సీఐఎస్ఎఫ్ అధికారిణి లైంగిక దోపిడీ.. ప్రయివేట్ ఉద్యోగి ఆత్మహత్య

సెంట్రల్ ఇండస్ట్రియల్ సెక్యూరిటీ ఫోర్స్ (సీఐఎస్ఎఫ్) మహిళా అధికారిణి చేతిలో తాను మోసపోయాయని ఆరోపిస్తూ ఉత్తర్ ప్రదేశ్‌కు చెందిన ఓ వ్యక్తి ఆత్మహత్యకు పాల్పడ్డాడు. యూపీలోని ఘాజీపూర్‌కు చెందిన అభిషేక్ సింగ్ (40) కర్ణాటకలోని మంగళూరులోని ఓ హోటల్‌లో అతడు ఆత్మహత్య చేసుకున్నాడు. ఆత్మహత్యకు ముందు అతడు 20 నిమిషాల సెల్ఫీ వీడియోను రికార్డు చేసి.. సోషల్ మీడియాలో పోస్ట్ చేశాడు. సీఐఎస్ఎఫ్ అధికారిణి తనను దోపిడీ చేసిందని అతడు ఆరోపిస్తూ తన ఇన్‌స్టాగ్రామ్ ఖాతాలో వీడియోను పెట్టాడు. చెన్నైలోని ఓ ప్రయివేట్ సంస్థలో ఉద్యోగం చేస్తోన్న అభిషేక్.. మంగళూరులో జరిగే ఎగ్జిబిషన్ కోసం తన కొలీగ్స్‌తో కలిసి వచ్చాడు. సోమవారం స్థానిక రావ్ అండ్ రావ్ సర్కిల్‌లోని తాను బసచేసిన హోటల్‌లోనే ఆత్యహత్య చేసుకుని ప్రాణాలు తీసుకున్నాడు.

సీఐఎస్ఎఫ్ అసిస్టెంట్ కమాండెంట్ మోనికా సిహాగ్.. తనను తప్పుదారిపట్టించిందని అతడు ఆరోపించాడు. పెళ్లైన విషయం దాచిపెట్టి తనతో రిలేషన్‌షిప్‌లోకి ప్రవేశించిందని వాపోయాడు. లైంగిక దోపిడికి పాల్పడిందని.. తనను శారీరకంగా, మానసికంగా, ఆర్థికంగా ఉపయోగించుకుందని ఆవేదన వ్యక్తం చేశాడు. ప్రేమ నటిస్తూ మొత్తం రూ.8 లక్షల విలువైన బంగారాన్ని దోచుకుందని వీడియోలో ఆరోపణలు చేశాడు. ఆమెకు పెళ్లై ఇద్దరు పిల్లలు ఉన్నారని, ఇటీవలే తనకు ఆ విషయం తెలిసిందని అన్నాడు.

అంతేకాదు, ఆమె చాలా మందితో శారీరక సంబంధాలు ఉన్నాయని అభిషేక్ ఆరోపించడం గమనార్హం. ఈ ఘటనపై కేసు నమోదుచేసిన స్థానిక పోలీసులు.. మరణం వెనుక కారణాలపై ఆరా తీస్తున్నారు. అభిషేక్ సోదరుడు ఫిర్యాదు ఆధారంగా పండేశ్వర్ పోలీస్ స్టేషన్‌లో కేసు నమోదయినట్టు అధికారులు తెలిపారు. మృతదేహాన్ని స్వాధీనం చేసుకుని పోస్ట్‌మార్టం కోసం తరలించారు. తన సోదరుడు మార్చి 1 ఆదివారం ఉదయం 11.30 గంటలకు ఫోన్ చేసి.. మోనిక తనను పెళ్లి చేసుకోడానికి నిరాకరిస్తోందని, ఇప్పటికే ఆమె పెళ్లై పిల్లలు కూడా ఉన్నారని తెలిసిందని చెప్పినట్టు అభిషేక్ తమ్ముడు పేర్కొన్నారు. తన సోదరుడి దగ్గర నుంచి దాదాపు 15 లక్షలు రూపాయాల వరకూ లాగేసుకుందన్నాడు.

కాగా, ప్రస్తుతం అభిషేక్ సెల్ఫీ వీడియో సోషల్ మీడియాలో తెగ వైరల్ అవుతోంది. అటు, ఈ ఆరోపణలపై సీఐఎస్ఎఫ్ అధికారిణి మాత్రం ఇంకా స్పందించలేదు. అలాగే, సీఐఎస్ఎఫ్ సైతం దీనిపై ఎటువంటి ప్రకటన చేయలేదు. ఉన్నతాధికారిణిపై ఇలాంటి ఆరోపణలు రావడం ప్రాధాన్యత సంతరించుకుంది. ఇరువురికి ఎలా పరిచయం అయ్యింది? ఇవి కేవలం ఆరోపణలేనా? అనే ప్రశ్నలకు విచారణలో సమాధానాలు వస్తాయని అధికారులు తెలిపారు.