పెళ్లైన నెల నుంచే మేము వేరుగా ఉంటున్నాం.. కోర్టులో రన్యారావు భర్త

దుబాయి నుంచి అక్రమంగా బంగారం రవాణా చేస్తూ విమానాశ్రయంలో పోలీసులకు రెడ్ హ్యాండెడ్‌గా దొరికిపోయిన నటి రన్యారావు కేసులో విస్తుపోయే విషయాలు వెలుగులోకి వస్తున్నాయి. ముఖ్యంగా ఈరోజు కోర్టుకు హాజరైన ఆమె భర్త షాకింగ్ కామెంట్లు చేశారు. పెళ్లైన నెల నుంచే తాను.. తన భార్య రన్యా రావుతో దూరంగా ఉంటున్నట్లు చెప్పుకొచ్చారు. అధికారికంగా విడాకులు తీసుకోకపోయినా.. తాము ప్రస్తుతం వేర్వేరుగానే ఉంటున్నట్లు వివరించారు. ఆపూర్తి వివరాలు మీకోసం.

నాలుగు నెలల కిందటే రన్యారావు.. జతిన్ హుక్కేరిని పెళ్లి చేసుకుంది. ఇరు కుటుంబ పెద్దలు, బంధువులు, స్నేహితుల మధ్య పంచతార హోటల్ తాజ్ వెస్ట్ ఎండ్‌లో వీరిద్దరి వివాహం చాలా ఘనంగా జరిగింది. వీరి పెళ్లికి అనేక మంది సినీ ప్రముఖులు, రాజకీయ ప్రముఖులు కూడా హాజరయ్యారు. అయితే వివాహం జరిగిన తర్వాత నుంచి ఈ జంట ల్యావెల్లీ రోడ్డులోనే ఓ విలాసవంతమైన అపార్ట్‌మెంట్‌లో నివాసం ఉంటున్నారు. అలాగే జతిన్ హుక్కేరి.. ఆర్వీ ఇంజినీరింగ్ కళాశాల నుంచి ఆర్కిటెక్చర్, ఇంటీరియర్ డిజైనింగ్ కోర్సును పూర్తి చేశారు.

ప్రస్తుతం ఇంటీరియర్ డిజైనర్‌గా, నగరంలో ఓ రెస్టారెంట్ యజమానిగా కొనసాగుతున్నారు. అయితే తన వ్యాపారాలను ముంబయి, ఢిల్లీలకు కూడా విస్తరించాలని ప్రయత్నాలు చేస్తున్నారు. ఇదంతా బాగానే ఉండగా.. ఇటీవలే రన్యారావు దుబాయి నుంచి అక్రమంగా బంగారం రవాణా చేస్తూ దొరికిపోయింది. ఇక అప్పటి నుంచి పోలీసులు ఈ కేసుతో ఎవరెవరికి సంబంధాలు ఉన్నాయని పరిశీలిస్తున్నారు. ఈక్రమంలోనే రన్యారావు.. దుబాయి వెళ్లేందుకు తన భర్త జతిన్ హుక్కేరి క్రెడిట్ కార్డు నుంచి టికెట్లు బుక్ చేసుకున్నట్లు గుర్తించారు.

అయితే ఈకేసులో అతడికి కూడా సంబంధం ఉండొచ్చని భావించిన పోలీసులు.. అతడికి చెందిన తొమ్మిది ప్రదేశాల్లో సోదాలు నిర్వహించారు. ఈక్రమంలోనే డీఆర్ఐ తనతను అరెస్ట్ చేయకుండా ఉండాలంటూ జతిన్ హుక్కేరి.. కర్ణాటక హైకోర్టులో పిటిషన్ వేశారు. అందులో భాగంగానే రన్యారావుతో తనకు గత నవంబర్ నెలలో వివాహం అయిందని.. అయితే డిసెంబర్ నుంచే తాము విడిగా ఉంటున్నామని పిటిషన్‌లో వెల్లడించారు. తాము అధికారికంగా విడిపోలేదని.. అయితే కొన్ని కారణాల వల్ల మాత్రం వేర్వేరుగా జీవిస్తున్నామని జతిన్ హుక్కేరి చెప్పారు.

ఆయన వాదనలు విన్న కర్ణాటక హైకోర్టు జతిన్ హుక్కేరిపై ఎలాంటి చర్యలు తీసుకోవద్దంటూ ఆదేశాలు జారీ చేసింది. ముఖ్యంగా మార్చి 24వ తేదీ వరకు ఇవి అమల్లో ఉండగా.. జతిన్ హుక్కేరిని అరెస్ట్ చేయడం కుదరదు. దీని తర్వాతే తాము జతిన్ హుక్కేరి చేసిన అభ్యర్థనకు వ్యతిరేకంగా పిటిషన్ వేస్తామని డైరెక్టరేట్ ఆఫ్ రెవెన్యూ ఇంటిలిజెన్స్ అధికారులు వెల్లడించారు.