కొత్త బంతి ఇవ్వండి.. హెడ్‌కి చుక్కలు చూపిస్తాడు: అశ్విన్

భారత్, ఆస్ట్రేలియా జట్లు ఛాంపియన్స్ ట్రోఫీ 2025 సెమీ ఫైనల్స్‌లో తలపడుతున్నాయి. టీమిండియా వరుస విజయాలతో దూసుకుపోతూ సెమీస్‌లో అడుగుపెడితే.. ఆస్ట్రేలియా ఆపసోపాలు పడుతూ సెమీఫైనల్స్‌కు చేరుకుంది. అయినా కూడా నాకౌట్ మ్యాచ్‌లలో ఆస్ట్రేలియాకు ఉన్న గత రికార్డులను దృష్టిలో ఉంచుకోవడంతో ఈ మ్యాచ్ చాలా టైట్‌గా జరుగుతుందని అందరూ అభిప్రాయపడుతున్నారు. దుబాయ్ వేదికగా మధ్యాహ్నం 2:30 గంటలకు అందరూ ఎంతో ఆసక్తిగా ఎదురు చూస్తున్నారు.

ఆస్ట్రేలియా జట్టులో ముఖ్యంగా ట్రావిస్ హెడ్ టీమిండియా పాలిట శాపంలా మారాడు. ఐసీసీ వన్డే వరల్డ్‌కప్, వరల్డ్ టెస్టు ఛాంపియన్‌షిప్ ఫైనల్స్‌లో సెంచరీలతో అదరగొట్టి టీమిండియాకు టైటిల్ దక్కకుండా అడ్డుపడ్డాడు. దాంతో టీమిండియా ప్లేయర్లతో పాటు ఫ్యాన్స్ కూడా హెడ్ విషయంలో కాస్తంత కంగారుగానే ఉన్నారు. సీనియర్లు కూడా హెడ్ త్వరగా అవుట్ చేస్తే భారత్‌దే విజయం అని చెబుతున్నారు.

సెమీ ఫైనల్స్ మ్యాచ్‌కి ముందు టీమిండియా కెప్టెన్ రోహిత్ శర్మకు మాజీ క్రికెటర్, స్పిన్నర్ రవిచంద్రన్ అశ్విన్ కీలక సూచనలు చేశాడు. మ్యాచ్‌లో మిస్టరీ స్పిన్నర్ వరుణ్ చక్రవర్తికి కొత్త బంతితో బౌలింగ్ చేసే అవకాశం ఇవ్వాలని సూచించాడు. కొత్త బంతితో వరుణ్ చక్రవర్తి ప్రత్యర్థి బ్యాటర్లను ముప్పుతిప్పలు పెడతాడని చెప్పాడు. ముఖ్యంగా ట్రావిస్ హెడ్‌ను అడ్డుకోవాలంటే వరుణ్ చక్రవర్తితో పవర్ ప్లేలోనే బౌలింగ్ చేయించాలని సూచించాడు.

"హెడ్‌ను అడ్డుకోవాలంటే పవర్ ప్లేలో కచ్చితంగా వరుణ్ చక్రవర్తితో బౌలింగ్ చేయించాలి. స్టంప్స్ దిశగా బౌలింగ్ చేయాలని వరుణ్‌కు చెప్పండి. హెడ్ స్టంప్స్‌ను విడిచిపెట్టి షాట్స్ ఆడే ప్రతయ్నం చేస్తాడు. కచ్చితంగా వికెట్ దొరుకుతుంది" అని రవిచంద్రన్ అశ్విన్ చెప్పాడు.

న్యూజిలాండ్‌తో జరిగిన గ్రూప్ స్టేజ్ చివరి మ్యాచ్‌లోనూ వరుణ్ చక్రవర్తి అద్భుతంగా బౌలింగ్ చేశాడు. విల్ యంగ్, గ్లెన్ ఫిలిప్స్ వంటి బ్యాటర్లతో పాటు మొత్తం ఐదు వికెట్లు తీసుకున్నాడు. పది ఓవర్లు బౌలింగ్ చేసిన వరుణ్ చక్రవర్తి కేవలం 42 పరుగులు ఇచ్చి ఐదు వికెట్లు తీసుకున్నాడు.

టీమిండియా జట్టు అంచనా

రోహిత్ శర్మ (కెప్టెన్), శుభమన్ గిల్, విరాట్ కోహ్లి, శ్రేయాస్ అయ్యర్, అక్షర్ పటేల్, కేఎల్ రాహుల్, హార్దిక్ పాండ్యా, రవీంద్ర జడేజా, కుల్దీప్ యాదవ్, షమీ, వరుణ్ చక్రవర్తి

ఆస్ట్రేలియా జట్టు అంచనా

ట్రావిస్ హెడ్, జేక్ ఫ్రేజర్ మెక్‌గుర్క్, స్టీవ్ స్మిత్, మార్నస్ లబుషేన్, ఇన్‌గ్లిస్, అలెక్స్ కారీ, మ్యాక్స్‌వెల్, బెన్ ద్వార్షియస్, నాథన్ ఎల్లిస్, ఆడమ్ జంపా, స్పెన్సర్ జాన్సన్.