12 ఏళ్లకు మొదటి పెళ్లి, 15 సంవత్సరాలకు రెండోసారి వివాహం

కర్ణాటకలోని గోగాక్ తాలూకాకు చెందిన ఓ గ్రామంలో పుట్టిన బాలిక ఫిబ్రవరి 12వ తేదీన బెళగావిలోని ఓ ప్రైవేటు ఆసుపత్రిలో ఆడపిల్లకు జన్మను ఇచ్చింది. నవజాత శిశువు బరువు తక్కువగా ఉండడంతో పుట్టిన వెంటనే చిన్నారి చనిపోయింది. అయితే ప్రసవించిన బాలిక చాలా చిన్నగా కనిపించడంతో వైద్యులు ఓ ఎన్జీఓకు సమాచారం అందించారు. ఈక్రమంలోనే ఎన్జీఓ సభ్యులు బాలిక గురించి తెలుసుకున్నారు. ముఖ్యంగా ఆమె వయసు ప్రస్తుతం 15 సంవత్సరాలు మాత్రమేనని గుర్తించి షాక్ అయ్యారు.

ముఖ్యంగా ఆమె పాఠశాల పత్రాల ప్రకారం ఆమె పుట్టిన తేదీ 2010 జనవరి 1. అయితే ఇదే తేదీతో ఆమె ఆధార్ కార్డు కూడా పొందింది. కానీ గతేడాది సదరు బాలిక ఓ వ్యక్తితో పారిపోయింది. ఫలితంగా ఆమె గర్భం దాల్చింది. అయితే ఆస్పత్రిలో చూపించాలంటే ఆధార్ కార్డు అడగడంతో.. సదరు వ్యక్తి బాలిక ఆధార్ కార్డులో పుట్టిన రోజు తేదీన మార్చేశాడు. ముఖ్యంగా ఆమె 2005వ సంవత్సరం జనవరి 1వ తేదీన పుట్టినట్లు మార్పించాడు. ఈ విషయం గుర్తించిన అధికారులు అతడితో పాటు బాలికను ఆరా తీశారు. ఈక్రమంలోనే మరిన్ని షాకింగ్ విషయాలు తెలుసుకున్నారు.

సదరు బాలికకు 12 ఏళ్ల వయసులోనే తొలిసారి పెళ్లి అయిందని.. అప్పుడు హుక్కేరి తాలూకాలోని ప్రాథమిక ఆరోగ్య కేంద్రంలో ఓ మగ బిడ్డకు జన్మనిచ్చిందని చెప్పారు. కానీ బరువు తక్కువగా ఉండి పుట్టడంతో ఆ శిశువు కూడా వెంటనే ప్రాణాలు కోల్పోయిందన్నారు. ఈ విషయాలు తెలుసుకున్న ఎన్జీఓ సభ్యులు.. నేరుగా పోలీసుల వద్దకు వెళ్లి ఫిర్యాదు చేశారు. ఈక్రమంలోనే పోలీసులు బాలిక మొదటి భర్త, రెండో భార్త, వారి తల్లిదండ్రులు, బాలిక తల్లిదండ్రులపై బాల్య వివాహం, పోక్సో చట్టం కింద కేసులు నమోదు చేశారు. ప్రస్తుతం దర్యాప్తు సాగిస్తున్నారు.

అయితే 15 ఏళ్ల వయసులోనే రెండు సార్లు పెళ్లిళ్లు చేసుకుని, ఇధ్దరు పిల్లలను పోగొట్టుకున్న ఆ బాలికను మాత్రం శిశు సేంక్షేమ కేంద్రంలో ఉంచుకుంటామని.. 18 ఏళ్లు నిండే వరకు చాలా జాగ్రత్తగా కాపాడతామని అధికారులు చెబుతున్నారు. వ్యవస్థలో లోపాల వల్లే ఈ చిన్నారి జీవితం నాశనం అయిందని... ఇప్పటికైనా అధికారులు మేల్కొని చిన్న పిల్లలకు పెళ్లిళ్లు జరగకుండా జాగ్రత్తలు తీసుకోవాలని హెచ్చరిస్తున్నారు.