ప్రభుత్వ ఉద్యోగులకు తమిళం తప్పనిసరి..: మద్రాస్ హైకోర్టు

తమిళనాడు రాష్ట్రంలో ప్రభుత్వ ఉద్యోగాల కోసం ప్రయత్నించే వారందరికీ కచ్చితంగా తమిళ భాష వచ్చి ఉండాలని మద్రాస్ హైకోర్టు తేల్చి చెప్పింది. ప్రతీ రోజూ స్థానిక ప్రజలతో ఉంటూ.. అక్కడే పని చేసే వారికి మాతృ భాష రాకపోతే అనేక సమస్యలు వస్తాయని వివరిచింది. అసలు వారితో కలిసి రోజువారీ పనులు కూడా చేయలేరంటూ చెప్పుకొచ్చింది. అందుకే సర్కారు ఉద్యోగుల కోసం దరఖాస్తులు చేస్తున్న అభ్యర్థులు అందరూ తమిళం రాయడం, చదవడం నేర్చుకోవాలని చెప్పింది. ఆ పూర్తి వివరాలు మీకోసం.

ఎం విజయ్ కుమార్ అనే వ్యక్తి తమిళనాడు ఎలక్ర్టిసిటీ బోర్డులో ఉద్యోగం చేస్తున్నాడు. రెండేళ్ల క్రితమే ఆయనకు ఈ ఉద్యోగం రాగా.. త్వరగా తమిళం నేర్చుకోవాలంటూ అధికారులు సూచించారు. ముఖ్యంగా రెండు సంవత్సరాల గడువు కూడా ఇచ్చారు. అయితే ఇటీవలే సర్కారు తమిళ భాషలో అతడికి ఓ పరీక్ష పెట్టింది. అయితే అందులో విజయ్ కుమార్ ఫెయిల్ అయ్యాడు. దీంతో పైఅధికారులు అతడిని ఉద్యోగంలోంచి తొలగించారు. ఉద్యోగం పోవడంతో తీవ్ర నిరాశకు గురైన అతడు.. మద్రాస్ హైకోర్టును ఆశ్రయించాడు.

తన తండ్రి నావికా దళంలో పని చేస్తుండడం వల్ల తాను సీబీఎస్ఈ పాఠశాలల్లో చదివానని తన పిటిషన్‌లో వివరించాడు. అందువల్లే తమిళం నేర్చుకోవడానికి వీలు కుదరలేదని వెల్లడించాడు. అయితే ఈరోజు విచారణ జరిపిన న్యాయస్థానం అతడి పిటిషన్‌ను కొట్టేసింది. ముఖ్యంగా స్థానిక ప్రజలతో కలిసి ఉంటూ రోజూ విధులు నిర్వహించే సర్కారు ఉద్యోగికి మాతృభాష అయిన తమిళం రాకపోతే ఎలా పని చేయగల్గుతారంటూ న్యాయమూర్తులు జి జయచంద్రన్, ఆర్ పూర్ణిమలు ప్రశ్నించారు.

తమిళం రాయడం, చదవడం రాకపోతే మీరెలా పని చేస్తారు, ఎలా రోజువారీ కార్యక్రమాలను నిర్వహిస్తారని న్యాయస్థానం అడిగింది. ఏ రాష్ట్రంలో అయినా సరే ప్రభుత్వ ఉద్యోగులు ఆయా రాష్ట్ర మాతృ భాషలను నేర్చుకోవాలని.. లేకపోతే ఎవరూ అక్కడ పనులు చేయలేరంటూ వ్యాఖ్యానించింది. అభ్యర్థులు ప్రభత్వ భాషా పరీక్షలో నీర్ణీత సమయంలోపు ఉత్తీర్ణులు కావాలని వివరించింది. తమిళం తెలియకుండా అసలు ప్రభుత్వ ఉద్యోగాన్ని ఎలా, ఎందుకు కోరుకుంటారని మరోసారి ప్రశ్నించింది.

అయితే తుది వాదనకు సిద్ధంగా ఉండాలని.. ఇరుపక్షాలను ఆదేశించిన కోర్టు కేసును ఆరు వారాల పాటు వాయిదా వేసింది. ఇప్పటికే తమిళనాడు రాష్ట్ర ప్రభుత్వం, కేంద్రంలో ఉన్న బీజేపీ సర్కారుల మధ్య భాషా యుద్ధం తీవ్రం అవుతుండగా.. కోర్టు ఈ వ్యాఖ్యలు చేయడంతో ప్రాధాన్యత సంతరించుకుంది.