ఇన్పోసిస్ షాకింగ్ నిర్ణయం... మార్చి 10 నుంచి అలా చేయాల్సిందే

దేశంలోని రెండో అతిపెద్ద ఐటీ సేవల కంపెనీ ఇన్ఫోసిస్ మరోసారి షాకింగ్ నిర్ణయం తీసుకుంది. తాజాగా టెక్ ఉద్యోగులందరినీ తిరిగి ఆఫీసులకు రప్పించే ప్రయత్నాలు ప్రారంభించింది. టెక్నాలజీ విభాగానికి చెందిన సిబ్బంది కచ్చితంగా ఆఫీస్‌లకు రావాలని ఈ-మెయిల్స్ పంపిస్తోంది. నెలలో కనీసం 10 రోజులు ఇన్ఫోసిస్ క్యాంపస్‌కు వెళ్లి పని చేయాల్సిందేనని స్పష్టం చేసింది. దశల వారీగా ఈ కనీస పని రోజులను పెంచి వర్క్ ఫ్రం హోమ్ పూర్తిగా తొలగించాలని ఇన్ఫోసిస్ భావిస్తున్నట్లు సమాచారం.

టెక్ ఉద్యోగులకు ఇంటి నుంచి పని దినాలను తగ్గించాలని ఉన్నతాధికారులు టీమ్ లీడర్లకు మెయిల్ ద్వారా సమాచారం అందించినట్లు తెలుస్తోంది. ఈ కొత్త నిబంధనలు మార్చి 10, 2025 నుంచే అమల్లోకి రానున్నట్లు సంబంధిత వర్గాలు తెలిపాయి. ప్రతి నెల అందరినీ ఆఫీస్‌కు రప్పించాలనే ఉద్దేశంతో ఈ నిర్ణయం తీసుకున్నట్లు తెలుస్తోది. కొత్త హైబ్రిడ్ మోడల్ అందరూ పాటించేలాని స్పష్టం చేసింది. ఉద్యోగులకు ఫ్లెక్సిబిలిటీ ఉండేలా ప్రస్తుతం నెలలో కనీసం 10 రోజులు ఆఫీస్ నుంచి, మిగతా రోజులు ఇంటి నుంచి పని చేసేలా వెసులుబాటు కల్పిస్తున్నట్లు సమాచారం. అయితే ఇన్పోసిస్ మాత్రం ఈ విషయంపై అధికారికంగా ప్రకటన చేయలేదు. మొత్తం 3,23,000 మందికిపైగా టెక్ ఉద్యోగులు పని చేస్తున్నారు. ఉద్యోగుల మధ్య సహకారాన్ని ప్రభావవంతం చేసేందుకు కొత్త హైబ్రిడ్ మోడల్ తెస్తున్నట్లు తెలుస్తుంది.

నెలలో కనీసం 10 రోజులు, అసవరమైతే ఎక్కువ రోజులు ఆఫీస్‍కు రావాల్సి ఉంటుందని ఇన్పోసిస్ ఉన్నతాధికారులు ఈ-మెయిల్ ద్వారా తెలియజేసినట్లు తెలుస్తోంది. జాబ్ లెవెల్ 5 ఆ కింది స్థాయి ఉద్యోగులకు ఇది వర్తిస్తుంది. లెవెల్ 5లో టీమ్ లీడర్లు ఉంటారు. మిగతా కింది స్థాయిల్లో సాఫ్ట్ ఇంజినీర్లు, సీనియర్ ఇంజినీర్లు, సిస్టమ్ ఇంజినీర్లు, కన్సల్టెంట్స్ ఉంటారు. ఇన్పోసిస్ ఉద్యోగులు అటెండెన్స్ కోసం మొబైల్ యాప్ ఉపయోగిస్తారు. ఇకపై డీఫాల్ట్ వర్క్ ఫ్రం హోమ్ ఆమోదించదు. నెలలో కచ్చితంగా 10 రోజులు ఆఫీస్ వెళ్లి పంచ్ చేయాల్సి ఉంటుంది. ఉద్యోగులు నెలలో 10 రోజుల కంటే తక్కువ ఆఫీస్ వెళ్తే మిగతా రోజుల్ని లీవ్‌గా పరిగణిస్తారు.