డీఏ 2 శాతం, 3 శాతం.. ఎంత పెరిగితే జీతం ఎంత పెరుగుతుంది?

పెరుగుతున్న ధరలకు పరిహారంగా కేంద్ర ప్రభుత్వం.. తమ ఉద్యోగులకు కరవు భత్యం (DA) ఇస్తుందన్న సంగతి తెలిసిందే. దీనిని ప్రతి సంవత్సరం రెండు సార్లు సవరిస్తుంటుంది. ఇదే సమయంలో పెన్షనర్లకు డియర్‌నెస్ రిలీఫ్ (DR) ఇస్తుంది. అంటే ద్రవ్యోల్బణం పెరుగుతున్న వేళ ఈ డీఏ కూడా పెంచుతుంటుంది. ప్రస్తుతం డీఏ 53 శాతం వద్ద ఉంది. ఇటీవల వరుసగా 3 శాతం లేదా 4 శాతం పెరుగుకుంటూ వచ్చింది. ఇక ఇప్పుడు కూడా మార్చి నెలలో ప్రకటన ఉంటుంది. హోలీ పండగకు (మార్చి 14) ముందే ఇప్పుడు కేంద్ర ప్రభుత్వం ఈ డీఏ పెంపుపై ప్రకటన చేస్తుందని ఆంగ్ల మీడియాల్లో కథనాలు వస్తున్నాయి. అయితే కొన్నేమో 3 శాతం పెరిగి 56 శాతానికి చేరుతుందని.. ఇంకొన్ని 2 శాతం పెంపుతో 55 శాతానికి చేరుతుందని కథనాలు వెలువరించాయి.

ఏదేమైనా ఇది హోలీకి ముందే కేంద్ర కేబినెట్ ఆమోదం తెలిపే అవకాశాలు ఉన్నట్లు తెలుస్తుంది. కేంద్రం ఏటా జనవరి, జులై సమయాల్లో ఈ డీఏపై ప్రకటన చేయాల్సి ఉన్నప్పటికీ.. ఆలస్యంగా మార్చి, అక్టోబర్ సమయాల్లో ప్రకటిస్తూ వస్తుంది. అయినప్పటికీ.. బకాయిలతో కలిపి ముందునుంచే చెల్లిస్తుంటుంది. ఇప్పుడు మార్చిలో ప్రకటించినా కూడా జనవరి, ఫిబ్రవరి నెల బకాయిలు కూడా పడతాయని చెప్పొచ్చు.

చివరిసారి 2024, అక్టోబర్ నెలలో డీఏను కేంద్రం 3 శాతం పెంచింది. అప్పుడు 50 శాతం నుంచి 53 శాతానికి పెరిగింది. ఇది అక్టోబర్ 14న ప్రకటించింది. ఈ నిర్ణయంతో కోటి మందికిపైగా ఉద్యోగులు, పెన్షనర్లు ప్రయోజనం పొందారు. ఇక్కడ డీఏ పెరిగితే టేక్ హోమ్ శాలరీ పెరుగుతుందన్నమాట. అయితే ఇప్పుడు ఇది ఎలా పెరుగుతుందో మనం చూద్దాం. డీఏ పెంపు అనేది ఇండస్ట్రియల్ వర్కర్స్- ఆల్ ఇండియా కన్జూమర్ ప్రైస్ ఇండెక్స్ ఆధారంగా లెక్కిస్తారు. ఇక డీఏ అనేది ఉద్యోగి బేసిక్ పే (కనీస వేతనం) పై వర్తిస్తుంది.

ఈ లెక్కన కేంద్ర ప్రభుత్వ ఉద్యోగి బేసిక్ పే రూ. 40 వేలు అనుకుందాం. అంతకుముందు 53 శాతం డీఏ అంటే ఈ లెక్కన రూ. 21,200 డీఏ రూపంలో వచ్చేది. ఇప్పుడు 2 శాతం పెరిగితే 55 శాతానికి చేరుతుంది. అప్పుడు డీఏ రూ. 22 వేలకు చేరుతుంది. అంటే టేక్ హోమ్ శాలరీ రూ. 800 పెరుగుతుందని చెప్పొచ్చు. ఒకవేళ డీఏ 3 శాతం పెరిగితే 56 శాతానికి చేరుతుంది. ఇక్కడ చూస్తే డీఏ రూ. 22,400 గా వస్తుంది. ఇప్పుడు రూ. 1200 మేర టేక్ హోమ్ శాలరీ పెరుగుతుంది. ఎవరికైనా వారి బేసిక్ పేపైనా లెక్కలు వేసుకోవాలి. ఇలాగే బేసిక్ పెన్షన్‌పై లెక్కలేసుకోవాలి.