అంగన్వాడీలకి ఇచ్చిన హామీలని వెంటనే నెరవేర్చాలి
Andhra Pradesh Telugu | Suryaa Desk | Published : Wed, Mar 12, 2025, 09:50 AM
న్యాయమైన డిమాండ్ల సాధన కోసం అంగన్వాడీలు నిర్వహించిన ఆందోళనలను కూటమి ప్రభుత్వం ఉక్కుపాదంతో కర్కశంగా అణిచివేయడం దుర్మార్గమని వైయస్ఆర్సీపీ ఎంప్లాయీస్ అండ్ పెన్షనర్స్ వింగ్ రాష్ట్ర అధ్యక్షుడు నలమారు చంద్రశేఖర్రెడ్డి మండిపడ్డారు. తాడేపల్లి వైయస్ఆర్సీపీ కేంద్ర కార్యాలయంలో మీడియాతో మాట్లాడుతూ ఎన్నికలకు ముందు అంగన్వాడీలకు ఇచ్చిన హామీలను అధికారంలోకి వచ్చిన తరువాత పూర్తిగా విస్మరించారని ఆగ్రహం వ్యక్తం చేశారు. కూటమి ప్రభుత్వం పాలన ఉద్యోగ వ్యతిరేక పాలనగా సాగుతోందని ధ్వజమెత్తారు. ఆయన మాట్లాడుతూ..... దాదాపు లక్ష మంది ఉన్న అంగన్వాడీ వర్కర్లు, హెల్పర్ల ఓట్ల కోసం డిసెంబర్ 2023న కుప్పంలో జరిగిన మీటింగ్లో అధికారంలోకి వచ్చాక అన్ని డిమాండ్లు నెరవేరుస్తామని చంద్రబాబు హామీ ఇచ్చారు. కానీ అధికారంలోకి వచ్చాక ఆయన తీరు పూర్తిగా మారిపోయింది. తమ బాధలు ప్రభుత్వానికి వినిపించేందుకు రాష్ట్ర నలుమూలల నుంచి వస్తున్న అంగన్వాడీ వర్కర్లను విజయవాడలోకి రానీయకుండా పోలీసులను మోహరించి ఎక్కడికక్కడ నిలిపివేశారు. ఎన్నికల సమయంలో ఇచ్చిన హామీలనే జూలై నుంచే అమలు చేయాలంటూ అంగన్వాడీలు డిమాండ్ చేయడం నేరమా? మరీ దారుణంగా ట్రైన్లలో నిద్రపోతున్న అంగన్వాడీ మహిళల ఫొటోలు తీసి సంబంధిత అధికారులకు పంపి చర్యలు తీసుకోవాలని ఆదేశించడం, వారికి వెంటనే షోకాజ్ నోటీసులు ఇవ్వడం చూస్తుంటే ఇంత నిరంకుశ ప్రభుత్వాన్ని ఎప్పుడూ చూడలేదని మహిళలు వాపోతున్నారు అని అన్నారు.
|
|