ఆ కారణాలతో భారీగా పడుతున్న బంగారం ధరలు

 పసిడి ప్రియులకు అదిరిపోయే శుభవార్త. గత కొంత కాలంగా భారీగా పెరిగి జీవన కాల గరిష్టాల్ని చేరిన సంగతి తెలిసిందే. అయితే అక్కడి నుంచి ఇప్పుడు వరుసగా పతనం అవుతున్నాయి. వరుసగా మూడో రోజు కూడా గోల్డ్ రేట్లు భారీగా పడిపోయాయి. ఈ క్రమంలోనే ఈ వారాన్ని భారీ నష్టాలతో ముగించబోతోంది. గత 3 నెలల కాలంలో కూడా బంగారం ధరలు ఒక వారంలో ఇంతలా పడిపోవడం ఇదే తొలిసారి కావడం విశేషం. ఇది ఇన్వెస్టర్లకు నష్టాల్ని మిగులుస్తుంది. భౌతికంగా కొనుగోలు చేయాలనుకునేవారికి ఊరట కలిగిస్తోంది. బంగారం ధరలు ఇంతలా పెరిగేందుకు యూఎస్ డాలర్ పుంజుకోవడమే కారణం అని నిపుణులు అంటున్నారు.

యూఎస్ డాలర్ ఇండెక్స్ ఈ వారంలో 0.7 శాతం పుంజుకుంది. ఇంకా బాండ్ ఈల్డ్స్ కూడా గణనీయంగా పుంజుకుంటున్నాయి. ఇవే గోల్డ్ రేట్లు పెరిగేందుకు కారణం అవుతోంది. అయినప్పటికీ.. ఇప్పుడు ఇన్వెస్టర్లు కీలక ద్రవ్యోల్బణం గణాంకాల కోసం ఎదురుచూస్తున్నారు. ఇదే ఫెడ్ వడ్డీ రేట్ల పాలసీని నిర్ణయించనుంది. ఇటీవల ఫెడ్ వడ్డీ రేట్లను వరుసగా రెండు సార్లు తగ్గించి.. మళ్లీ స్థిరంగా ఉంచిన సంగతి తెలిసిందే.

ఈ ఫెడ్ వడ్డీ రేట్ల విషయంలోనే ఫెడ్ ఛైర్మన్ జెరోమ్ పావెల్, అమెరికా అధ్యక్షుడు డొనాల్డ్ ట్రంప్ మధ్య భిన్నాభిప్రాయాలు ఉన్నాయి. ట్రంప్ వడ్డీ రేట్లను సున్నాకు చేర్చాలని ఒత్తిడి చేస్తుండగా.. ఫెడ్ బాస్ మాత్రం ససేమిరా అంటున్నారు. ద్రవ్యోల్బణం అధిక స్థాయిలోనే ఉందని.. ఈ క్రమంలో తగ్గించడం కుదరదని అంటున్నారు. ఇప్పుడు ద్రవ్యోల్బణం డేటా తర్వాత ఫెడ్ వడ్డీ రేట్లను తగ్గిస్తుందా లేదా పెంచుతుందా అనే దానిపై ఒక అంచనాకు రావొచ్చు. ఇక ఫెడ్ వడ్డీ రేట్లను తగ్గిస్తే.. డాలర్, బాండ్ ఈల్డ్స్ డిమాండ్ తగ్గి గోల్డ్ రేట్లు పెరుగుతుంటాయి. అదే ఫెడ్ వడ్డీ రేట్లు పెంచితే మాత్రం.. బంగారం రేట్లు దిగొస్తాయి.

ఇక ఇవన్నీ డొనాల్డ్ ట్రంప్ చుట్టూరానే తిరుగుతున్నాయి. ట్రంప్ మొదట మెక్సికో, కెనడా, చైనా నుంచి వచ్చే దిగుమతులపై సుంకాలు ప్రకటించడంతో వాణిజ్య యుద్ధ భయాలు నెలకొన్నాయి. అదే అనిశ్చితికి కారణమైంది. ఆర్థిక వ్యవస్థ మందగమనానికి దారి తీసింది. ఈ సంక్షోభ సమయంలోనే బంగారంపై పెట్టుబడులు పెరిగిపోతున్నాయి. దీంతో ధరలు పెరగ్గా.. సడెన్‌గా ఇప్పుడు డాలర్ పుంజుకోవడంతో రేట్లు దిగొస్తున్నాయి. ఇంటర్నేషనల్ మార్కెట్లో తాజాగా గోల్డ్ రేట్లు భారీగా పతనం అయ్యాయి.

ముందటి రోజు ఏకంగా 40 డాలర్ల మేర గోల్డ్ రేట్లు దిగొచ్చిన సంగతి తెలిసిందే. స్పాట్ గోల్డ్ రేటు ఔన్సుకు 2920 డాలర్ల స్థాయి నుంచి 2880 డాలర్లకు పడిపోయింది. అదే ఇవాళ మరో 20 డాలర్ల పతనంతో 2860 డాలర్లకు పడిపోయింది. ఈ వారంలో స్పాట్ గోల్డ్ రేటు 2.5 శాతం వరకు పతనమైంది. ఇక దేశీయంగా కూడా వరుసగా 3 రోజులుగా బంగారం ధరలు పడుతూనే ఉన్నాయి.