంగా కొన్ని మ్యాచ్‌లు రద్దయ్యాయి కూడా. ఈ టోర్నీలో ఇప్పటి వరకు ఎక్కువ వికెట్లు తీసిన బౌలర్ల జాబితాలో అప్ఘనిస్తాన్ బౌలర్ టాప్ ప్లేస్‌లో నిలిచాడు. టాప్ టెన్‌లో నలుగురు భారత బౌలర్లు ఉండటం విశేషం.

టాప్‌లో అజ్మతుల్లా

అప్ఘనిస్తాన్ ఆల్‌రౌండర్ అజ్మతుల్లా ఓమర్జాయ్ ఆరు వికెట్లతో టాప్ ప్లేస్‌లో నిలిచాడు. ఇంగ్లండ్‌తో జరిగిన కీలక మ్యాచ్‌లో ఐదు వికెట్లు తీసి జట్టు విజయంలో కీలకంగా మారాడు. అంతకుముందు సౌతాఫ్రికాపై జరిగిన మ్యాచ్‌లో ఒక వికెట్ దక్కించుకున్నాడు. రెండు మ్యాచ్‌లలో 15.5 ఓవర్లు బౌలింగ్ చేసి 97 పరుగులు ఇచ్చి ఆరు వికెట్లు తీసుకున్నాడు.

మిచెల్ బ్రాస్‌వెల్

న్యూజిలాండ్ స్పిన్నర్ మిచెల్ బ్రాస్‌వెల్ రెండు మ్యాచ్‌లలో ఐదు వికెట్లు తీసుకుని సెకండ్ ప్లేస్‌తో నిలిచాడు. బంగ్లాదేశ్‌పై నాలుగు వికెట్లు పడగొట్టాడు. 20 ఓవర్లు వేసిన ఈ కివీస్ స్పిన్నర్ 64 పరుగులు ఇచ్చి ఐదు వికెట్లు పడగొట్టాడు.

విలియమ్ ఓరూక్

న్యూజిలాండ్ పేస్ బౌలర్ విలియమ్ ఓరూక్ రెండు మ్యాచ్‌లలో ఐదు వికెట్లు పడగొట్టాడు. 19 ఓవర్లు వేసిన ఈ బౌలర్ 19 యావరేజ్‌తో 95 పరుగులు ఇచ్చాడు.

మహమ్మద్ షమీ

టీమిండియా పేస్ బౌలర్ మహమ్మద్ షమీ రెండు మ్యాచ్‌లలో ఐదు వికెట్లు తీసుకున్నాడు. బంగ్లాదేశ్‌తో జరిగిన తొలి మ్యాచ్‌లో ఐదు వికెట్లు తీసుకున్న షమీ.. పాకిస్తాన్‌పై ఒక్క వికెట్ కూడా పడగొట్టలేకపోయాడు. 18 ఓవర్లు వేసిన షమీ 19.20 యావరేజ్‌తో 96 పరుగులు ఇచ్చాడు.

హర్షిత్ రాణా

టీమిండియా యువ పేసర్ హర్షిత్ రాణా నాలుగు వికెట్లు తీసుకున్నాడు. రెండు మ్యాచ్‌లలో 15.2 ఓవర్లు బౌలింగ్ చేసి 15.25 యావరేజ్‌తో 61 పరుగులు ఇచ్చాడు. హర్షిత్ రాణా తర్వాత మహమ్మద్ నబీ, జోఫ్రా ఆర్చర్ నాలుగు వికెట్లు తీసుకున్నారు. కగిసో రబడా, కుల్దీప్ యాదవ్, అక్షర్ పటేల్, రిహాద్ హోసన్, మ్యాట్ హెన్రీ, మిచెల్ శాన్‌ట్నర్, లియామ్ లియామ్ లివింగ్‌స్టన్, బెన్ ద్వార్షిస్ మూడు వికెట్లు చొప్పున పడగొట్టారు.

బెస్ట్ బౌలింగ్

బెస్ట్ బౌలర్ల జాబితాలో టీమిండియా పేసర్ మహమ్మద్ షమీ నిలిచాడు. బంగ్లాపై పది ఓవర్లు బౌలింగ్ చేసి 53 పరుగులు ఇచ్చి ఐదు వికెట్లు తీసుకున్నాడు. అజ్మతుల్లా ఇంగ్లండ్‌పై 9.5 ఓవర్లకు 58 పరుగులు ఇచ్చి ఐదు వికెట్లు పడగొట్టాడు. నాలుగు వికెట్లతో మిచెల్ బ్రాస్‌వెల్ ఆ తర్వాతి స్థానంలో నిలిచాడు. హర్షిత్ రాణా, కగిసో రబడా, కుల్దీప్ యాదవ్, విలియమ్ ఓరూక్, జోఫ్రా ఆర్చర్, మిచెల్ శాన్‌ట్నర్, బెన్ ద్వార్షిస్ వరుసగా ఆ తర్వాతి స్థానాల్లో ఉన్నారు.