లైఫ్ ఇన్సూరెన్స్ కార్పొరేషన్ ఆఫ్ ఇండియా అద్భుతమైన పాలసీ.. రూ.25 లక్షలు ఇస్తారు

దేశీయ అతిపెద్ద బీమా కంపెనీ అయిన లైఫ్ ఇన్సూరెన్స్ కార్పొరేషన్ ఆఫ్ ఇండియా (ఎల్ఐసీ) తమ వినియోగదారుల అవసరాలకు అనుగుణంగా ఎప్పటికప్పుడు కొత్త కొత్త పాలసీలను అందుబాటులోకి తెస్తోంది. అందులో టర్మ్ ప్లాన్స్, మనీ బ్యాక్ ప్లాన్స్, చిల్డ్రన్స్ ప్లాన్స్, పెన్షన్ ప్లాన్స్ వంటి ఎన్నో రకాలు ఉంటాయి. మీకు అనువైన, ఆర్థిక అవసరాలు తీర్చే నచ్చిన పాలసీని తీసుకోవచ్చు. ప్రస్తుతం ఎండోమెంట్ పాలసీ జీవన్ ఆనంద్‌కు ప్రజల నుంచి మంచి ఆదరణ లభిస్తోంది. ఈ ప్లాన్ గురించి మనం తెలుసుకుందాం. ఇందులో రోజుకు రూ.45 కట్టినట్లయితే మెచ్యూరిటీ తర్వాత ఒకేసారి చేతికి రూ.25 లక్షలు ఇస్తారు. ఆ తర్వాత కూడా ఇన్సూరెన్స్ కవరేజీ కొనసాగుతుంది.

ఎల్ఐసీ న్యూ జీవన్ ఆనంద్ అనేది ఒక లైఫ్ టైమ్ ఎండోమెంట్ పాలసీ. ఈ ప్లాన్‌లో పొదుపుతో పాటు బీమా రక్షణ ఉంటుంది. గతంలోని జీవన్ ఆనంద్ పాలసీ అప్‌గ్రేడ్ చేస్తూ న్యూ జీవన్ ఆనంద్ ప్లాన్ పేరుతో అదనపు బెనిఫిట్స్ అందిస్తోంది. ఇందులో గ్యారెంటీ రిటర్న్స్‌ సహా ఇతర బెనిఫిట్స్ కల్పిస్తున్నారు. మీకు నచ్చినట్లుగా ప్రీమియం చెల్లింపుల విధానాన్నీ ఎంచుకోవచ్చు. పాలసీదారు మరణిస్తే డెత్ బెనిఫిట్స్ సూచించిన నామినీకి ఇస్తారు. మరోవైపు పాలసీదారుడు జీవించి ఉన్నంత వరకు లేదా అతనికి 100 ఏళ్లు వయసు వచ్చే వరకు బీమా రక్షణ ఉంటుంది.

  పాలసీ మెచ్యూరిటీ పీరియడ్ ముగిసే నాటికి పాలసీ దారు జీవించి ఉన్నట్లియితే మెచ్యూరిటీ ప్రయోజనాలతో పాటు ప్రీమియం మొత్తం తిరిగి ఇస్తారు. ఒక వేళ పాలసీ దారు మరణించినట్లయితే కుటుంబానికి డెత్ బెనిఫిట్స్ ఇస్తారు. ఈ పాలసీ తీసుకుంటే ఎల్ఐసీకి లభించే లాభాల్లో వాటా కూడా ఇస్తారు. అలాగే ఈ పాలసీ తీసుకోవడం ద్వారా ట్యాక్స్ మినహాయింపు సైతం పొందవచ్చు.

ఒకేసారి చేతికి రూ.25 లక్షలు

ఎల్ఐసీ న్యూ జీవన్ ఆనంద్ పాలసీ కనీస సమ్ అష్యూర్డ్ రూ.5 లక్షలు. ఈ ఆప్షన్ ఎంచుకున్నారు అనుకుందాం. 35 సంవత్సరాల మెచ్యూరిటీ కాలం ఎంచుకున్నారు అనుకుందాం. ఈ మెచ్యూరిటీ టెన్యూర్ ముగిశాక మీ చేతికి రూ.25 లక్షలు అందిస్తారు. ఈ 35 సంవత్సరాలు ఏడాదికి రూ.16,300 చొప్పున ప్రీమియం చెల్లించాలి. అంటే నెలకు రూ.1,358, రోజుకు రూ.45 ప్రీమియం ఉంటుంది. మీ ఇన్సూరెన్స్ రూ.5 లక్షలుతో పాటు దానిపై బోనస్ రూ.8 లక్షలు, ఎఫ్‌ఏబీ రూ.11.5 లక్షలు మొత్తం రూ.25 లక్షలు అందిస్తారు. ఈ పాలసీ మెచ్యూర్ అయిన తర్వాత లైఫ్ కవరేజీ కొనసాగుతూనే ఉంటుంది. ఒక వేళ పాలసీ టర్మ్ కొనసాగుతున్నప్పుడే పాలసీ తీసుకున్న వ్యక్తి మరణిస్తే డెత్ క్లెయిమ్ వస్తుంది.