6 నెలల బాలుడిని తలకిందులుగా వేలాడదీసి.. ఆపై కింద నిప్పు పెట్టి..

మానవులు సైతం ఇతర గ్రహాలపైకి వెళ్లి పరిశోధనలు చేసే స్థాయిలో సైన్స్ అభివృద్ధి చెందినా.. కొంత మంది మాత్రం పాత కాలం పద్ధతులనే ఫాలో అవుతున్నారు. ఆరోగ్యం బాగా లేకపోతే వైద్యుల వద్దకు వెళ్లడానికి బదులుగా.. భూత వైద్యుల వద్దకు వెళ్తూ తాయత్తులు, యంత్రాలు కట్టించుకుంటున్నారు. అచ్చంగా ఇలాగే చేసిందో జంట. తమ ఆరు నెలల చిన్నారికి ఆరోగ్యం బాగాలేదని ఓ భూత వైద్యుడి వద్దకు తీసుకెళ్లగా.. గాలి సోకిందని చెప్పాడు. కింద నిప్పు పెట్టి తలకిందులుగా వేలాడదీస్తే ఆరోగ్యం బాగువుతుందంటూ అలాగే చేశాడు. ఫలితంగా చిన్నారి రెండు కళ్లు పూర్తిగా పాడయ్యాయి. ఈ దారుణ ఘటన ఎక్కడ జరిగిందో మనం ఇప్పుడు తెలుసుకుందాం.

మధ్య ప్రదేశ్‌లోని శివపురి జిల్లా కోట్వర్ గ్రామానికి చెందిన ఓ జంటకు ఇటీవలే పండంటి మగబిడ్డ జన్మించాడు. ప్రస్తుతం ఆ బాబు వయసు ఆరు నెలల కాగా.. ఈ మధ్య కాస్త అనారోగ్యం పాలయ్యాడు. అయితే ఆ చిన్నారిని ఆస్పత్రికి తీసుకు వెళ్లాల్సిన తల్లిదండ్రులు.. భూత వైద్యుడి వద్దకు వెళ్తే తమ కుమారుడి ఆరోగ్యం బాగు అవుతుందనుకున్నారు. వెంటనే ఆ పసి బాబును తీసుకుని.. వారికి తెలిసిన భూత వైద్యుడు రఘువీర్ వద్దకు తీసుకెళ్లారు. అక్కడకు వెళ్లగానే చిన్నారిని చూసిన అతడు సమస్య ఏంటని ప్రశ్నించాడు.

తమ కుమారుడికి గాలి సోకిందని తల్లిదండ్రులు చెప్పగా.. అవును అది నిజమేనని భూత వైద్యుడు రఘువీర్ వివరించాడు. అయితే ఆ గాలి పోవాలంటే చిన్నారిని తలకిందులుగా వేలాడదీసి కింద నిప్పు పెట్టాలని.. అలా కాసేపు ఉంచితే పూర్తిగా నయం అవుతుందంటూ నమ్మబలికాడు. తల్లిదండ్రులు కూడా బాబు బాగవుతాడనుకుని.. అందుకు సరేనన్నారు. ఈక్రమంలోనే భూత వైద్యుడు రఘువీర్.. చిన్నారిని తలకిందులుగా వేలాడదీసి కింద మంట పెట్టారు.

పొగ, మంట వల్ల వస్తున్న వేడితో చిన్నారి విపరీతంగా ఏడ్చింది. అయినా సరే భూత వైద్యుడు చిన్నారిని అలాగే ఉంచాడు. తల్లిదండ్రులు సైతం చోద్యం చూస్తూ ఉండిపోయారు. చాలా సేపటి తర్వాత చిన్నారిని కిందకు దించారు. కానీ బాలుడు చూడడం మానేశాడు. దీంతో భయపడిపోయిన ఆ తల్లిదండ్రులు బాలుడిని వెంటనే ఆస్పత్రికి తీసుకెళ్లారు. పరీక్షించిన వైద్యులు చిన్నారి కళ్లు పూర్తిగా పాడయ్యాయని.. 72 గంటలు గడిస్తే తప్ప కళ్లు ఉంటాయో, పూర్తిగా పోతాయే చెప్పలేమని వెల్లడించారు. అలాగే ఏం జరిగిందని అడగ్గా.. జంట అసలు విషయం చెప్పింది.

దీంతో వైద్యులు పోలీసులకు ఫిర్యాదు చేశారు. కేసు నమోదు చేసుకున్న పోలీసులు దర్యాప్తు ప్రారంభించారు. ముఖ్యంగా ఆస్పత్రిలో ఉన్న చిన్నారిని పరిశీలించి.. వైద్యులతో మాట్లాడారు. ఆపై బాలుడి తల్లిదండ్రులను విచారించి... భూత వైద్యుడి అడ్రస్ తెలుసుకున్నారు. నేరుగా అక్కడకు వెళ్లి భూత వైద్యుడు రఘువీర్‌ను అరెస్ట్ చేశారు.