రూ.5 లకే విద్యుత్ కనెక్షన్..రైతులకు శుభవార్త చెప్పిన బీజేపీ సీఎం

రైతులకు మధ్యప్రదేశ్ ప్రభుత్వం శుభవార్త అందించింది. కేవలం రూ.5కే శాశ్వత విద్యుత్‌ కనెక్షన్‌ మంజూరు చేయనుంది. ఈ మేరకు ఆ రాష్ట్ర ముఖ్యమంత్రి మోహన్‌ యాదవ్‌ ప్రకటించారు. భోపాల్‌లో తన నివాసంలో ఆదివారం నిర్వహించిన ‘కిసార్ అభార్ సమ్మేళనం’లో ముఖ్యమంత్రి పాల్గొన్నారు. ఈ సందర్భంగా ఆయన మాట్లాడుతూ.. విద్యుత్ కనెక్షన్ లేని రైతులకు.. రూ.5 నామమాత్రపు రుసుంతో శాశ్వత కనెక్షన్ అందజేయనున్నట్టు తెలిపారు. మధ్యప్రదేశ్‌ సెంట్రల్‌ పవర్‌ డిస్ట్రిబ్యూషన్‌ కంపెనీ త్వరలోనే ఈ పథకాన్ని ప్రారంభిస్తుందని సీఎం స్పష్టం చేశారు. శాశ్వత విద్యుత్‌ కనెక్షన్‌ లేనివారికి ఈ పథకం వర్తింపజేయనున్నట్టు చెప్పారు.

అన్నదాతలకు మంచి చేయాలని, వారి జీవితాలు మెరుగుపడాలని తాము కోరుకుంటున్నామని సీఎం అన్నారు. అలాగే, రాబోయే మూడేళ్లలో 30 లక్షల సౌర విద్యుత్తు వ్యవసాయ పంపుల్ని రైతులకు అందజేయనున్నట్టు ముఖ్యమంత్రి పేర్కొన్నారు. వీటి ద్వారా ఉత్పత్తి అయిన మిగులు విద్యుత్‌ను రైతుల నుంచి ప్రభుత్వం కొనుగోలు చేస్తుందని తెలిపారు. ‘ఏటా 10 లక్షల సోలార్ పంపు సెట్ల పంపిణీ జరుగుతుంది.. రైతులకు ఆదాయం రెట్టింపు చేయడం.. వారు ఆర్ధిక స్వావలంబన సాధించేలా.. వారు ఉత్పత్తి చేసే విద్యుత్తును సౌరశక్తి నుండి కొనుగోలు చేయడానికి కూడా మేము చొరవ తీసుకుంటాం’ అని పేర్కొన్నారు.

కర్షకులకు నాణ్యమైన, మెరుగైన విత్తనాలు, వ్యవసాయ పరికరాలు అందుబాటులో ఉంచడానికి వ్యవసాయ మేళాలు నిర్వహిస్తామని తెలిపారు. కాగా, దీనికి ముందు రోజే గోధుమలకు కనీస మద్దతు ధరను రూ.175 మేర పెంచుతున్నట్టు ప్రకటించారు. దీని వల్ల రాష్ట్రంలోని రైతాంగానికి హెక్టార్‌కు అదనంగా రూ.4 వేలు అదనపు ప్రయోజనం లభిస్తుందని అన్నారు. 20 ఏళ్ల కిందట కాంగ్రెస్ పాలనలో గ్రామాల్లో సరైన రహదారులు, విద్యుత్, మౌలిక సౌకర్యాలు లేకుండా ప్రజలు ఇబ్బందులుపడ్డారని ఆరోపించారు. కానీ, బీజేపీ అధికారంలోకి వచ్చిన తర్వాత గ్రామీణ ప్రాంతాల్లో పరిస్థితి పూర్తిగా మారిపోయిందని సీఎం పేర్కొన్నారు. 2018 ఎన్నికలు మినహా 2003 నుంచి ఆ రాష్ట్రంలో జరుగుతోన్న ప్రతి ఎన్నికల్లో బీజేపీ విజయం సాధిస్తూ వస్తోంది.