ఎస్ఎంఈ ఐపీఓ రూల్స్ కఠినతరం..సెబీ కీలక నిర్ణయం

 స్టాక్ మార్కెట్లో నిధుల సమీకరణ కోసం కంపెనీలు పబ్లీక్ ఇష్యూకు వస్తుంటాయి. ఇందులో కేటగిరీలు ఉంటాయి. ఇటీవలి కాలంలో స్మాల్ మీడియం ఎంటర్ ప్రైజెస్ ఐపీఓలకు ఎక్కువగా వస్తున్నాయి. అయితే ఈ ఎస్ఎంఈ ఐపీఓలకు చెక్ పెట్టేందుకు మార్కెట్ నియంత్రణ సంస్థ సెబీ కీలక నిర్ణయం తీసుకుంది. పబ్లిక్ ఇష్యూకు వచ్చేందుకు కొత్త నిబంధనలను నిర్దేశించింది. రూల్స్ కఠినతరం చేస్తూ నోటిఫికేషన్ జారీ చేసింది.

కొత్త రూల్స్‌లో లాభదాయకత, 20 శాతానికి మించకుండా ఆఫర్ ఫర్ సేల్ వంటి లిమిట్స్ పెట్టింది సెబీ. రిటైల్ ఇన్వెస్టర్ల ప్రయోజనాలను కాపాడేందుకే ఈ కొత్త రూల్స్ తీసుకొచ్చినట్లు పేర్కొంది. ఇటీవలి కాలంలో ఎస్ఎంఈ పబ్లిక్ ఇష్యూల్లో ఇన్వెస్టర్లు పెట్టుబడులు పెట్టేందుకు ఇష్టపడుతున్న క్రమంలో సెబీ ఈ మేరకు నిబంధనలు కఠినతరం చేసినట్లు తెలుస్తోంది. కొత్త రూల్స్ ప్రకారం ఎస్ఎంఈ సెక్టార్‌లో ఏదైనా కంపెనీ పబ్లిక్ ఇష్యూకు రావాలంటే గత మూడేళ్లలో కనీసం రెండేళ్ల పాటు రూ.1 కోటి నిర్వహణ లాభాలను పొంది ఉండాలి. ఈ ఐపీఓల్లో ఆఫర్ ఫర్ సేల్ ద్వారా షేర్ హోల్డర్లు 20 శాతానికి మించి వాటాను విక్రయించేందుకు వీలు లేదు. ప్రస్తుత వాటాదారులెవరూ 50 శాతానికి మించి వాటాను విక్రయించడానికి అవకాశం లేదు.

కనీస వాటా పరిమితికి మించి అదనంగా ఉన్న షేర్ హోల్డింగ్‌కు లాక్ ఇన్ పీరియడ్ ఉంటుంది. ఏడాది తర్వాత అదనపు వాటాను, రెండేళ్ల తర్వాత మిగితా 50 శాతం వాటాను వదులుకునేందుకు అవకాశం లభిస్తుంది. నాన్ ఇన్‌స్టిట్యూషనల్ ఇన్వెస్టర్లకు షేర్ల అలకేషన్‌కు మెయిన్ బోర్డు ఐపీఓ రూల్సే ఎస్ఎంఈకి వర్తిస్తాయి. ఎస్ఎంఈ ఐపీఓల సబ్‌స్క్రిప్షన్కు కనీసం రెండు లాట్లు కొనాల్సి ఉంటుంది.

ఐపీఓ ద్వారా సమీకరించిన నిధులను సాధారణ కార్పొరేట్ అవసరాల పేరుతో ఇతర అవసరాలకు వాడకూడదు. మొత్తం నిధుల్లో 15 శాతం లేదా రూ.10 కోట్లు మాత్రమే గరిష్ఠంగా ఉపయోగించుకోవాలి. ప్రమోటర్లు, ప్రమోటర్ గ్రూప్స్, సంబంధిత పార్టీలు ప్రత్యక్షంగా లేదా పరోక్షంగా తీసుకునే లోన్స్‌కి ఐపీఓ నిధులను ఉపయోగించకూడదు. ఎస్ఎంఈ ఐపీఓలకు సంబంధించిన ముసాయిదా పత్రాలను 21 రోజుల పాటు అందుబాటులో ఉంచాలి. డీహెచ్‌ఆర్‌పీని సులువుగా యాక్సెస్ చేసేందుకు వీలుగా క్యూఆర్ కోడ్ ముద్రించాలి.