హైదరాబాద్‌లో నేపాల్ వ్యక్తి మృతి.. మృతదేహాన్ని తరలించలేని పేదరికం

తెలుగులో నానుడి ఉంటుంది. పెళ్లికి వెళ్లకపోయినా పర్వాలేదు కానీ.. చావుకు మాత్రం తప్పకుండా వెళ్లాలంటారు. ఎందుకంటే చనిపోయిన వ్యక్తులు మళ్లీ తిరిగి రారు, కనబడరు కాబట్టి. తమ వారిని కడసారి చూసుకోవడానికి కొందరు ఖండాలు దాటి వచ్చిన సందర్భాలు ఎన్నో. బంధువులు వచ్చే వరకు మృతదేహాలను రోజుల తరబడి భద్రపరిచిన ఘటనలు అనేకం. అయితే కాస్త డబ్బున్న వారికి ఇవి సాధ్యం కానీ.. పేదవారికి మాత్రం అసాధ్యమైన పనే. కొందరు పేదలకు తమ వారి కడచూపు కూడా దక్కదు. తాజాగా.. హైదరాబాద్ నగరంలో అటువంటి ఘటనే చోటు చేసుకుంది. నేపాల్ దేశానికి చెందిన ఓ వ్యక్తి నగరంలో చనిపోగా.. అతడి మృతదేహాన్ని స్వదేశానికి తరలించేందుకు, అక్కడి వారు ఇక్కడకు వచ్చేందుకు పేదరికం అడ్డొచ్చింది. దీంతో కట్టుకున్న భార్య, కన్నబిడ్డలు కూడా కడసారి చూసుకోలేని దుస్థితి ఏర్పడింది. చివరికి వీడియో కాల్‌లోనే కడచూపు, అంత్యక్రియలు చూపించాల్సి వచ్చింది.

వివరాల్లోకి వెళితే.. నేపాల్‌ దేశానికి చెందిన ప్రేమ్‌ రావల్‌(34) హైదరాబాద్ కూకట్‌పల్లి ప్రాంతానికి బతుకుదెరువు కోసం వచ్చాడు. ఇక్కడే ఓ ప్రైవేటు కంపెనీలో హౌస్‌కీపింగ్‌ పని చేస్తున్నాడు. భార్య యశోద, ముగ్గురు కుమార్తెలు, కుమారుడితో కలిసి కేపీహెచ్‌బీ కాలనీ నాలుగోఫేజ్‌లో ఓ అద్దె ఇంట్లో నివాసం ఉండేవాడు. నెల క్రితం భార్య యశోద పిల్లలతో సహా.. నేపాల్‌కు వెళ్లింది. ప్రేమ్‌ రావల్‌ గదిని ఖాళీ చేసి మరో స్నేహితుడితో కలిసి ఉంటున్నాడు. అయితే ఆర్థిక ఇబ్బందులు, కుటుంబ సమస్యలతో ప్రేమ్ రావల్ రెండ్రోజుల క్రితం సూసైడ్ చేసుకున్నాడు. పెద్ద కుమార్తెతో వీడియో కాల్ మాట్లాడి ఆ తర్వాత ఉరేసుకొని ఆత్మహత్యకు పాల్పడ్డాడు. గమనించిన స్నేహితుడు విషయాన్ని ఫోన్ ద్వారా నేపాల్‌లోని భార్య, బంధువులకు తెలియజేశాడు.

అయితే ప్రేమ్ రావల్ మృతదేహాన్ని నేపాల్ తీసుకెళ్లే పరిస్థితి లేకుండా పోయింది. పేదరికం కారణంగా.. భార్య, పిల్లలు సహా ఇతర కుటుంబ సభ్యులు హైదరాబాద్ వచ్చే స్థోమత లేదు. దీంతో రాజస్థాన్‌లో ఉంటున్న ప్రేమ్‌ రావల్ అన్నయ్య బల్వ బహుదూర్‌ నగరానికి వచ్చి తమ్ముడి అంత్యక్రియలను ఇక్కడే నిర్వహించారు. నగరంలోని ఉంటున్న సుమారు 80 మంది నేపాల్‌ దేశస్థులు ఈ అంత్యక్రియల్లో పాల్గొన్నారు. ప్రేమ్ రావల్ అంతిమ సంస్కారాలను వీడియో కాల్‌లో కుటుంబసభ్యులకు చూపించారు. ఈ ఘటనతో అక్కడున్న వారు కంటతడి పెట్టుకున్నారు. తమ తమ్ముడి అస్తికలు సేకరించి రెండ్రోజుల్లో తానెక్కడినే సొంతూరు బయల్దేరుతానని ప్రేమ్ అన్నయ్య బల్వ బహుదూర్‌ బోరున విలపించాడు. అక్కడకు వెళ్లి మిగతా కార్యక్రమాలు చేస్తామని చెప్పాడు.