సీఎం, మంత్రులు, ఎమ్మెల్యేల జీతాలు 100% పెంపు,,,,కర్ణాటక సర్కారు సంచలన నిర్ణయం

కర్ణాటక సర్కారు సంచలన నిర్ణయం తీసుకుంది. ముఖ్యంగా అక్కడి శాసన సభ్యుల జీతాల పెంపును ప్రతిపాదిస్తూ.. కర్ణాటక శాసనసభ జీతాలు, పెన్షన్లు మరియు భత్యాలు సవరణ బిల్లును కర్ణాటక శాసన సభ ఆమోదించింది. దీంతో కర్ణాటక ముఖ్యమంత్రి, మంత్రులు, ఎమ్మెల్యేల జీతాలు 100 శాతం పెరగబోతున్నాయి. అంటే రెట్టింపు కాబోతున్నాయి. ఈ జీతాల పెంపుతో ప్రభుత్వ వార్షిక వ్యయం రూ.10 కోట్లు పెరుగుతుందని నిపుణులు భావిస్తున్నారు. సమావేశానికి అంతరాయం కల్గించిన హానీట్రాప్ వివాదంపై అసెంబ్లీలో గందరగోళం ఉన్నప్పటికీ ఈ బిల్లును ఆమోదించారు. ఆ పూర్తి వివరాలు మీకోసం.

కర్ణాటక శాసన సభ్యుల జీతాలు, భత్యాలు సవరణ బిల్లుతో పాటు కర్ణాటక శాసనసభ జీతాలు, పెన్షన్లు మరియు భత్యాల బిల్లలు ఎలాంటి చర్చ లేకుండానే అసెంబ్లీలో ఆమోదించబడ్డాయి. దీంతో ప్రతిపక్ష బీజేపీ నేతలు సభలోనే నిరసన వ్యక్తం చేశారు. కానీ దీన్ని సమర్థించుకుంటూ.. అధికార కాంగ్రెస్ పార్టీ అనేక విషయాలను వివరించింది. జీవన వ్యయంలో గణనీయమైన పెరుగుదల ఉందని.. ముఖ్యమంత్రి, మంత్రులు, సహాయ మంత్రులు, డిప్యూటీ మంత్రుల జీతాలు, భత్యాలు చాలా కాలంగా సవరించలేమని వెల్లడించారు.

ఈ బిల్లు ఆమోదించడంతో.. కర్ణాటక ముఖ్యమంత్రి సిద్ధరామయ్య జీతం నెలకు రూ.75,000 నుంచి రూ.1.5 లక్షలకు చేరుకుంది. అలాగే ఎమ్మెల్యేలు, ఎమ్మెల్సీలు సహా శాసన సభ్యుల జీతాలు నెలకు రూ.40,000 నుంచి రూ.80,000కి రెట్టింపు అవుతాయి. ఇవి మాత్రమే కాకుండా శాసన సభ్యుల నియోజకవర్గ భత్యం నెలకు రూ.60,000 నుంచి లక్ష రూపాయలకు పెరగబోతుంది. మంత్రుల ఇంటి అద్దె భత్యం నెలకు రూ.1.2 లక్షల నుంచి రూ.2 లక్షలకు పెరుగుతుంది. ఎమ్మెల్యేలు, ఎమ్మెల్సీలు చాలా కాలంగా చెల్లించాల్సిన జీతా సవరణ కోసం డిమాండ్ చేయగా.. ఈ బిల్లను రూపొందించినట్లు వర్గాల చెబుతున్నాయి.

2022 సవరణ ప్రకారం ప్రతి 5 సంవత్సరాలకు ఒకసారి జీతాల పెంపుదల తప్పనిసరి. కానీ అది ఎప్పుడూ అమలు కాలేదు. ఇదంతా ఇలా ఉండగా.. ఈ జీతాల పెంపును కర్ణాటక హోంమంత్రి జి. పరమేశ్వర సమర్థించారు. చాలీ చాలని జీతాల వల్ల సామాన్యులు బాధ పడుతున్నారని.. ఎమ్మెల్యేలు కూడా జీతాల కోసం బాధ పడుతున్నారని చెప్పారు. దీని ఆధారంగానే బిల్లు ప్రతిపాదించినట్లు వివరించారు. ముఖ్యమంత్రి హోదాలో ఉండే వ్యక్తి.. సహజంగానే కాస్త ఎక్కువ డబ్బులు ఖర్చు చేయాల్సి ఉంటుందని.. ఈ జీతం పెంపు వల్ల అది సాధ్యం అవుతుందని చెప్పుకొచ్చారు.