ఆ ఒక్క కారణంతో కనిష్టాల నుంచి దూసుకెళ్లిన రిలయన్స్ షేర్

దేశంలోనే అత్యంత ధనవంతుడైన ముకేశ్ అంబానీకి చెందిన రిలయన్స్ ఇండస్ట్రీస్ స్టాక్ ఇటీవల భారీగా పడిపోతూ వచ్చిన సంగతి తెలిసిందే. ముఖ్యంగా అమెరికా విధిస్తున్న సుంకాల నేపథ్యంలో.. ప్రపంచ స్టాక్ మార్కెట్లు కుదేలవుతున్నాయి. ఇదే సమయంలో దేశీయ స్టాక్ మార్కెట్లు కూడా భారీగానే పడిపోయాయి. గత 5 నెలల్లోనే ఇన్వెస్టర్లు ఏకంగా రూ. 94 లక్షల కోట్లకుపైగా సంపద కోల్పోయారని గణాంకాలు చెబుతున్నాయి. రిలయన్స్ ఇండస్ట్రీస్, టాటా గ్రూప్ స్టాక్స్, అదానీ స్టాక్స్ వంటి హెవీ వెయిట్ షేర్లు పడిపోవడం ఇందుకు దోహదం చేసిందని చెప్పొచ్చు. ఇక ఈ సోమవారం రోజు భారత స్టాక్ మార్కెట్లు భారీగా పడిపోగా.. అదే రోజు ఇంట్రాడేలో రిలయన్స్ ఇండస్ట్రీస్ స్టాక్ 3 శాతానికిపైగా పడిపోయి రూ. 1156 వద్ద ఆల్ టైమ్ కనిష్ట స్థాయిని నమోదు చేసింది. ఇన్వెస్టర్లు తీవ్ర అమ్మకాల ఒత్తిడి జరిపిన నేపథ్యంలో ఇలా జరిగిందని చెప్పొచ్చు.

అయితే ఎట్టకేలకు రిలయన్స్ ఇండస్ట్రీస్ స్టాక్ పతనానికి బ్రేకులు పడ్డాయని చెప్పొచ్చు. ఇప్పుడు స్టాక్ మార్కెట్లు వరుసగా రెండు రోజులు లాభాల్లో ముగిసిన క్రమంలో ఈ స్టాక్ కూడా వరుసగా రెండు రోజులు పెరిగింది. నిన్న స్వల్పంగా ఒక శాతం వరకు పుంజుకోగా.. ఇప్పుడు మాత్రం మార్చి 6న ఏకంగా 3 శాతానికిపైగా పెరిగింది. ఇంట్రాడేలో రూ. 1213.95 వద్ద సెషన్ గరిష్టాన్ని తాకగా.. చివరకు 3.05 శాతం లాభంతో రూ. 1211.50 వద్ద సెషన్‌ను ముగించింది.

పలు బ్రోకరేజీ సంస్థలు రిలయన్స్ ఇండస్ట్రీస్ లిమిటెడ్ స్టాక్ రేటింగ్ అప్‌గ్రేడ్ చేయడం కొనుగోళ్లకు దారితీసింది. దీంతో స్టాక్ ధర పుంజుకుంది. జెఫరీస్ బై రేటింగ్ ఇవ్వడంతో పాగా స్టాక్ టార్గెట్ ప్రైస్ పెంచింది. ప్రస్తుతం టార్గెట్ ప్రైస్ రూ. 1600 గా అంచనా వేసింది. ఈ స్టాక్ గరిష్ట స్థాయిల నుంచి 27 శాతం వరకు పతనం కాగా.. ప్రస్తుత స్థాయి నుంచి 33.2 శాతం వరకు దూసుకెళ్తుందని పేర్కొంది.

ఇదే సమయంలో కోటక్ ఇన్‌స్టిట్యూషనల్ ఈక్విటీస్ కూడా బై రేటింగ్ ఇచ్చి.. టార్గెట్ ప్రైస్‌ను రూ. 1400 గా (16.6 శాతం అధికం) అంచనా వేసింది. మిగతా చాలా బ్రోకరేజీలు కూడా ఇదే సమయంలో బై రేటింగే ఇచ్చాయి. ఇవన్నీ ఎట్టకేలకు స్టాక్ పుంజుకునేందుకు దారి తీసినట్లు తెలుస్తోంది. ఇక రిలయన్స్ ఇండస్ట్రీస్ స్టాక్ 52 వారాల గరిష్ట ధర రూ. 1608.80 గా ఉండగా.. కనిష్ట ధర రూ. 1156 గా ఉంది.