శ్మశానంలోనే హోలీ... ఏంటీ మసాన్ హోలీ

హోలీ పండగ దగ్గరికి వచ్చేసింది. చిన్నా పెద్ద తేడా లేకుండా దేశవ్యాప్తంగా అనేక రాష్ట్రాల్లో ఈ హోలీ పండగను ఘనంగా జరుపుకుంటారు. హోలీ పండగ కంటే ముందు రోజు నుంచే ఎలాంటి రంగులు తెచ్చుకోవాలి, ఎలాంటి బట్టలు వేసుకోవాలి అనే అంతా తర్జన భర్జన పడుతూ ఉంటారు. ఇక ముందురోజే రంగులు కొనుగోలు చేసి తెచ్చుకుంటారు. ఇక చాలా మంది కలిసి ఒకచోట గుమిగూడి.. హోలీ వేడుకలు చేసుకుంటారు. అయితే ఒక దగ్గర మాత్రం హోలీని వింతగా జరుపుకుంటున్నారు. ప్రతీ సంవత్సరం వాళ్లు అలాగే జరుపుకుంటుండటం విశేషం. శ్మశానంలోని బూడిదను రంగులుగా భావించి.. ఒకరిపై ఒకరు చల్లుకుంటూ ఈ హోలీని నిర్వహిస్తారు. ఇదే మసాన్ హోలీ. ఉత్తర్‌ప్రదేశ్‌లోని ప్రముఖ పుణ్యక్షేత్రమైన వారణాసి(కాశీ)లో ఈ మసాన్ హోలీని జరుపుకుంటారు.

అయితే ఈ మసాన్ హోలీని హోలీ పండగ రోజున కాకుండా అంతకంటే ముందుగానే జరుపుతారు. కాశీలోని హరిశ్చంద్ర ఘాట్‌లో మహా శ్మశాన్ హారతి తర్వాత ఈ మసాన్‌ హోలీని ప్రారంభిస్తారు. సాధువులు, శివ భక్తులు, ఇతరులు పరమ శివుడిని పూజించిన తర్వాత చితి కాలిన తర్వాత వచ్చే బూడిదతో హోలీ పండగ నిర్వహిస్తారు. ఈ మసాన్ హోలీ సమయంలో మణికర్ణికా ఘాట్ మొత్తం హర హర మహాదేవ్ అనే నామస్మరణతో మార్మోగిపోతూ ఉంటుంది. అయితే చితి నుంచి వచ్చిన బూడిదతో హోలీ ఆడటం వల్ల.. ఆ పరమ శివుడికి ఆనందం, ఆయన భక్తులకు శ్రేయస్సుతోపాటు ఆశీర్వాదం లభిస్తుందని ఎప్పటినుంచో విశ్వాసం ఉంది. అందుకే అక్కడ అలా జరుపుతారు.

మసాన్ హోలీ ఎప్పుడంటే..?

ఈ ఏడాది మసాన్ హోలీని మార్చి 11వ తేదీ(మంగళవారం) జరపనున్నారు. రంగభరి ఏకాదశి రోజున వారణాసిలో ఈ మసాన్ హోలీ పండగ ప్రారంభం అవుతుంది. ఈ రంగభరి ఏకాదశి నుంచి 6 రోజుల పాటు ఈ మసాన్ హోలీ వేడుకలను జరుపుకుంటారు. రంగభరి ఏకాదశి రెండవ రోజున మసాన్ హోలీ నిర్వహిస్తారు. మసాన్ హోలీ రోజున.. కాశీలోని హరిశ్చంద్ర, మణికర్ణిక ఘాట్లలో శివుడు తన అనుచరులతో వింత హోలీ ఆడతారని ఒక మతపరమైన నమ్మకం ఉంది. ఇక ఈ మసాన్ హోలీ అనే పండగ కాశీ ప్రజలకు అత్యంత ముఖ్యమైందిగా చెబుతారు. ఎందుకంటే ఈ మసాన్ హోలీ వారి సాంస్కృతిక గుర్తింపుతోపాటు ఆధ్యాత్మిక స్వభావాన్ని తెలియజేస్తుంది.

ఇక ఈ మసాన్ పండగ వేళ కాశీలో చితి బూడిదను ఉపయోగించడం ద్వారా జీవితంలోని అస్థిరత.. అలాగే జీవితంలో ఒక వ్యక్తి ఉనికిని తెలియజేస్తుంది. మనిషి తన భయాన్ని అదుపులో ఉంచుకుని.. మరణ భయాన్ని విడిచిపెట్టినప్పుడు జీవించడంలో ఆనందాన్ని పొందుతారని.. అందుకే ఈ మసాన్ హోలీ మరణ పండుగతో సమానంగా అక్కడి వారు భావిస్తారు. అహం, దురాశ ఉన్నప్పటికీ వారి జీవితం బూడిదగా మారి ముగుస్తుందని మసాన్ హోలీ ద్వారా తెలుస్తుంది. చివరికి మనిషికి మిగిలేది బూడిద మాత్రమే అనేదాన్ని ఈ పండగ ద్వారా తెలుసుకోవచ్చు. ఇక ఈ మసాన్ హోలీ వేడుకల్లో హిందువులు మాత్రమే కాకుండా వేర్వేరు మతాలకు చెందినవారు కూడా పాల్గొంటారు. దీంతో స్థానిక ప్రజల్లో మత సామరస్యం, ఐక్యతను పెంపొందిస్తోందని చెబుతుంటారు.