ఏపీలో కొత్త గ్రీన్‌ఫీల్డ్ ఎయిర్‌పోర్టు నిర్మాణం.. అత్యాధునిక టెక్నాలజీ వాడకం

ఏపీలో కొత్త ఎయిర్‌పోర్టుల నిర్మాణానికి వేగంగా అడుగులు పడుతున్నాయి. ఇప్పటికే పలుచోట్ల విమానాశ్రయాల ఏర్పాటుకై సాధ్యాసాధ్యాల పరిశీలన జరుగుతోంది. అలాగే ప్రీఫీజబులిటీ స్టడీలు, టెక్నో ఎకనమిక్ స్టడీ రిపోర్టు తయారీల కోసం కన్సల్టెన్సీలను ఆహ్వానిస్తున్నారు. మరోవైపు ఇప్పటికే నిర్మాణ పనులు చేపట్టిన భోగాపురం అంతర్జాతీయ విమానాశ్రయం విషయంలో వేగంగా అడుగులు పడుతున్నాయి. విజయనగరం జిల్లాలో భోగాపురం విమానాశ్రయాన్ని నిర్మిస్తున్నారు. అల్లూరి సీతారామరాజు అంతర్జాతీయ విమానాశ్రయం పేరుతో ఈ గ్రీన్‌ఫీల్డ్ ఎయిర్‌పోర్టు నిర్మాణం జరుగుతోంది. అయితే భోగాపురం ఎయిర్‌పోర్టు నిర్మాణంలో అత్యాధునిక సాంకేతికతను వినియోగిస్తున్నారు.

భోగాపురం విమానాశ్రయాన్ని 2200 ఎకరాల విస్తీర్ణంలో నిర్మిస్తున్నారు. మొత్తం మూడు దశల్లో ఎయిర్‌పోర్టు నిర్మిస్తున్నారు. మొదటి విడతలో ఏడాదికి 60 లక్షల మంది ప్రయాణికులు రాకపోకలు సాగించేందుకు వీలుగా ఎయిర్‌పోర్టు నిర్మాణ పనులు జరుగుతున్నాయి. రెండో దశలో ఈ సంఖ్యను కోటీ 20 లక్షల సామర్థ్యానికి పెంచనున్నారు. అలాగే మూడో దశలో ఏడాదికి కోటీ 80 లక్షల మంది ప్రయాణికులు రాకపోకలు సాగించేలా భోగాపురం ఎయిర్‌పోర్టు సామర్థ్యాన్ని పెంచనున్నారు. రూ.4592 కోట్ల వ్యయంతో మొదటి విడత పనులు చేపడుతున్నారు. 2023 మే నెలలో భోగాపురం విమానాశ్రయం పనులకు శంకుస్థాపన జరగ్గా.. 2026 జూన్ నాటికి ఈ నిర్మాణం పూర్తి చేసేలా కేంద్ర పౌర విమానయాన శాఖ పనులు చేపడుతోంది.

మరోవైపు భోగాపురం విమానాశ్రయంలో అత్యాధునిక భద్రతా ఏర్పాట్లు చేస్తున్నారు. ఎయిర్‌పోర్టు చెక్‌పోస్టుల వద్ద అండర్ వెహికల్ స్కానింగ్ సిస్టమ్ (యూవీఎస్ఎస్) ఏర్పాటు చేస్తున్నారు. గతంలో ఎయిర్‌పోర్టు లోపలకు వెళ్లే వాహనాలను అధికారులు భౌతికంగా తనిఖీ చేసేవారు. అయితే ఈ ప్రక్రియలో తప్పులు జరిగే అవకాశం ఉందనే జాగ్రత్తలత ఈ అండర్ వెహికల్ స్కానింగ్ సిస్టమ్స్ ఏర్పాటు చేస్తున్నారు. నోయిడాకు చెందిన వేహంట్ టెక్నాలజీస్ ఈ అధునాతన వెహికల్ స్కానింగ్ సిస్టమ్స్ అందించనుంది. మొత్తం ఐదు యూవీఎస్ఎస్‌లను ఏర్పాటు చేయనున్నారు.

చెక్ పాయింట్లలో అండర్ వెహికల్ స్కానింగ్ సిస్టమ్స్ ఏర్పాటు ద్వారా వాహనాల్లో ఏవైనా పేలుడు పదార్థాలు, ఆయుధాలు వంటి నిషేధిత సామాన్లు తీసుకెళ్తుంటే గుర్తించే వీలుంది. ఈ వ్యవస్థలు వేగంగా, అత్యంత కచ్చితత్వంతో పనిచేస్తాయని అధికారులు చెప్తున్నారు. ఎయిర్ పోర్టు భద్రతలో మానవ తప్పిదాలకు ఆస్కారం లేకుండా ఈ ఏర్పాట్లు చేస్తున్నట్లు తెలిసింది.