భారీ అగ్ని ప్రమాదంతో నిలిచిన విద్యుత్.. ఒక రోజు లండన్‌ ఎయిర్‌పోర్ట్ మూసివేత

లండన్‌లోని ఓ సబ్-స్టేషన్‌లో భారీ అగ్ని ప్రమాదం సంభవించింది. దీంతో హిత్రూ అంతర్జాతీయ విమానాశ్రయంతో పాటు వేలాది నివాసాలకు విద్యుత్ సరఫరా నిలిచిపోయింది. ఈ క్రమంలో విమానాశ్రయాన్ని శుక్రవారం అర్థరాత్రి వరకూ మూసివేస్తున్నట్టు అధికారులు ప్రకటించారు. నగరంలో 16 వేలకుపైగా గృహాలు చీకట్లోనే ఉన్నాయి. బ్రిటన్ మీడియా కథనాలు ప్రకారం.. ప్రమాద స్థలి నుంచి 150 మందిని రక్షించారు. భారత కాలమానం ప్రకారం శుక్రవారం ఉదయం విమానాశ్రయ అధికారిక ఎక్స్‌ (ట్విట్టర్)‌లో పెట్టిన పోస్ట్ ప్రకారం.. హిత్రూ విమానాశ్రయం నుంచి ప్రయాణాలు నిలిచిపోయాయని, మరిన్ని వివరాల కోసం ప్రయాణికులు సంబంధిత విమానయాన సంస్థలను సంప్రదించాలని కోరింది.

‘విమానాశ్రయానికి సరఫరా చేసే విద్యుత్ సబ్‌-స్టేషన్‌లో జరిగిన అగ్నిప్రమాదం కారణంగా విద్యుత్ సరఫరాకు తీవ్ర అంతరాయం ఏర్పడింది.. మా ప్రయాణీకులు, సహోద్యోగుల భద్రతను దృష్టిలో ఉంచుకుని మార్చి 21 రాత్రి 11.59 గంటల వరకు హీత్రూ విమానాశ్రయం మూసివేస్తున్నాం’ అని పేర్కొంది. ఎయిర్‌పోర్ట్ అధికార ప్రతినిధి మాట్లాడుతూ.. అగ్నిమాపక సిబ్బంది మంటలను ఆర్పడానికి ప్రయత్నిస్తున్నారు.. అయితే సరఫరా ఎప్పుడు పునరుద్దిస్తారనేది స్పష్టత లేదు.. పరిస్థితిని వీలైనంత తర్వగా చక్కదిద్దే ప్రయత్నం చేస్తున్నాం అని అన్నారు.

తాజా పరిణామాలతో పలు విమానాలను ఇప్పటికే దారి మళ్లించినట్టు ఫ్లట్ ట్రాకింగ్ వెబ్‌‌సైట్ ఫ్లైట్‌రాడార్ 24 పేర్కొంది. రాబోయే రోజుల్లో విమాన రాకపోలకు తీవ్ర అంతరాయం ఏర్పడుతుందని భావిస్తున్నామని విమానాశ్రయ అధికారులు పేర్కొన్నారు. కాగా, అగ్ని ప్రమాదానికి సంబంధించిన దృశ్యాలను రష్యా అధికారిక న్యూస్ ఏజెన్సీ స్పుత్నిక్ ఎక్స్‌లో షేర్ చేసింది. ఉవ్వెత్తున్న మంటలు ఎగిసిపడుతూ దట్టమైన పొగలు చుట్టుపక్కల వ్యాపించడం అందులో స్పష్టం కనిపిస్తోంది.

కాగా, సెంట్రల్, దక్షిణ ఇంగ్లాండ్‌, ఉత్తర స్కాట్లాండ్‌లోని దాదాపు నాలుగు మిలియన్ల నివాసాలకు విద్యుత్ సరఫరా చేసే స్కాటిష్ అండ్ సదరన్ ఎలక్ట్రిసిటీ నెట్‌వర్క్ అగ్ని ప్రమాదంపై స్పందించింది. నార్త్ హైడ్ సబ్-స్టేషన్‌లో అగ్ని ప్రమాదం సంభవించిందని, రెస్క్యూ దళాలు మంటలను అదుపుచేయడానికి ప్రయత్నిస్తున్నాయని పేర్కొంది.

‘హైయస్, హౌనస్లూ, చుట్టుపక్కల ప్రాంతాల్లో అనేక నివాసాలకు విద్యుత్ సరఫరా నిలిచిపోయింది.. ప్రమాదం జరిగిన సబ్-స్టేషన్ సమీపంలోని ప్రజలతో పాటు తమ సిబ్బందిని ఎమర్జెన్సీ దళాలు సురక్షిత ప్రాంతాలకు తరలిస్తున్నాయి..’ అని వివరించారు.

హీత్రూ ప్రపంచంలోనే అత్యంత రద్దీగా ఉండే విమానాశ్రయాలలో ఒకటి. ప్రపంచవ్యాప్తంగా విమాన సర్వీసుల డేటా అందించే OAG 2024 ర్యాంకింగ్ ప్రకారం.. 51 మిలియన్లకు పైగా ప్రయాణికులతో స్థానంలో నిలిచింది. ఇది 2023 కంటే నాలుగు శాతం ఎక్కువ. ఐరోపాలోనే అత్యంత రద్దీగా ఉండే విమానాశ్రయం ఇదే.