కొన్ని ఆసనాలు రెగ్యులర్‌గా వేస్తే బరువు తగ్గాలన్న మీ కోరిక నెరవేరుతుంది

ఈ రోజుల్లో బిజీ లైఫ్‌స్టైల్, అనారోగ్యకరమైన ఆహారపు అలవాట్లు కారణంగా ఊబకాయం లేదా అధిక బరువుతో చాలా మంది బాధపడుతున్నారు. ఊబకాయం శారీరక ఆరోగ్యాన్ని మాత్రమే కాకుండా మానసిక ఆరోగ్యాన్ని కూడా ప్రభావితం చేస్తుంది. ఇక, బరువు తగ్గడం కోసం చాలా మంది రకరకాల ప్రయత్నాలు చేస్తున్నారు. కొందరు తినే ఆహారంలో మార్పులు చేసుకుంటే, మరికొందరు జిమ్‌లు చుట్టూ తిరుగుతున్నారు. కానీ, సరైన ఫలితాలు ఉండటం లేదు.

మీరు కూడా బరువు తగ్గడానికి రకరకాల ప్రయత్నాలు చేస్తున్నా ఫలితం లేదని బాధపడుతున్నారా? అయితే, యోగా మీకు సాయం చేస్తుందని తెలుసా.. డైటింగ్, వ్యాయామంతో పాటు బరువు తగ్గడానికి యోగా కూడా బెస్ట్ ఆప్షన్ అంటున్నారు నిపుణులు. యోగా శరీరాన్ని ఆరోగ్యంగా ఉంచడమే కాకుండా మనస్సును ప్రశాంతంగా, ఒత్తిడి లేకుండా చేస్తుంది. బరువు తగ్గడానికి ఐదు ప్రభావవంతమైన యోగా భంగిమలు ఉన్నాయి. ఆ భంగిమలేంటో ఇక్కడ తెలుసుకుందాం.

సూర్య నమస్కారం

​సూర్య నమస్కారం శరీరంలోని అన్ని భాగాలను ఉత్తేజపరుస్తుంది. ఇది 12 ఆసనాల శ్రేణిని కలిగి ఉంటుంది. ఇది శరీర కొవ్వును తగ్గించడంలో సాయపడుతుంది. ఈ ఆసనం జీర్ణవ్యవస్థను బలోపేతం చేస్తుంది. శరీరం నుంచి విష పదార్థాలను తొలగిస్తుంది. సూర్య నమస్కారం క్రమం తప్పకుండా చేయడం వల్ల బరువు తగ్గవచ్చంటున్నారు నిపుణులు. అంతేకాకుండా ఇది శరీరాన్ని సరళంగా మారుస్తుంది.

త్రికోణాసన భంగిమ (త్రికోణాసన)

త్రికోణాసన లేదా త్రిభుజాకార భంగిమ శరీర సమతుల్యతను కాపాడుకోవడానికి మంచి యోగా ఆసనం. అంతేకాకుండా శరీరంలో పేరుకుపోయిన కేలరీలను బర్న్ చేయడంలో సాయపడుతుంది. ఈ ఆసనం కడుపు, నడుము, తొడల కొవ్వును తగ్గించడంలో చాలా ప్రభావవంతంగా ఉంటుంది. ఇలా చేయడం వల్ల జీర్ణవ్యవస్థ బలపడుతుంది. క్రమం తప్పకుండా చేయడం వల్ల శరీర జీవక్రియ పెరుగుతుంది . అంతేకాకుండా శరీర ఆకారం చక్కగా మారుతుంది.

పర్వత భంగిమ (పర్వతాసనం)

పర్వతాసన లేదా పర్వత భంగిమ అనేది బరువు తగ్గడానికి సాయపడే సరళమైన, ప్రభావవంతమైన ఆసనం. ఈ ఆసనం కడుపు కండరాలను బలపరుస్తుంది. జీర్ణక్రియను మెరుగుపరుస్తుంది. పర్వతాసనం చేయడం వల్ల శరీరంలోని కొవ్వు తగ్గిపోయి వెన్నెముక బలంగా మారుతుంది. ఈ ఆసనం ఒత్తిడిని తగ్గించడంలో, మనస్సును ప్రశాంతంగా ఉంచడంలో సాయపడుతుంది.

భుజంగాసనము

భుజంగాసనం లేదా కోబ్రా భంగిమ బొడ్డు కొవ్వును తగ్గించడానికి చాలా ప్రయోజనకరంగా ఉంటుంది. ఈ ఆసనం వల్ల ఉదర కండరాలు సాగి జీర్ణవ్యవస్థ ఉత్తేజితమవుతుంది. ఈ ఆసనం రోజూ చేయడం వల్ల శరీరంలో జీవక్రియలు పెరిగి కేలరీలు వేగంగా ఖర్చవుతాయి. ఈ ఆసనం వెన్నెముకను సరళంగా మార్చి వెన్నునొప్పి నుంచి ఉపశమనాన్ని కలిగిస్తుంది.

ధనురాసనము

ధనురాసన లేదా విల్లు భంగిమ శరీరం నుంచి అదనపు కొవ్వును తగ్గించడానికి ఒక అద్భుతమైన ఆసనం. ఈ ఆసనం వల్ల కడుపు, తొడలు, నడుము కండరాలు బలపడతాయి. ఇలా చేయడం వల్ల జీర్ణవ్యవస్థ మెరుగుపడి శరీర జీవక్రియ పెరుగుతుంది. ఈ ఆసనం ఒత్తిడిని తగ్గించడంలో, శరీరాన్ని శక్తివంతం చేయడంలో కూడా సాయపడుతుంది. ఈ ఆసనాలు రోజూ చేయడం వల్ల బరువు తగ్గడమే కాకుండా శరీరానికి ఎంతో మేలు జరుగుతుందని నిపుణులు అంటున్నారు.