ఉక్రెయిన్‌‌కు సైనిక సాయం నిలిపివేత,,ట్రంప్ మరో షాక్

ఉక్రెయిన్‌కు అమెరికా అధ్యక్షుడు డొనాల్డ్ ట్రంప్ మరో షాక్ ఇచ్చారు. ఆ దేశానికి సైనిక సాయం నిలిపివేసినట్టు అమెరికా అధికారి ఒకరు వెల్లడించారు. ఈ నేపథ్యంలో రష్యాతో శాంతి చర్చలకు అంగీకరించాలని కీవ్‌పై ఒత్తిడి మరింత పెరిగింది. డొనాల్డ్ ట్రంప్ అధికారంలోకి వచ్చాక ఉక్రెయిన్ యుద్ధంలో అమెరికా వైఖరి క్రమంగా రష్యాకు అనుకూలంగా మారుతోంది. అమెరికా, ఉక్రెయిన్ అధ్యక్షులు డొనాల్డ్ ట్రంప్, వోలోడిమిర్ జెలెన్‌స్కీల మధ్య వైట్‌హౌస్‌‌లో జరిగిన చర్చల్లో వాగ్వాదం తర్వాత ఈ నిర్ణయం తీసుకోవడం గమనార్హం.

‘తాను శాంతిపై దృష్టి సారించానని అధ్యక్షుడు స్పష్టంగా చెప్పారు... మన భాగస్వాములు కూడా ఆ లక్ష్యానికి కట్టుబడి ఉండాలి అనేది ఆయన వైఖరి.. మా సహాయం సమస్య పరిష్కరానికి దోహదపడుతుందని నిర్దారించుకోడానికి ఉక్రెయిన్‌కు మేము ఇచ్చే సాయం నిలిపివేత, సమీక్షిస్తున్నాం’ అని పేరు చెప్పడానికి నిరాకరించిన వైట్‌హౌస్ అధికారి వ్యాఖ్యానించారు. కాగా, ఈ నిర్ణయం వెలువడటానికి ముందు ట్రంప్ మాట్లాడుతూ.. ఉక్రెయిన్‌కు సాయం నిలిపివేత గురించి ఇంకా చర్చించలేదని, కానీ దానిని తోసిపుచ్చలేమని అన్నారు. రష్యాతో కాల్పుల విరమణ ఒప్పందానికి రాకుండా జెలెన్‌స్కీ ఇంకా ఎంతోకాలం ఉండరని ఆయన సూచించారు.

మరోవైపు, ట్రంప్ అధ్యక్షుడయ్యాక క్రమంగా అగ్రరాజ్యం వైఖరి రష్యాకు అనుకూలంగా మారుతోంది. ఒకవేళ, కీవ్, మాస్కో మధ్య శాంతి ఒప్పందం కుదిరినా అది రష్యా అధ్యక్షుడు వ్లాదిమిర్ పుతిన్‌ ఇష్ట ప్రకారమే జరుగుతుందనేది స్పష్టమవుతోంది. ఉక్రెయిన్‌ యుద్ధం వల్ల అమెరికాపై ఆర్ధిక భారం ట్రంప్‌నకు సుతారం ఇష్టం లేదు. ప్రభుత్వ వ్యయాలను భారీగా తగ్గించుకుంటున్న ట్రంప్‌.. వీలైనంత త్వరగా ఈ యుద్ధం ముగింపునకు వచ్చేలా ప్రయత్నిస్తున్నారు. అయితే, రష్యా ఆక్రమించిన భూభాగాలను వదులుకోవాల్సిందేనని ఇప్పటికే జెలెన్‌స్కీకి ఆయన స్పష్టం చేశారు.

ట్రంప్ అధ్యక్ష బాధ్యతలు చేపట్టిన తర్వాత అమెరికా-ఉక్రెయిన్‌ మధ్య ద్వైపాక్షిక సంబంధాలు బలహీనపడ్డాయి. ఉక్రెయిన్‌ యుద్ధాన్ని ఆపుతానని ఎన్నికల ముందే వాగ్దానం చేసిన ట్రంప్‌ ఆ దిశగా అడుగులు వేస్తున్నారు. రష్యాతో కాల్పుల విరమణకు అంగీకరించాలని, ఉక్రెయిన్‌లోని విలువైన ఖనిజాల విషయంలో తమతో ఒప్పందం కుదుర్చుకోవాలని జెలెన్‌స్కీపై ఒత్తిడితెచ్చారు. అయితే, రష్యా ఆక్రమించిన తమ భూభాగాలను తిరిగి ఇచ్చేయాలనీ, భవిష్యత్తులో తమపై దండయాత్ర చేయకుండా హామీ ఇవ్వాలని జెలెన్‌స్కీ డిమాండ్ చేస్తున్నారు. ఈ నేపథ్యంలో ట్రంప్‌, జెలెన్‌స్కీ మధ్య వాగ్వాదం చోటు చేసుకుని వైట్‌హౌస్‌ నుంచి కీవ్ అధ్యక్షుడు అర్థంతరంగా వెళ్లిపోయేలా చేసింది. అయితే, ట్రంప్‌తో వాగ్వాదానికి దిగినా అమెరికా మద్దతు లేకుండా రష్యాతో పోరాడలేమని జెలెన్‌స్కీ అంగీకరించారు.