10 ఏళ్లలో రూ.1 కోటి సంపాదించడం మీ కలా? ఈ ప్లాన్ ఫాలో అయితే సాధ్యమే

డబ్బు సంపాదించేందుకు ఎన్నో మార్గాలు ఉన్నాయి. సొంత వ్యాపారం చేయడం ద్వారా కొంత మంది తమ లక్ష్యాన్ని చేరుకుంటుండగా మరికొందరు సరైన పెట్టుబడి వ్యూహాలతో సాధిస్తారు. కోటీశ్వరులు కావాలని చాలా మంది కలలుగంటారు. కానీ, కొందరే నెరవేర్చుకుంటారు. అందుకు తగిన విధంగా పెట్టుబడులు పెట్టడం, వ్యాపారాలు చేయడం వంటివి చేస్తుంటారు. అలా మీరు కూడా 10 సంవత్సరాల్లోనే రూ.1 కోటి సంపాదించాలని కలలుగంటున్నారా? అయితే, ఇది మీకోసమే. మ్యూచువల్ ఫండ్స్‌లో ఇన్వెస్ట్ చేయడం ద్వారా కోటి సంపాదించాలనే కలను నెరవేర్చుకోవచ్చు. అది ఎలాగో ఇప్పుడు ఈ కథనం ద్వారా తెలుసుకుందాం.

హైరిటర్న్స్ కోసం మ్యూచువల్ ఫండ్స్ సరైన మార్గంగా ఆర్థిక నిపుణులు సూచిస్తుంటారు. దీర్ఘకాలంలో చాలా రకాల మ్యూచువల్ ఫండ్ స్కీమ్స్ హైరిటర్న్స్ అందిస్తుంటాయి. పెట్టుబడిదారులు తమ రిస్క్ సామర్థ్యం, పెట్టుబడి లక్ష్యం, ఆర్థిక లక్ష్యాలను అంచనా వేసి వాటికి అనుగుణంగా పెట్టుబడులు పెట్టాలని మ్యూచువల్ ఫండ్ అడ్వైజర్లు సూచిస్తుంటారు. మీరు సిస్టమాటిక్ ఇన్వెస్ట్‌మెంట్ ప్లాన్ (SIP) ద్వారా మ్యూచువల్ ఫండ్ స్కీమ్స్‌లో ఇన్వెస్ట్ చేసినట్లయితే దీర్ఘకాలంలో పెద్ద మొత్తంలో కార్పస్ ఏర్పాటు చేసుకోవచ్చు. మ్యూచువల్ ఫండ్స్‌లో కాంపౌండింగ్ మ్యాజిక్ పని చేస్తుంది. అంటే మీకు వచ్చే వడ్డీపైన వడ్డీ జనరేట్ అవుతుంది. పెట్టుబడి పెట్టిన తొలినాళ్లలో పెద్దగా రిటర్న్స్ కనిపించకపోయినా సమయం గడిచే కొద్ది వేగంగా వృద్ధి చెందుతాయి.

10 ఏళ్లలో రూ.1 కోటి ఎలా?

మీరు 10 సంవత్సరాల్లోనే రూ.1 కోటి సంపాదించాలని అనుకుంటే మ్యూచువల్ ఫండ్స్‌లో సరైన ఫండ్స్ ద్వారా పోర్ట్ ఫోలియో నిర్మించుకోవాలి. అందులో సిప్ ద్వారా నెల నెలా పెట్టుబడులు కొనసాగించాలి. దీని ద్వారా మీ టార్గెట్ కార్పస్ ఈజీగా చేరుకోవచ్చు. గత కొన్నేళ్లలో చాలా ఫండ్స్ హైరిటర్న్స్ ఇచ్చాయి. ఆన్‌లైన్ మ్యూచువల్ ఫండ్ కాలిక్యులేటర్ ద్వారా 10 ఏళ్లలో రూ.1 కోటి అందుకునేందుకు నెల నెలా ఎంత కట్టాలో తెలుసుకోవచ్చు. మ్యూచువల్ ఫండ్స్‌లో చాలా ఫండ్స్ సగటున 12 శాతం వార్షిక రాబడి అందిస్తుంటాయి. అంతకు మించి రాబడి సైతం ఇస్తుంటాయి. కానీ, సగటు రాబడి 12 శాతం అంచనా వేసుకోవచ్చు. 10 ఏళ్లలో రూ.1 కోటి సంపాదించాలంటే మీరు నెలకు రూ.45,059 చొప్పిన సిప్ ద్వారా పెట్టుబడి పెట్టాల్సి ఉంటుంది. 12 శాతం రాబడితో మీ చేతికి 10 ఏళ్లలోనే రూ.1 కోటి అందుతాయి.

ఈ కథనం కేవలం అవగాహన కోసమే. మ్యూచువల్ ఫండ్స్‌లోనూ హైరిస్క్ ఉంటుంది. సరైన ఫండ్స్ ఎంచుకోకపోతే నష్టపోయే ప్రమాదం ఉంటుంది. అలాగే అంచనా వేసిన రాబడి రాకపోతే లక్ష్యాన్ని చేరుకోవడం కాస్త ఆలస్యం కావచ్చు. పూర్తి వివరాలు తెలుసుకున్నాకే ఇన్వెస్ట్ చేయాలి.